1. Bhov Vortea Devachê somurticho bhokt sogllea purvozanchi zannvai sôdun kaddta ani bhakitam nihallun aplo vêll sarta. Fantea-pahrar utthun ani sogllea kallzan apnnak rochtolea Sorvesporachi vatt polleit ravta. Purvozanchê sogllê zannvaiecher to sôdpus korta ani.
2. To sogllea adlea loukik zannkaranchim utram nihallta ani tanchim bhakitam nihallit to aplo vêll sarta.
3. To mhonn'nniancho bhitorlo ôrth sôdta ani voparichea liplolea orthacher nihall korta.
4. To rajkunvranchi chakri korta ani to razanchea sangatan bhonvta.
5. To videxi desamnim bhonvta ani mon'xantlea borea- vaittacho onnbhov gheta. Aplea sogllea kallzan, to Sorvespora aplea rochnnarak magnnem korta, ani Sorvesporachea mukhar aplem tondd ugddun aplim patkam bhogôs mhunnon prarthonam korta.
6. Ani Devachi khuxi zalear to huxarkaien bhonvtolo. Tachea tonddantlean zannvaiechea utrancheô zhori bhair sortoleô ani magnneant to aplea Sorvesporak dhin'vastolo.
7. Boreponnan ani xikpan to promannik zatolo ani Sorvesporachea liplolea guttancher niall kortolo.
8. Apnnem ghetlolem xikop to sobhemazar dakhoitolo ani korarantlea kaideancho onod taka favo zatolo.
9. Khub zann tachi zannvai vakhanttole ani ticher kednanch visôr poddcho na. Tacho ugddas nopoit zanvcho na. Pillgeancheô pillgeô tachem nanv urtolem.
10. Raxttram tachi zannvai pôrgott'tolim. Sobha tachi stuti kortoli.
11. Taka lamb auk mellot zalear, hozar mon'xanchea nanvam poros, tachem nanv kirtivont zatolem, ani melo zalearui to dhadoxi astolo.
12. Ani hangasor mhoje kaim nihall asat. Hôi. Hanv punvechea chondra bhaxen zannvaien bhorlolo asam.
13. Mhojea bhoktivont bhurgeamnô, aikat ani ekê nodichê kinarer vaddlolea gulaba bhaxen fulat.
14. Eka suadik pormollachea komlla bhaxen tumi fulun, dhumpa bhaxen sorbhonvtonncho vattar tumi pormollan bhôrcho ani Sorvesporachea denneanchea axirvadan tachê vakhann'nnechim gitam ganvchim.
15. Gitantlean ani kinnoriamnim Tachea nanvanchem vhoddponn ani Tachi mhoima sobhêmazar porgôtt korchi. Gitam ani vakhann'nneam udexim Tachi mhoima tunvem gaunk favo.
16. `Kitlim ojapvont Sorvesporachim kortutvam! To tharaita teach vellar soglleô vostu ghoddun ietat.' `Hem kitem ani oxem kiteak ghoddta' tem vicharinaka. Protek prosnak favo teach vellar zobab melltolo.
17. Tachea utrak udok thambta ani dongor koxem ubem zata ani Tachea hukuma pormannem udkachim tollim akar ghetat.
18. Apnnak zai ti vost Tachean ekach utran ghoddounk zata. Taka vattaunk zai asot zalear konnacheanunch addavpak zaina.
19. Mon'xakull kitem korta ti protek vost Taka disti poddta. Tachê nodrê sorxilem kainch lipounk zaina.
20. Tachi nodor orombhak thaun xevotta meren pavta ani kiteachench Taka ojap zaina.
21. `Hem kitem? Hem oxem kiteak?' Oxem tunvem mhunnonk favona. Kiteak, protek vost tthoravik hetu khatir rochlea.
22. Tacho axirvad ekê nodi bhaxen sukhi dhortori pangurta ani hunvara bhaxen bhizoita.
23. Zoxê porim taj'jea udkachem To mitt korta, têch porim Aplea daizachem nisontton kortat tankam To khast laitolo.
24. Tacheô vattô bhoktivontank jitleô sorôll astat titleoch teô khotteank addkhollimnim bhorloleô astat.
25. Survatek thaun boreô vostu borea mon'xam khatir ani vaitt vostu vaitt mon'xam khatir rochleat.
26. Mon'xakullak jienvchê khatir chodd gorjecheô vostu mhollear udok, asro, uzo, lokhondd ani mitt, gonvanchem pitt, dud ani mhonv, dakam rôs, tel ani kopdde.
27. Heô soglleô vostu, borea mon'xam khatir boreô ani vaitt mon'xam khatir teô vaitt zatat.
28. Kaim vaddoll-varem khast lavpa khatir nirmilam. Aplea ragachea vellar soiteam bhaxem To tancho upeôg korta, nisonttonachea disa teô hinvsa vonkhtat ani Rochnnaracho krodh thonddaitat.
29. Uzo ani korveancho paus, dukoll ani moronn hem sogllem khast lavpak rochlam.
30. Ran'votti zonavoranche vikhalle dant, vinchu ani sorop, hem sogllem Devak mandinant tanchem nisonntton korpa khatir rochloli êk khast laupachi torvar.
31. Tacheô adnia pallunk tankam khub dhadosponn bhogta, ani gorjê vellar te sodanch prithumecher toiar astat ani vêll ietolo tedna Tachea utranchi te beporva korinant.
32. Tea khatir sogllem hanvem kiteak nihall'lam ani boroilam tem hanvem survatek thaun nichev korun sanglam.
33. `Sorvesporachim kortutvam sogllim borim ani vêll pavlo toso, gorjek zai tem To dita.
34. "Hem tachê poros vaitt" oxem tunvem mhunnonk favona. Kiteak, fattim-fuddem protek vostuchem mol sidh zata.
35. Tôr atam sogllea tujea kallzan ani tallean Sorvesporachê mhoimechi vakhann'nni kôr!' Ovesvor
