1. Sasnnak jieta Tannem soglleô vostu rochleat.
2. Sorvespora bhair dusro konnuch khoro nitidar na.
4. Apnnem kitem kelam tachi jahir korpachi podvi Tannem konnakuch diunk na ani tachea ojapanchea kortubanchi chovkoxi korpak konnachean zata?
5. Ani konnanchean Tachi mahan podvi mezunk zata? Konnachean fuddem soron tachea kaklutivont kornneanchi khobor sopurnnaien sangunk zata?
6. Tantunt kitench choddounk zaina, tantuntlem kitench kaddpak zaina. Sorvesporachea ojapanchi kholai konunch kaddunk xokchona.
7. Jedna ti kornni xevottak pavtat, tedna te fokt tê kornnechi survatuch kortat, ani te thambtat tedna fokt te sodanchech porim gondollak sampoddtat.
8. Monis mhonngê kitem? Tacho koslo faido asa? Tannem borem korum vô vaitt korum, taka koslo orth asa?
9. Mon'xachem jivit chodduch zalear xembor vorsam.
10. Sasnnachea kalla-xim zorui ami hea thoddeach vorsanchi tulla korit zalear, tem somdiracho êk udkacho thembo vô renvencho êk konno koso.
11. Teach khatir Sorvespor tanchê kodden sonsnnikai gheta ani apli kaklut tancher votoita.
12. Tancho xevot kitlo vaitt asa ti Taka khobor asa. Ani teach khatir To aplea bhogsonneanchi tank vaddoita.
13. Mon'xakull aplea xezareanchi kaklut korta, Punn, Sorvespor apli kaklut soglleancher patthoita. To amkam khast laita, sudraita ani xikoita. Ani êk gonvlli aplea xelliank portun apnna-xim haddta tosoch amkaim haddta.
14. Apli nittavnni mandun gheta tanchi ani khotkhotean nit sôdtoleanchi Taka khub doia-kaklut asta.
15. Mhojea puta, tum konnacher-ui upkar korta astana, taka kendum nakai vô ek bhettovnni korta astana taka dukhta toslem ekui utor uloinakai.
16. Zoso dov gormi nivoita, toxench ek borem utor ekê denngê poros moladik asta,
17. Khoreponnim ek borem utor ekê denngê poros moladik. Punn, eka udar kallzachea mon'xa lagim donui vostu astat.
18. Ek piso okmana xivai kitench dinvchona, ani ek khoxê bhair diloli dengi konnakuch man'chi na.
19. Ulounchê adinch xik, ani piddent poddchê adinch tujê bholaikechi kallji ghe.
20. Sovesporan tuji nit korchê adim tujea ontoskornnachi chovkoxi kôr; ani zoddttecha disa tuji suttka zatoli.
21. Tujer pidda ienvchê adim tum lhan'vikai ghe. Patok korina fuddem, tabortob tachem prachit kôr.
22. Tunvem Sorvesporak angovnn kelea zaler, ti pallchea vellar kitench vatter add ieunk dinaka ani moronn iesor sogllem zagear ghalunk ravonaka.
23. Angovnn korchê poilim ti adim fudench pallpachi toiari kôr. Sorvesporachê sonsnnikaiechi porikxa korta toslo zainaka.
24. Farikponnachea vellar Dev aplem mukhamoll pois korta. Tea xevottachea disachê khasticho ugddas kôr.
25. Bhorpur jevonn asta tedna duskollaiecho ani girestkaiechea kallant, goribkaiecho ugddas kôr.
26. Fantea pahrar ani tinsanzchea vella modlo kall rokddoch sompta; Sorvesporachea mukhar sogllem soddsoddit ghoddta.
27. Xanno monis protek vost chotraien korta, Patkachea vellar apnna bhonvtim aslolea dusreak dukhoina zaunk to kallji gheta.
28. Gineanacho protek monis zannvaiek vollkhota. Ani ti mevlea taka, bhovman dita.
29. Mhonn'nneom somzotat tannem, aplê zannvaiê khatir koxtt kaddleat ani te-i favo tosleô vopari sangot astat.
30. Tujea khôr vondavnniank, tujer tabo ghevunk dium-nakai Tujea khoxeancher tabo dovor.
31. Tuji protek axa tum puri korxi zalear tujea dusmanachea hanxeachem tum sadhon zatoloi.
32. Khospaianchem jivit jienakai. Toslea somazant tum vanttekar zaum-nakai.
33. Tujea svotachea gorzank duddu nastana dusrêkodden rinn kaddun vhoddlim-vhoddlim jevnnam diun tukach bhikari korinakai.Ovesvor
