1. Magir To mhaka aikum ieta toxem vhoddlean aroddlo: 'Xaracho nas korpiamnô, ieiat fuddem, ek-eklo ap-aplem nas korpachem hatiar gheun ieiat.'
2. Rokddech ut'torechea voilea darvonttea thaun sôv dadle dixtti poddle, ek-ekleachea hatant nas korpachem hatiar aslem. Tanchê modem sonni vostram nheslolo eklo aslo, tachea pott'tteak xaichi êk battli lail'li asli. Te bhitôr sorle ani kãxeachê vedi mukhar thamble.
3. Paktte aslolea kerubicher asli thoim thaun Israelachea Devachi mhoima voir sorli ani Devmondirachea umbrea vatten geli. Sonni vostram nheslolo ani pott'tteak xaichi battli lavun aslo tea borovpiak Tannem apoilo,
4. ani Sorvesporan taka mhollem: 'Sogllem Xar bhonvun kadd, ak'kea Jerusaleantlean voch, ani thoim choltat tea sogllea kanttalleachea kortubam pasot dukh kortat ani vilaptat tanchea kopalar êk kuru kadd.'
5. Herank To oxem sangtalo to hanvem aikolem: 'Tachê pattlean sogllem xar bhonvun kaddat ani marat. Konnakuch doia dakhoum nakat, konnachech churchure dhôrum nakat;
6. mhatareank, tornnea dadleank, cheddvank, dhakttulea bhurgeank, bailank, marun udoiat, soglleancho nas korat. Punn kopalar kuru aslolea konnankuch hat lavum nakat. Mhojea Mondirant thaun suru korat.' Mhonnttôch Devmondirant asle tea mhatareank tãnnim poile marle.
7. Tannem tankam mhollem: 'Devmondir bhoxttaun uddoiat; angnnam marloleanchea moddeamnim bhôrat. Cholat!' Mhonnttôch te bhair sorle ani xarantlean jivexim lokak marun gele.
8. Te tankam marun uddoitale tedna, mhaka ekloch sôddlo; hanv saxttangim poddlom ani roddun hanvem mhollem: 'Ai Saiba, Sorvespora Deva, Jerusaleacher Tuzo krôdh varoitai toso, Israelachim urleant tea soglleancho Tum nas korunk vetai?'
9. Tannem mhollem: 'Israelachea Ghoranneacho ani Judacho guneanv hispa-bhair vhôdd zala; sogllo dês vikrail'lea rogtant buddla, ak'kem Xar noxtteponnan bhòrlam, kiteak tim oxem mhonnttat: 'Sorvesporan amcho dês sôddun dilo, Sorvesporak kãi dixtti poddona.'
10. Toxem tôr, Hanv-ui tankam doia dakhounchoch na, tanche churchure dhôrcho na. Tãnnim kelam tachê pasot Hanv tankam farik kortolom.'
11. Tedna sonni vostram nheslolo ani xaichi battli pott'tteak lavun gel'lo to dadlo porot ailo ani apnnem kitem kelam tem tannem sanglem: 'Tuzo hukum' hanvem pall'llo.'
