1. Ek allxi monis ghannin bhorlolo êk fator koso, Tachea odruxttak lôk xeboi ghaltat.
2. Ek bekar monis êk xennachi ras koxi, Taka hat laita to rokddoch aplo hat fapuddta.
3. Eka xist naslolea bhurgeacho bapui zavop mhollear êk okman ani toslê ekê choliecho bapui zavop mhollear luskonn.
4. Ekê chotur dhuvek ghorkar favo zata. Punn, êk loz nasloli dhuv bapaik dukh haddta.
5. Ek loz nasloli dhuv avoik ani bapaik lojek ghalta. Ani dogaim tika pois kortolim.
6. Khoincheai vellar dekhik ulovop mhollear mornnak vazoitolea songita bhaxen, Punn, dekhik khast lavop ani chukichi durusti korop soglleach vellar zannvaiechem.
9. Eka pixeak xikovop mhollear êk funttloli moddki ghoman novean dosoilolea porim. Vô eka nhident bhormetolea bebdeak uttoitolea porim.
10. Vô tum eka nhidechea bhorment aslolea mon'xa lagim uloitolea bhaxen. Tum uloun somplea uprant to piso tuka vichartolo: `Tum kitem sangtalo?'
11. Tum meloleam khatir dukham gholloi. Tanchea jivitantlo uzvadd palovlo dekhun. Toxench pixeam khatirui roddunk favo, tanchem ginean sanddlam dekhun.
12. Meloleam khatirchem dukh sat dis togta. Punn, pixeank ani Devak vollkhonasloleanchem roddnnem jivitantle soglle dis meren urta.
13. Chokroma kodden uloun tujem utor vogddainaka, ani eka enddea fuddean vocho naka. Tacher chotrai dovor. Na tôr tum trasant poddtoloi ani tachea borabor ravun tum mhello zatoloi; tachea sorxilo pois ravlear tuka monachi xanti melltoli ani tachea pixeponnan tum bejar zanvcho na.
14. Tosle monis xinxea poros odik zodd vojem ani pixeachem nanv `piso' nhoi zalear anink kitem?
15. Eka bondder mon'xak sonslolea poros, ek mittachem, renvenchem ani lokhnnachem vojem sonsop sompem.
16. Ek lakddachi patti ekê imarotint sarki romoilea zalear tika ekê bhuim-kampichean halounk zaina. Tech porim eka mon'xan aplem ginean vaprun ani borê toren fattlem-fuddlem niall'lea uprant panvol marlear, akantacho vêll ieta tedna to kednanch halcho na.
17. Khoreponnim ani huxarkaien chinta tem mon borê bhaxen surngailôlê ekê okhondd vontti bhaxen.
18. Ekê vonntir dovrlole dhakttule fator varo marta tea vellar thoim urche nant. Toxech aplem svotachem chintunk bhietolea pixeachem kalliz bhirantichea vellar togchem na.
19. Dolleak kiteim toplem zalear dukham ietolim. Kallzak dukhoilem zalear tachim bhavnam somzotolim.
20. Suknneancher fator marlear, tim bhieun uddun vetolim. Ixttachi ninda kelear, ixttagôtt kobar zatoli.
21. Tujea ixtta lagim tum zhogoddloi zalear niraxi zainaka. Taka portun haddunk upai asa.
22. Tujea ixta lagim tum khoraien zhogoddloi, tôr bhienaka. Tuka sondhan korpak upai asa. Punn, tunvem tôr taka okman kelo, taka boddaiô sangleô, vô tacho gutt foddlo, vô tea guttacho visvas-ghat kelo ani taka fattleantlean suri marli, tôr khoinchoi ixtt tuka pois zatolo.
23. Tuzo xezari gorib asta tedna tum tacho visvas jikhun ghe; To iesesvi zata tedna tujean tachea dhadosponnan vanntto gheupak zatolo. Tacher vaitt vêll ieta tedna tum tachê borabor rav. Tachea borea noxibachea disamnim, tuka zai tea vellar tujean tantunt vantto gheunk zatolo.
24. Jê bhaxen ujea adi vaf ani dhunvôr ieta, tech bhaxen rogot bomballa adim okman ietat.
25. Mhojea ixttachi rakhonn korpak hanv kednanch lozchona ani tachea gorjechea vellar hanv kuxin sorcho na.
26. Ani tachê khatir mhaka khub tras zale zalear ti khobor kollta titlei zann tachê vixim chotur ravtole.
27. Hanv patkant poddonastana vattounk ani mhojê svotachê jiben mhojem nisontton korina zaunk mhojea tonddacher konn tabo dovortolo, ani khoreponnim sopurnnaien mhoje vontt bond kortolo? Ovesvor
