1. Zôr tuka konnakui borem korpak zai, tôr favo teach mon'xak venchun kadd. Tedna tujeô boreô kornneô Omtea kollxear udok zanvcheô nant.
2. Eka bhokti mon'xak tunvem, borem kelem zalear, tuka inam' melltolo. To monis tuka inam' dina zalear Vorto Dev tuka ditolo.
3. Vaittant jieta taka vô bhikxea diupak nhoikarta taka kitench borem zanvchem na.
4. Eka bhoktak adar di. Eka patkeak adar diunk vochonakai.
5. Lhan'vikank borem kôr. Devak mandinasloleank kainch dium nakai. Taka jevonn ghalinakai, To tujê poros bollixtt zatolo ani tunvem taka jem kitem borem kelam, tachê dupettin to tuka farik kortolo.
6. Kiteak, Vorto Dev svota patkeank kanttallta ani tankam favo ti xikxea portun ditolo.
7. Borea mon'xak di, ani patkeank adar diunk vochonakai.
8. Tuka borem ies mellta tea vellar tuzo khoro ixtt konn to sodanch vollkhunk zaina. Punn, vaitt vêll ieta tedna tuzo dusman konn to kollonastana urona.
9. Konnancheim borem zata tedna tache dusman dukhi zatat ani tacher vaitt vêll ieta tedna tache ixtt legit taka pois zatat.
10. Eka dusmanak kednach patienakai. Kaxeache kollombi bhaxen, tachem khotteponn padd ghalta.
11. To lhan'vikaien vagon ani apli man bagovun dhortorek ghonstton chol'lear legit tumchea modem ontor dovor ani tachea pasun chotur rav. Ek arso ghansun nitôll kelear, tacho chokmok togona mhunnon tuka somzotolem.
12. Taka tujê kuxik ubo dovrinakai. Dovorxi zalear to tuka dhuklun tuzo zago ghetolo. Tujea uzvean taka bosoinakai. To tuzo manacho zago mellounk vaurtolo. Tedna tuka mhojea utrancho ugddas ietolo ani tuka poschatap zatolo.
13. Sorpank khellovpeak sorôp chablo ani mon'zati samballpeak tannim khelo zalear konnak vaitt distolem?
14. Patkeanchea borabor tum bhonvloi zalear tanchea patkamnim tum bhageli zatai.
15. To tujea sangatak êk khinn-bhor ravtolo, punn, taka matxi sond diuxi zalear to ticho faido ghetolo.
16. Eka dusmanachea vonttancher mhonv asot, punn, tachea kallzant tuka fonddant uddovpachi kolpona asta. Eka dusmanachea dolleamnim dukham asot. Punn, taka sond mellot zalear, tujem rogot varounk to toiar astolo.
17. Tujer vaitt vêll ailo zalear, tujea fuddeant to poilo astolo, ani tuka adar diupachem fokandd korun to tuje paim vôddtolo.
18. Borem zalam mhunnon to tokli haloitolo, talliô martolo ani tujeô vaitt khobrô posraitolo ani aplo sobhav bodoltolo. Ovesvor
