1. Sorvesporachem utor mhaka pavlem; Tannem oxem mhollem:
2. Mon'xachea puta, ekdam dogi bailô asleô, êkêch avoicheô dhuvô.
3. Ejiptant tãnnim xindollki keli; ozun tornnim cheddvam astana tãnnim xindoll jivit dhôrlem. Thoim astana tãnnim aplim horddim poxeunk dilim, thoim tãnche chinv poilê pavtti chirddile.
4. Vhodllê bhoinnichem nanv Oholas, ani tichê bhoinnichem nanv Oholibas. Dogãikui Hanvem Mhojeô potinim korun ghetleô ani tãnnim putank ani dhuvank zolm dilo. Tanchim nanvam dhôrun, Oholas mhollear Samaria, ani Oholibas mhollear Jerusalem.
5. Mhoji potin zaun-ui Oholas xindollki korit asli; ti aplea mogiank, xezari Assiriekarank, lobhdol'li asli.
6. Te aplea bhesachi zamblli nhesônn ghalpi senapoti, tea bhair odhikari ani unch kullieche monis; sogllech tornne ani rupest, huxar ghoddesvor.
7. Te Assiriechea tornnatteam modle ut'tom tornnatte asle; tea soglleam lagim tinnem xindollki keli ani hea aplea mogianchea kuddea ollxikonnea devam lagim ti apunnuch bhoxttouli.
8. Ejiptant ti aplê tornnê piraiê thaun dadleam lagim khattir add poddloli, ani hãnnim tichim tornnim hodd'ddim poxel'lim ani portun-portun tika êk xindôll bail koxi apnnank dhôrloli. Hi apli Ejiptant suru kel'li xindollki tinnem sôddun diunk na.
9. Tea Assiriekarank ti sarkich lobhdol'li asli dekhun, Hanvem tika aplea mogianchê adhin keli.
10. Tãnnim tika sarkich nagddi keli, tichea putank ani dhuvank dhôrlim ani torvarin ticho prann kaddlo.Tika favo tem mon'subechem formonn poddlem mhonn dusreô bailô ticheô khobrô korit asleô.
11. Oholibasan, tichê bhoinnin, hem sogllem dekhlem, tori tichi chal odik vaitt asli, ani tichi xindollki tichê bhoinnichê xindollkê poros paxtt asli.
12. Ti-i Assiriechea odhikariam ani unch kulliechea mon'xanchea mogant poddli; he nazuk-moladik vostram nhestale ani huxar ghoddesvor asle, sogllech tornnatte ani rupest.
13. Tedna ti kamchari mhonn ani dogi-I bhoinni êkê poros dusri paxtt mhonn Hanvem dekhlem.
14. Oholibas xindollkechea chiklant rombot geli; vonntincher chitarlolea dadleancher tiche dolle rokddech oddon vetale; zhogzhokit tambddea-lal rongamnim chitarlole Kaldeikar te;
15. penkttak pott'tte bandlole, ani mathear asle vichitr rongi muddaxe; pollelearuch distale Kaldeiache unch panvddeache Babiloniekar odhikari.
16. Tancher dolle ghalina fuddem ti tanchea mogant poddtali ani tankam Kaldeiant niropi dhaddtali.
17. Babiloniekar dhanvun ietale, tichê borabôr tichê mogachê khattir add poddtale ani oslê xindollken tika bhoxttaitale.
18. Bhoxttoulea uprant tichem kalliz tanchê thaun kodd sortalem. Apunn xindôll bail mhonn ti boddai sangtali ani apli vinglli kudd soglleank dakhoitali; hem sogllem polleun, zoxi Mhaka tichê bhoinnichi vitt ailoli, toxich atam Mhaka tichi-i vitt aili.
19. Ejiptant tornnê piraier apnnem xindôll bailechi chal dhôrloli ticho ugddas korun, ti odikuch xindullkek chikttun ravli.
20. Ejiptache pamprel vhoddlea lingache asle, gaddvanchea linga sarke; anddel ghoddeam bhaxen te apli jinn gosgoxit fenktale; Ejiptant ti oslea pamprelanchea mogant poddloli.
21. Ejiptant tuje chinv chirddunk ani tujim horddim poxeunk tum ditalii, tea tujea tornnattponnachea bemoriadi jivitachi tuka ozun as asli.
22. Hea pasot, Oholibasa, Hanv tuka oxem sangtam: "Jea mogiam thaun tum koddsorleai, tankam soglleank tujea ragan bhôrtolom ani sogllea vattamnim tujer akromonn korunk tankam haddtolom:
23. Babiloniekarank ani sogllea Kaldeikarank, Pekodachea, ani Shoachea ani Koachea lokank, ani tanchê borabôr sogllea Assiriekarank - he soglle tornnatte ani rupest, soglle odhikari ani unch kullieche monis, soglle ghoddesvariche nanvvoste senapoti ani sordar.
24. Ut'torê thaun, raxttram-raxttrantlim loskoram te zoma kortole ani roth ani mhalacheô gaddiô gheun ietole; ani ddhal dhôrun ani chhatichem kott'ttem ani toklechem kott'ttem ghalun, sogllea vattamnim te tujer loddai korunk lagtole. Tujer khastichem formonn marunk Hanv tankam odhikar ditolom, ani apnnank borem dista toxem tujer khastichem formonn martole.
25. Hanv Mhozo premaxecho rag tujer poddo-so kortolom, ani tankam-i Hanv aplo rag tumcher ônkunk ditolom. Te tujem nak ani tuje kan kapun uddoitole, ani tumchea bhurgeank torvarin martole; khorench, tumchea putank ani dhuvank te dhôrtole, ani urloleancho bhosm kortole.
26. Tujim vostram kaddun tuka vinglli kortole ani tujê olonkar kann ghetole.
27. Tujim burxeponnam ani Ejiptant suru kel'li xindollki Hanv kaddun uddoitolom; Ejiptkarancher tujê axeche dolle tum anink ghalchi naim. Ani tancho tum anink ugddas korchich naim.
28. Sorvespor Dev oxem sangta: Polle, zancho tum dvês dhôrtai ani zanchê thaun tujem kalliz koddsorlam, tanchea hatant Hanv tuka ghaltolom.
29. Dvesan tuka vagoitole, tuji soglli dovlôt kaddun ghetole ani tuka sarkich vinglli korun sôddtole. Oxem tuji loz-nasloli xindollki soglleank dixtti poddtoli, toxench tuzo kamchar ani sogllem tujem pozddem jivit.
30. Hem sogllem tuka kiteak ghòddtolem? Kiteak tunvem raxttram kodde xindollki keleai ani tanchea ollxikonnea devank bhôzun tum bhoxttoleai.
31. Tujê bhoinnichea panvlamnim tum cholun gelii dekhun, Hanv tujea hatant tichem xikxechem patr ghaltolom."
32. Sorvespor Dev oxem mhonnta: Tujê bhoinnichem xikxechem patr tum pietolii: Hem patr khôl ani rund; Tuka lôk hanstolo ani tujeô moskoriô kortolo, kiteak tem patr ekdom' chodd bhòrlolem asa.
33. Tem xirxiro ani ghorttann haddpachem patr, Samaria tujê bhoinnichem patr Tuka bebdi ani dolldiri kortolem.
34. Sarkem ritem zai-sôr tem tum pietolii, magir tache tum kuddke kortolii ani te gheun tujeach hodd'ddeank tum ghave kortolii. Kiteak oxem Hanv oxem sangun dovortam - uloila to Sorvespor Dev!
35. "Dekhun Sorvespor Dev oxem mhonntta: Tum Mhaka visorleai ani Mhaka tunvem patt vôll'leai dekhun, tuka-i tujea kamcharacho ani pordvarancho bhar bhògcho poddtolo." '
36. Ani Sorvesporan mhaka sanglem: 'Mon'xachea puta, Oholasachi ani Oholibasachi mon'subi korunk toiar asai mum tum? Toxem tôr, tanchim ollxikechim kortubam tanchea tonddar mar.
37. Tãnnim pordvar kela ani tanchea hatancher rogot asa: pordvar kela to aplea ollxikechea devam kodde; ani rogot varoilam tem Mhaka tãnnim zolma haddlolea bhurgeanchem - kiteak tea devank jevonn diunk hea bhurgeanchem tãnnim bolidan kelem.
38. Anink-ui tãnnim Mhaka kelem: tãnnim Mhojem Mondir bhoxttailem ani Mhoje Son'var môddle.
39. Ani jea disa tãnnim aplea kuddea devank aplea bhurgeanchem bolidan kelem, teach disa Mhojea Mondirant vochun tãnnim tem bhoxttailem. Hôi, Mhojeach Ghora bhitôr hem tãnnim kelam.
40. Tea bhair, sondexkar pattoun tãnnim poixilea ganvchea dadleank apounk dhaddle, ani he dadle aile. Tanchê pasot tumi nhaun-dhuun kaddlem, tumchea dolleank kazoll kaddlem ani tumcho xringar-olonkar ghalo;
41. Magir êkê xringarlolê khattir tumi bosleô, ani tachê fuddem ek mez manddlem. Tacher tumi dovorlo Mhojea manak zollovpacho dhump ani Mhojê sevek vaporchem zoitunanchem tel.
42. Tedna aikunk aili moriad-naslolea pongddachi bob: osadd poddlolea desant thaun haddlolea mon'xancho zomo oxi bob martalo; te bailanchea bavlleank kanknnam ghaltale ani tanchea mathear sundor mukutt.
43. Tedna Hanvem Mhojêch bhitôr chintlem: "Ti bail pordvar korun-korun sarkich bhaglea-suklea! Ani atam tichê lagim he-i xindollki kortole and ti tanchê kodde?"
44. Xindoll bailam-xim vetat têch bhaxen te tichê-xim geleat; oxench te Oholas ani Oholibas tea kamchari bailam-xim gele.
45. Pordvari ani khun kortolea bailank mon'subent khastichem formonn martat toxench, promannik monis tancher-ui mon'subent khastichem formonn martole, kiteak tãnnim pordvar kela ani tanchea hatancher vikrail'lem rogot asa."
46. "Sorvespor Dev oxem mhonntta: "Tanchi zhôddti korunk sobha bhôrun haddat ani tancher kampero sôddat ani tankam lutticho mhal zaum-di;
47. Sobhek zomloleamnim tankam fatraun marcheô ani aplea torvarimnim tanche kuddkean'-kuddke korche; tãnnim tanchea putancho ani dhuvancho jiv kaddcho ani tanchea ghorank uzo lavcho.
48. Hê bhaxen Hanv hea desacho kamchar sarkoch bhair uddoitolom, ani heram sogllea bailank tumchea kamcharachi vatt dhôrina zaunk hi êk xiddkavnni zatoli.
49. Tumcho kamchar tumcheach mathear poddtolo, ani tumchea ollxikonnea devam kodde tumi kel'lea patkancho bhar tumkam vahuncho poddtolo. Tedna Hanv Sorvespor Dev mhonn tumkam kollon ietolem." '
