1. Ikravea vorsa, mhoineachea poilea disa, Sorvesporachem utor mhaka pavlem; Tannem oxem mhollem:
2. Mon'xachea puta, Tir xaran Jerusalea vixim oxem mhollam: "Kotta babddiechem! Jerusaleachem, tea Raxttranchea Darvontteachem, ghorttann zalem! Tichi dovlôt-girestkai bhòngli, ti atam mhojea hatant poddli!"
3. Dekhun Sorvespor Dev oxem sangta: "Atam, Tira, Hanv tujê add utthun ietam! Zoso doria aplim lharam uprasaita, toxem Hanv tujê virudh zaitea raxttrank uprasaitolom.
4. Tim Tirachim kottam môddun uddoitolim ani tiche burinj konsllaitolim. Tichê veli dhul'l porian Hanv zhaddun uddoitolom, ani tika Hanv êk zhogzhogit tollop kortolom.
5. Ticher, doria laginch mhonnun, kharvi apleô rampnni sukunk ghaltole. Oxem Hanv sangun dovortam - uloita to Sorvespor Dev! - Ti raxttrank lutticho mhal zatoli.
6. Ani tichea odhikara khal aslolea bhukhonddachea nogramnim jietolea lokak torvarin martole. Ani tedna Hanv Sorvespor mhonn tankam gomun ietolem."
7. Kiteak Sorvespor Dev oxem sangta: "Ut'torê thaun Nebukadnezzarak, Babiloniechea razak, raianchea raiak, Tiracher akromonn korunk haddtolom; aple ghodde, roth, ghoddesvari ani êk vorixtt fouz gheun to akromonn kortolo.
8. Tujea odhikara khal aslolea bhukhonddachea nogramnim ravtolea lokak to torvarin martolo. Tuka veddho ghalunk to chori khonntolo, tujê add matieche band ubartolo, tujê add tuka veddho ghalun aplea soinikank manddtolo, tujê add dhalancho êk podd'do ubartolo,
9. Zhuzachim dhopkea-iontram marun-marun tujim kottam môddtolo, ani kuddarimnim tujê burinj fôddun uddoitolo.
10. Itle tache ghodde ki tãnnim uboil'lea dhul'lichea kupamnim tum lipon urtolii. Kottank poddlolea khanxintlean êk fouz xarant rigta tê bhaxen, tujea darvontteantlean to bhitôr sortolo; tedna tache ghoddesvor ani rothanchim chakam itlo boball kortolim ki tujim kottam kamptolim.
11. Aplea ghoddeanchea khuramnim to soglle tuje roste mostitolo, Tujea lokak torvarin martolo, ani tuje bollixtt khambe dhornnir xevttun uddoitolo.
12. Soglli tuji girestkai luttun vhortole, ani sogllo tuzo veaparacho mhal chorun kaddtole, tujim kottam konsllaitole, ani tuje girest nivas môddun uddoitole, tuje chire, tujim lankddam, ani tuji dhul'l porian doriant uddoitole.
13. Tujea gitam-gaionancho avaz Hanv bond kortolom, tujea kin'noriancho avaz anink aikunk ieuncho na.
14. Tuka Hanv êk zhogzhogit tollop kortolom, tujer kharvi apleô rampnni sukunk ghaltole. Tum novean bandon ieunchich naim, kiteak Hanv, Sorvespor, oxem sangun dovortam - uloita to Sorvespor Dev!"
15. "Sorvespor Dev Tirak oxem sangta: "Ghaiall zal'lim pinrgotat ani tujê bhitôr lokak marun uddoitat tedna, Tujem ghorttann zalam mhonn aikun kinariô koxeô mhonn kampcheô nant?
16. Tedna doriacher podvi choloitat te soglle raza aplea xinvasonam vele denvun ietole, aple zhube kuxin dovortole, ani aplim nokxil'lim vostram kaddun uddoitole. Tujem noxib polleun thorthortole, kampereachim vostram ghalun, kampun-kampun dhortorer bostole.
17. "Tujê pasot hê bhaxen vilap kortole: Doria-deger bosun aslii tum, nanvvostem xar aslii tum, doria-sagoracher podvi choloitalii tum, tujea nagrikam soit sogllê kinarer jietoleank bhirant ghaltalii tum. Punn atam kedem mhonn ghorttann tujem zaunk pavlem!
18. Atam, tujea nisonttonachea disa, dip-zunve koddkoddtat; tuzo nas zal'lo polleun doriachea zunveank xirxiro ieta.
19. "Kiteak Sorvespor Dev oxem sangta: "Tuka Hanv heram osadd poddlolea xaram bhaxen ek ghorttann zal'lem xar kortolom, doriak tujer uprasaitolom ani sagôr tuka buddoitolo,
20. patallant vetat tanchê borabôr, magam morun gel'lea lokanchea vangdda, tuka Hanv xevttun uddoitolom, ani konnuch ugddas korina tea magam nisonttonak pavlolea modem prithvê ponda tuka khôl khonddant fêktolom. Hê bhaxen tum anink kodinch portun ieunchi naim ani jivea mon'xanchê prithumer tuka anink svat mellchina.
21. Tuzo ugddasuch korun lokank xirxiro ietolo, tujem nanv porian urchem na. Tuka sôdtit zalear, tum anink kednanch mellchich naim. Uloita to Sorvespor Dev!" '
