1. Tisavea vorsant, chovthea mhoineachea panchvea disa, Kebar Nodi lagim nirvaxiam modem hanv aslom; tedna sôrg ukto zalo ani Deva thaun ail'lim dorxonam hanvem pollelim.
2. Jehoiakim' Razak pordesant vhelear panch vorsam zal'lim. Mhoineachea panchvea disa
3. Sorvesporachem utor Ezekiel iadnikak, Bujichea putak, Kaldeikaranchea desant Kebar Nodi lagim, pavlem. Thoim Sorvesporacho hat tacher denvlo.
4. Dolle ubarun polle zalear, ut'torê thaun suttlolem ek vadoll ietalem. Eka vhoddlea kupantlo zhogzhogit uzo bhair sortalo ani tachê bhonvtonnim mollob sogllench uzvaddan chok-choktalem. Ujeachea zhogzhoga modem, pitull koxem kitem tori chok-choktalem.
5. Hea vadollachea mazak char jiveô rochnna koxeô distaleô. Tancho akar oso aslo: tankam aslem mon'xanchem rup.
6. Ek-ekak char tonddam aslim, ek-ekak char paktte asle.
7. Tanche donke nitt asle; paddkuleam bhaxen tankam tollve asle, punn he chokchokit kel'lê pitullê bhaxen jhig-jhigtale.
8. Tanchea char tonddam ani char paktteam bhair, tankam char mon'xache hat asle, ek-eka pakttea pondak êk hat.
9. Teô rochnna aplea paktteamnim ekamekak tenktaleô; choltana teô hê ani tê vatten vollonasleô, punn borabor nitt ubeô choltaleô.
10. Êk-êkê jivê rochnnek char vegllim tonddam aslim: mukhailean ek mon'xachem tondd, uzvean ek xinvachem tondd, davean ek boilachem tondd, ani pattlean ek ghonnichem tondd.
11. Dôr-êkê rochnneche don paktte vistarlole asle ani oxem te xezarchea rochnnanchea paktteank tenktale; ani dusrea don paktteamnim teô aplench ang dhamptaleô.
12. Êk-êk nitt ubi fuddem vetali; ap-khuxen apnnank zai tê dixen teô vetaleô; ani choltana hê ani tê vatten teô vollonasleô.
13. Jivea rochnnam modem ujeachea lastea inglleam bhaxen kitem tori aslem; jivea rochnnam modem fattim-fuddem nettan dhanvteô chuddi asleô. Ujeacho chôkchôk vaddot vetalo ani tea ujeantlo vizacho lôklôk bhair sortalo.
14. Ani teô jiveô rochnna zhoglavnneam bhaxen nanch zataleô ani novean dixtti poddtaleô.
15. Hea jivea rochnnancher nodor mar zalear, char tonddanchê êk-êk jivê rochnnechê kuxik dhortorer hanvem ek chokr dekhlem.
16. Akaran ani ghoddnnuken him chokram jhigjhigit losnnea sarkim distalim. Chougank-ui tench rup aslem, ani tim oxim akarlolim ani ghôddlolim aslim ki dôr-eka chokra bhitôr aniek chokr asa mhonn distalem.
17. Char-ui dixantlê khoinchê-i dixen tim ghunvun gelim zalear, ghunvtana tankam hê ani tê vatten vôllchi gorozuch nasli.
18. Tancho ghêr thottak korpa sarko itlo vhôdd aslo, ani char-ui chokranche atte sogllech chokchoktale.
19. Jiveô rochnna cholunk lagtaleô tedna, tanchê kuxik chokram-i vetalim; ani jiveô rochnna zomni veleô uddtaleô tedna, chokram-i uddun vetalim.
20. Teô rochnna apnnank zai tê dixen vetaleô, ani tanchea vangdda chokram-i vetalim, kiteak tim tea rochnnanchea niontronna khal aslim.
21. Jiveô rochnna fuddem vetaleô tedna, chokram-i fuddem vetalim; teô thambtaleô tedna, him-i thambtalim; teô zomni veleô uddun vetaleô tedna, chokram-i zomni velim uddun vetalim.
22. Jivea rochnnanchea mathear suriakanta bhaxen loklokit êk kollôs koso aslo. Ho tanchea matheam voir vistarlolo aslo,
23. ani hea kollsa pondak êk-êkê rochnneche don paktte nitt vistarlole asle ani xezarchê rochnnechea paktteank tenktale, ani tiche her don paktte tichem ang pangurtale.
24. Tanchea paktteancho-i avaz hanvem aikolo; uddtana to gongetolea doriachi gaz distalo, penneant sadtolea vorixtt foujecho avaz koso, Sorvpodvedar Devachea tallea sarko. Ani teô rochnna thambtaleô tedna, teô aple paktte kovllun dovortaleô.
25. Tedna-i avaz aikum-ietalo.
26. Tanchea matheam voir aslolea kollsa thaun nill-rotnanchem kel'lem ek xinvason distalem. Tea unch-unch xinvasonar boslolo mon'xa sarko konn-eklo dixtti poddtalo.
27. Penktta thaun voir porian agttea modem jhigjhigtolê pitullê sarko to distalo; ani penktta thaun sokla porian êk uzo koso sobhonvtim loklokit uzvadd ghaltalo,
28. punn tea loklokak pausachea disamnim kupam modem chokchoktolea donddubalache soglle rong asle. Ho dekhavo Sorvesporachi mhoima mhonn mhaka gomlem! To polleun hanv saxttangim poddlom, ani tedna mhojê lagim uloitolea konnacho tallo hanvem aikolo.
