1. Israelache kãi zannte mhaka bhett diunk aile; mhojê borabor te bosun asle tedna,
2. hem Sorvesporachem utor mhaka pavlem:
3. Mon'xachea puta, he monis aplea kallzant aplea kuddea devancho ugddas korit asat, ani aplea noxtteponnachem nimit-karonn aplea dolleam mukhar dovrunuch asat. Kiteak mhonn Hanv tankam Mhoji budh gheunk nirmitolom?
4. Dekhun tanchê lagim uloi ani tankam sang: "Sorvespor Dev oxem mhonntta: jim konn aplea kallzant aplea kuddea devancho ugddas korit asat ani aplea dolleam mukhar aplea noxtteponnachem nimit-karonn dovrunuch asat ani uprant provadia-xim ietat, tea Israelachea Ghoranneantlea sogllea vangddiank Mhozo, Sorvesporacho, ho zobab melltolo: zo konn Israelachea Ghoranneantlo vangddi aplea kallzant aplea kuddea devancho ugddas korit asa ani aplea dolleam mukhar aplea noxtteponnachem nimit-karonn dovrunuch asa, tea dôr-eka mon'xak Hanv, Sorvespor, tachea puskoll kuddea devank favo toslo zobab ditolom;
5. hê bhaxen, tanchea kuddea devank lagun jim Israelachea Ghoranneantlim kallzam Mhojê koddsun pois gel'lim asat, tankam soglleank portun zôddunk Mhozo iklo."
6. Mhonnttôch Israelachea Ghoranneak oxem sang: "Sorvespor Dev oxem mhonntta: Portun ieiat, tumchea kuddea devank sôddun portun ieiat, tumchea burxe ponnank patt korat;
7. kiteak Israelachea Ghoranneantlo konn-ui vangddi - vô Israelant ravpi konn-ui porko monis - Mhaka sôddun aplea kallzant aplea kuddeam devancho ugddas korit asa ani aplea noxtteponnachem nimit-karonn aplea dolleam mukhar dovrunuch asa, ani uprant provadia vorvim Mhozo prosad gheunchê khatir tachêxim veta, oslea mon'xak khud Hanv Sorvespor zobab ditolom.
8. Hanv tea mon'xak patt volltolom ani lokak xiddkaupak taka ek ixaro ani ek hanxeacho vixoi zai-so kortolom; Hanv Mhojê porjechi meklli kortolom ani tedna Hanv Sorvespor mhonn tumkam kollon ietolem.
9. Ani provadi sondex diupant fosvot tôr, Hanvench taka fosonv-so kela mhonnchem; tachê add mhojem bott dakhoitolom ani Mhojê Israel porjek tachê meklli kortolom.
10. Dogam-i zannank aplea guneanvachi xikxa poddtoli; provadiak ani prosad gheunk tachê-xim ietoleak tich xikxa.
11. Oxem Israelachem Ghorannem Mhojê thaun anink koddsorchem na, nhoi mhonn aplea khotteponnamnim tim bhoxttounchim nant; portench zalear, tim zatolim Mhoji porza, ani Hanv zatolom tancho Dev - uloita to Sorvespor Dev! " '
12. Hem Sorvesporachem utor mhaka pavlem:
13. Mon'xachea puta, Mhaka ovisvaxi zaun êk dês Mhojer patok korta mhonn somoz; tedna Hanv tacher Mhozo hat ubartam, tachem jevnna-purvonn bond kortam, tacher dukôll dhaddtam ani thoinchea mon'xancho ani mon'zatincho nas kortam.
14. Tea desant Noah, Daniel ani Jobhe teg-ui zann jiel'le zalear, te aplea promannikponna pasot fokot apnnank vanchoitole asle - uloita to Sorvespor Dev.
15. Tea desacher Hanv nixttur savzam sôddtam mhonn somoz ani tim thoinchea bhurgeancho nas kortat ani tachem ek oronnem korun sôddtat; tea oronneant savzank lagun pãi dovrunk konnuch dhir ghena.
16. Oslê poristhitint hech teg-ui monis thoim jiel'le zalear, Mhojeach jivachean - uloita to Sorvespor Dev! - apleach putak vô dhuvek te vanchounk pavche nasle; apnnankuch sôddun, aplea putank vô dhuvank porian vanchounk tanchean zaunchem naslem. Ani tancho dês osadd poddtolo aslo.
17. Tea desacher Hanv tolvar dhaddtam mhonn somoz, ani tika oso hukum' ghaltam mhonn somoz. "Tolvari, xekan'xek ho dês bhonvun kadd", thoinchea mon'xancho ani mon'zatincho nas zaunchê pasot.
18. He teg-ui monis thoim jiel'le zalear, Mhojeach jivachean - uloita to Sorvespor Dev! - apnnakuch sôddun, aplea putank vô dhuvank porian vanchounk tanchean zaunchem naslem.
19. Thoinchea mon'xancho ani mon'zatincho nas zaunchê pasot, tea desacher Hanv pidda dhaddtam ani rogot vikraun Mhozo krôdh tacher onktam mhonn somoz, ani oxem thoinchea mon'xancho ani mon'zatincho nas kortam.
20. Noah, Daniel ani Job thoim jiel'le zalear, Mhojeach jivachean - uloita to Sorvespor Dev! - te aplea promannikponna pasot fokot apnnank vanchoitole asle, punn aplea putank vô dhuvank vanchounk tanchean zaunchem naslem."
21. Sorvespor Dev oxem mhonntta: "Mhojeô char-ui bhirankull khasti - mhonngê tolvar, dukôll, savzam ani pidda - Hanv Jerusaleacher dhaddtam mhonn somoz, ani oxem thoinchea mon'xancho ani mon'zatincho nas kortam.
22. Toripunn thoim thoddim zannam vanchtolim, put ani dhuvô. Tim tumchê-xim pavtolim; tanchi chal ani tanchim kortubam polleun, Hanvem Jerusaleachem nisontton kelem mhonn ani sorv noxttam tacher dhaddlim mhonn tumchem somadhan zatolem.
23. Tanchi chal ani kortubam tumi polletoleat tedna, tim tumkam somadhan kortolim, ani Hanvem taka kelam titlem sabsubem korunk na mhonn tumkam gomun ietolem. Uloita to Sorvespor Dev!" '
