1. Sorvesporachem utor mhaka pavlem; Tannem mhollem:
2. "Mon'xachea puta, Israelachea gonvlliam virudh ho sondêx di; Mhozo sondêx diun tankam oxem sang: "Gonvlliamnô, Sorvespor Dev oxem sangta: Apnnakuch pôstat tea Israelachea gonvllianchem kottakotta! Gonvlliamnim hinddak pôscho nhoi?
3. Tori tumi dud pietat, tumkanch lhonvechi nhesônn kortat, datteam-motteam menddram-xelliank marun khatat, punn hinddachea posonnachi tumi porva korinant.
4. Osokt menddrank tumi ghôtt korunk nant, ghaiel'leank tumi vokhod lavunk na, tanche ghave bandunk nant. Vatt chukloleank tumi portun haddunk nant ani sanddloleank tumi sôdun kaddunk nant. Portench zalear, tumi tankam zuluman ani zobor-dosten vagoileant.
5. Gonvlli na zaun, tim zollim-mollim ximpddon gelim, ani ximpoddlolim astana, tim sogllea savzanchem khann zaunk pavlim.
6. Mhozo hindd sogllea dongrancher ani porvotancher ximpoddlolo asa; Mhozo hindd ak'khê prithvecher ximpddon gelo; konnuch tachi porva korina, konnuch tankam sôdunk vochona.
7. "Dekhun, gonvlliamnô, Sorvesporachem utor aikat:
8. Mhojea jivachean soput gheun sangtam - uloita to Sorvespor Dev! - Mhozo hindd choranchea hatak sampoddla, ani gonvlli na zaun sogllea savzanchem khann zaunk pavla, Mhoje gonvlli Mhojea hinddachi porva korich nant, Mhoje gonvlli hinddak pôschê svater apnnankuch pôstat: hea sogllea pasot,
9. gonvlliamnô, Sorvesporachem utor aikat:
10. Sorvespor Dev oxem mhonntta: Polleiat, Hanv gonvlliam add asam. Hanv Mhozo hindd tanchea hatantlo kaddunk vetam ani hea fuddem Mhojea hinddak chorounk tankam diuncho na. Ani oxem gonvlli apnnankuch pôsunk pavche nant, kiteak Mhojea menddrank tanchea tonddantlim nivartolom ani tim tancho chorôv zaunk pavchim nant.
11. "Sorvespor Dev oxem sangta: Polleiat Hanv khaxa Mhojea hinddacho samball korunk vetam, ani dekhun tankam sôdun kaddtolom.
12. Zoso gonvlli aplea ximpoddlolea hindda modem astana tankam sôdun kaddta, toxench Hanv-ui Mhojea menddrank sôdun kaddtolom, ani kallim-kitt kupam manddlolim astam tim ximpddon geleant tea sogllea svatam thaun tankam nivartolom.
13. Veg-vegllea raxttram modem tim pavleant, tôr thoim thaun tankam bhair kaddtolom; ani veg-vegllea desantlim tankam zoma kortolom ani tanchea khaxa desant tankam portun haddtolom. Israelachea dongrancher, gholam boglek ani ravunk zata tea sogllea zageancher tankam chorvak vhortolom.
14. Hanv tankam borea chorvak vhortolom, ani Israelachea unch-unch dograncher tankam chorvachim moidanam melltolim; thoim tim borea chorvachea moidanar visôv gheunk add poddtolim; Israelachea dongrancher lovlovit-rosroxit moidanancher tim chorvak vetolim.
15. Hanvuch Mhojea menddrank choroitolom ani tankam add poddoxim kortolom - oso uloita to Sorvespor Dev!
16. Sanddloleak Hanv sôdunk vetolom, vatt chukloleak Hanv portun haddunk vetolom, dukhovloleache ghai bandtolom, ani osokt zaleant tankam ghôtt kortolom. Mottim ani mozbut asat tankam-i Hanv rakhtolom. Kiteak sarkem tem korta toslo khoro Gonvlli Hanv.
17. "Ani tujem, Mhojea hindda - uloita to Sorvespor Dev! - tujem oxem zatolem: xelliam ani xelliam modem, menddream ani bokddeam modem Hanv nit kortolom.
18. Tumi boro chorôv khaun dhadoxi zatat tem purona tumkam? Tea bhair, urlolo chorôv pãiam tolla mostunk zai tumi? Nitoll udok tumi pietat tem zalem, punn urlolem udok tumchea pãiamnim khodoll korchem tumi?
19. Ani tumi tumchea pãiamnim mostilam tem Mhojea menddramnim khaunchem poddlem, ani tumchea pãiamnim tumi khodoll kelam tem udok tãnnim pieunchem poddlem.
20. Borem tôr, Sorvespor Dev oxem sangta: 'Hanv khaxa ieun motteam ani barik menddram modem nit kortolom.
21. Tumi tumchea kuximnim ani bhuzamnim sorv osoktank dhuklun uddoilim ani tumchea xingamnim tankam tôplim, dekhun tim bhailean ximpddon gelim.
22. Punn Hanv Mhojea menddrank nivartolom ani tim hea fuddem konnachich piddapidd bhôgchim nant; ani menddram-menddram modem Hanv nit kortolom.
23. "Ani tanchi rakhônn korunk Hanv êk gonvlli upzoitolom: to mhollear Mhozo sevôk David; ani to tankam choroitolo; to tankam chorvak vhortolo ani tancho gonvlli zatolo.
24. Ani Hanv Sorvespor tancho Dev zatolom, ani Mhozo sevôk David tancher raj choloitolo. Hanv, Sorvespor, oxem sangun dovortam.
25. Ani tanchê kodde Hanv êk xanticho korar sthaptolom; sogllea savzank desantlim bhair uddoitolom. Ani tim surokxitponnim oronneant ravtolim ani ranamnim nhidtolim.
26. Ani tankam Mhojea dongra bhonvtim tthikann korunk diun, tancher axirvad ghaltolom. Thoim ritu pormannem tankam paus dhaddtolom; tancher subham' axirvadancho paus ghaltolom.
27. Molleantlea zhaddank follam zatolim ani xetant pik vaddtolem. Aplea desant tim surokxit jietolim; ani Hanv tanchê mani voilea zunvachim addbarim môddun uddoitolom ani tankam gulamam kortoleanchea hatantlim soddoi-tolom tedna, Hanv Sorvespor mhonn tankam kollon ietolem.
28. Hea fuddem tim raxttranchea chopkeant poddchim nant, ani desantlim savzam tankam giraschim nant. Tim surokxitponnim jietolim ani konnachich tankam bhirant aschi na.
29. Ani tanchê pasot lovlovit-pikall moidanam posortolom, ani oxem tankam hea desant anink kednanch bhuk lagchi na ani anink kednanch tankam raxttrancheô kenddnniô bhôgunk poddcheô nant.
30. Ani Hanv Sorvespor, tancho Dev, tanchea sangata asam mhonn, ani tim, Israelachem Ghorannem, Mhoji porza mhonn tankam kollon ietolem. Uloita to Sorvespor Dev!
31. Ani tumi, Mhojim menddram, Hanvem pôslolea Mhojea hinddachim menddram, Mhoji porza tumi, ani Hanv tumcho Dev - uloita to Sorvespor Dev!" '
