1.Zannvai aplich vakhann'nni korta, ani aplea loka modem apnnachich tust korta.
2. Sorvpodvedarachê sobhent ti apli jib ugôddta, ani Podvedara mukhar ti aplich vakhann'nni korta.
3. `Bhov Vortea Devachea tonddantlean hanv bhair sorlim ani dova bhaxen hanvem prithum' pangurli.
4. Bhov unchlea zagear mhojem thikann, ani mhojem xinvason eka kupachea khambear aslem.
5. Hanv eksurim ontrolla bhonvtim ghunvleam ani sonvsari patallachê kholaiêchean hanv bhonvleam.
6. Doriachea lharancher ani sogllea sonvsarantlea raxttrancher ani porzancher hanvem odhikar dovorla.
7. Visôv ghenvchê khatir hanvem tanchê modem zago sôdlo, ani hanvem khoincho zago ghenvcho tem polleun ghetlem.
8. Sogllea vostunchea Rochnnaran mhaka updês dilo ani Zannem mhaka rochlea Tannem mhojea tombuk êk zago nemlo. Tannem mhollem: `Jakoba-kulla modem tujem biradd kôr Israelak tujem daiz korun ghe.'
9. Sasnnak thaun, orombak, Tannem mhaka rochlea, ani sasnnak hanv togtolim.
10. Povitr Tombunt Tachê hujir hanvem seva kelea ani Sionant mhojem biradd thir kelam.
11. Mogachea xarant Tannem mhaka visôv dila, ani Jerusaleak hanv razvôtt choloitam.
12. Man favo zal'lea loka modem, Sorvesporan Aplem daiz koxem vinchun kaddlolê porjê modem hanvem pallam ghetleant.
13. Lebanonachea devdhar rukha bhaxen hanvem unchai ghetlea ani Hermon dongravelea vhoddlea Soru rukha bhaxen, hanv vaddlim.
14. En-Gedintlea maddam bhaxen hanv voir pavleam. Jerikentlea gulabachea zhompam bhaxen, mollavelea sundor zoitunachea zhadda bhaxen, udkachê kuxik vaddtolea unch rukha bhaxen hanv lamb vaddleam.
15. Thikecho ani gondhrosacho koso mhozo pormôlll suttlo. Venchun kaddlolea dhumpacho mhojea suskarantlean dhom-dhom suttlo, galbanum, onika, labdanun sarkho, ani eka tombuchea darantlean bhair sortolo ghom-ghom koso.
16. Eka voddachea rukha bhaxen hanvem mhoje khande patllaile. Ani mhoje khande mhoimevont ani kurpevont.
17. Ekê dak-velichea belam bhaxen sundor mhoje komb. Mhojea chonvrank girest ani kurpevont follam zatat.
19. Mhaka axetat tim tumi mhojê-xim ieiat, ani mhojea follamnim dhadoxi zaiat.
20. Mhozo ugddas mhonva poros gôdd, ani mhojem daijiponn mhonvachê polliê poros svadik.
21. Mhaka khatoleank ozun mhoji bhuk lagtoli, mhaka pietoleank ozun mhoji tan lagtoli.
22. Mhojem aikotat tim lojek sampoddchim nant, mhojea utra pormannem choltat tim patkant poddchim nant.
23. Hem sogllem dusrem kainch nhoi. Hem amkam Moizesan samballunk formailolea Sorvesporachea kaideanchem pustok. Jakobachê sonstichem daiz
25. Pishon ani Tigris pikavollichea follamnim bhorun ot'tat, tech porim somurt mon'xak zannvaien bhôrta.
26. Pikavollichea kallar Eufrates ani Jordan nodi bhôrun vhanvtat, tech bhaxen somurt mon'xank zannvaien bhôrta.
27. Dakanchi lunvnni katorpachea vellavelea Gihon nodi bhaxen Nil nôd xistin vhanvonk karonn kitem?
28. Sonvsarantlo poilo monis hem somzunk xoklo na ani atanchea kallavelea mon'xankui tem somzupachem ies mellunk na.
29. Tachim chintnam somdira poros vixall ani Tachi aspôt sonvsarantlea patalla poros khol.
30. Ekê nodintlê nolliê bhaxen ani eka udkachea vhalla bhaxen hanv bagent gelim.
31. Hanvem mhollem: `Hanv mhojem porsum ximptolim ani fulam molle udkan ximpddaitolim.' Ani polle, mhojê nolliechi nodi zali ani nodicho doria zalo,
32. Fantea pahrar udetolea suria bhaxen hanv tumkam xist xikoitam. Ticho porzôll pois meren soglleank pavoitam.
33. Fuddllê pillgek ticho fôll mellchê khatir, eka sfurtivont provadea bhaxen hanv mhoji zannvai rokhoitam.
34. Ani polle, Hem hanvem sogllem mhojeach khatir korunk na. Punn, je konn zannvai sôdtat tanchê khatir kelam. Ovesvor
