1. Sovea vorsa, sovea mhoineachea panchvea disa, hanv mhojea ghora bosun aslom ani mhojea sangata Judache malgodde-i bosun asle. Tedna ovchituch Sorvespora Devacho hat thoim mhojer denvlo.
2. Polleunk gelear, mon'xa sarko êk konnacho akar dixtti poddlo. Penkott koxem distalem thoim thaun sokla porian uzo aslo; ani penktta thaun voir porian pivllê jhigjhignnê sarko porzôll aslo.
3. Êk hat koso vistaron sorlo ani hannem mhojea kensanchê êk vennien mhaka dhôrlo; ani atmean mhaka mollba ani prithvê modem ubarlo ani, Devan dil'lea hea dorxonam modem, mhaka Jerusaleak vhelo, ut'tori vatten aslolea bhitorlea angnnachea darvontteachea provesa lagim. Thoim asli [Devachê] premaxecho kanttallo challoita tea kuddea devachi murti.
4. Thoim mhojê mukhar, falkeachea dorxonant hanvem dekhloli toxich, Israelachea Devachi mhoima asli.
5. Tannem mhollem: 'Mon'xachea puta, ut'torê vatten tuje dolle ubar.' Hanvem mhoje dolle ut'torê vatten ubarle, ani thoim, vedichea darvontteachê ut'torek, provesacheruch [Devachi] premaxa challoitoli hi murti asli.
6. Tannem mhollem: 'Mon'xachea puta, tim kitem kortat tem polletai mum tum? Mhojea Mondirantlo Mhaka bhair ghalunk Israelachem Ghorannem korta teô ekdom' noxtteô ani kanttalleacheô vostu dekhtai mum?'
7. Magir Tannem mhaka angnnachea provesa lagim vhelo. Hanvem pollelem; vonntint êk burak aslo.
8. Tannem mhollem: 'Mon'xachea puta, vonntintlean khonnit voch!' Vonntintlean khonnlea uprant hanvem ek dar dekhlem.
9. Tannem mhollem: 'Bhitôr voch, ani hanga koslim noxttim kortubam tim kortat tem polle..'
10. Mhonnttôch bhitôr vochun hanvem pollelem; thoim aslim sogllê torechim jivannim ani vitt haddpacheô mon'zati, ani vonntincher sobhonvtim kantoil'le Israelachea Ghoranneache soglle kudde dèv.
11. Tanchê mukhar ube asle Israelachea Ghoranneantle sot'tôr malgodde, ani hanchê modem Jazania, Shafanacho put. Ek-ekleachea hatant ek dhumpavnnem aslem ani dhumpachem domdomit pormollachem ek kup voir choddot aslem.
12. Tannem mhollem: 'Mon'xachea puta, Israelache malgodde kallokhant, ek-eklo ap-aplê murtichea kuddant, kitem kortat tem dekhlãi mum tunvem? Te mhonnttat: "Sorvespor amkam pollena; Sorvesporan amcho dês sôddlo." '
13. Tannem mhollem: 'Ozun odik kanttalleachim kortubam korit asat mhonn tum dekhtoloi.'
14. Magir Tannem mhaka Sorvesporachea ut'torechea darvontteachea provesa lagim vhelo; thoim bailô bosun [kuddea deva] Tam'muza pasot roddnnem kortaleô.
15. Tannem mhollem: 'Mon'xachea puta, tem polletai mum tum? Hachê poros ozun odik kanttalleacheô vostu dekhtoloi.'
16. Magir Tannem mhaka Sorvesporachea Ghorachea bhitorlea angnnant vhelo. Ani thoim, Sorvesporachea Mondirachea provesa lagim, darvonttea ani vedi modem, sumar ponchvis dadle asle; te Sorvesporachea Mondirak patt korun asle ani tanchim tonddam udentê vatten vollon aslim. Te udentê vatten saxttangim poddtale, udetolea suria mukhar.
17. Tannem mhaka mhollem: 'Mon'xachea puta, hem dekhlãi mum tunvem? Judachem Ghorannem hangasôr kanttalleacheô vostu korta tem kãich vaitt nhoi mhonn dista kai tankam? Punn, titlench nhoi, tim ak'khea desant zulum' korit asat ani oxem odikuch Mhozo rag challoitat; atam polle: to khando aplea nakank laitat!
18. Dekhun krodhan bhoron Hanv tankam vagoitolom; Hanv tankam doia dakhouncho na, tanche churchure dhôrcho na. Zai titlem arddun tim Mhaka ulo marum, Hanv tankam aikuncho na.'
