1. Sorvesporachem utor mhaka pavlem; Tannem mhollem:
2. Mon'xachea puta, sondêx ditolea Israelachea provadiam add tum sondêx di. Aplêch toklentle sondex ghoddun ditat tankam oxem sang: "Sorvespor kitem sangta tem aikat!
3. Sorvespor Dev oxem sangta: koslench dorxon gheunk na astana aplêch motintlem kaddun uloitat tea pisatt provadianchem kottakotta!
4. Israela, tuje provadi nisonttonam modem firtolea koleam sarke!
5. "Sorvesporachea Disa Israelachem Ghorannem loddaient ghôtt ravchê pasot, futt poddlea thoim vochunk tumkam kalliz na zalem ani Israelachea Ghorannea bhonvtonnim tumi durig bandun kaddlem na.
6. Tanchea dorxonank ôrthuch na, tanchim bhakitam khottim. Kiteak Sorvesporan tankam dhaddunk nant astana, te mhonnttat: "Sorvespor oxem sangta; ani tori aplim utram ghoddon ietoli mmhonn te ravtat.
7. Hanv ulounk na astana, tumi oxem mhonnttat: 'Sorvespor oxem sangta.' Mhonnttôch tumchea disnneank ôrthuch na ani tumchim bhakitam khottim mhonn sangchem nhoi?
8. "Tôr borem, Sorvespor Dev oxem mhonntta: Tumchea ôrth-naslolea utram pasot ani tumchea khottea bhakitank lagun Hanv atam tumcher virudh asam - uloita to Sorvespor Dev!.
9. Ôrth-naslolim dorxonam polletat ani khottim bhakitam kortat tea provadiam virudh Mhozo hat ubarlolo astolo; Mhojê porjechê sobhent tankam zago mellcho na, Israelachea Ghoranneachê vollerint tanchim nanvam boroun aschim nant, Israelachê zomnicher te pãi dovorche nant; ani Hanv Sorvespor Dev mhonn tankam gomun ietolem.
10. Hem sogllem tankam favo kiteak, xanti na zaun-ui, tãnnim 'Xanti!' mhonnun Mhojê porjek fottoilea. Mhoji porza ek durig sarkem kortali tedna, he monis aile ani tacher tãnnim chuno kaddlo!
11. Hea chuno kaddtoleank oxem sang: Boroch paus poddtolo, korveancho paus poddtolo, tufan uprastolem,
12. ani tem durig moddon poddtolem! Tedna lôk tumkam vichartolo: 'Tumi taka chuno kaddlolo nhoi? Atam tachem zalem kitem?
13. Borem tôr, Sorvespor Dev oxem sangta: Mhojea krodhan tufanacho varo tumcher uprasounk vetam, Mhojea ragan ghogeamnim paus ghalunk vetam, Mhojea krodhan nas korta toslo korveancho paus dhaddunk vetam,
14. ani tumi chuno kaddla tem durig Hanv môddunk vetam: tem khala xevttitolom ani tachi buniad porian Hanv ukti kortolom. Tem konsllon poddtolem ani tachea pondak tumi mortoleat. Tedna Hanv Sorvespor mhonn tumkam kollon ietolem.
15. Durgacher ani taka chuno kaddla tancher Mhozo rag thonddailea uprant, Hanv tumkam mhonnttolom: "Tem durig moddon gelem, ani toxench taka chuno kaddlolo te-i na zale!
16. He te Israelache provadi, Jerusalea vixim sondêx ditat ani, xanti na zaun-ui, taka xantichim dorxonam ghetat te. Uloita to Sorvespor Dev!"
17. Tea bhair, mon'xachea puta, aplêch toklentle sondex ghoddun ditat tea tujê porjechea bailam vatten polle; tanchê add ho sondêx di.
18. Oxem sang: "Sorvespor Dev oxem sangta: mon'xancho jiv aplea fasant sampddaunk aplea sogllea mon'gottank fitam xinvtat ani sogllê unchaiechea mon'xank ôddnniô kortat tea bailanchem kottakotta! Mhojê porjecho jiv kaddunk tumi bhonvtat, ani tumchoch jiv surokxit dovrunk sôdtat?
19. Thoddeô mutthi-bhôr zôv ani unddeache thodde kuddke apnnank mellun gheunk Mhojê porjê mukhar tumi Mhaka beman kortat; moronn favo na tankam tumi jivexim martat, ani jivim urunk favo na tankam tumi jivim dovortat, Mhojê porjek tumi fotti marit asat, kiteak fottink kan diunk tika borem dista.
20. "Borem tôr, Sorvespor Dev oxem sangta: Polleiat, tumchea fitamnim tumi dusreancho jiv kaddunk sôdtat, tôr Hanv tumchea fitam add asam, tumchea hatantlim Hanv tim ôddun kaddtolom ani oxem xikarechim suknnim zal'lê porim tumi dhôrtat te jiv Hanv soddoitolom.
21. Tumcheô ôddnniô Hanv pinzun uddoitolom ani oxem tumchea tabeantli Hanv Mhojê porjek nivartolom; hea fuddem tumchean tankam tumchea fasant dhôrunk zaunchem na. Tedna Hanv Sorvespor mhonn tumkam gomun ietolem.
22. "Promannik mon'xank bhenkddaunk Hanvem kãich korunk na astam, tankam tumi fottimnim bhem ghalam, ani, aplo jiv vanchounk pavchim nhoi mhonn, khottea mon'xank apli khotti chal sôddun dina zaunk tumi dhir dila.
23. Borem tôr, tumkam anink ôrthn aslolim dorxonam aschim nant ani tumi anink fottkirim bhakitam korchim nant, kiteak tumchea tabeantli Hanv Mhojê porjek soddoitolom. Tedna Hanv Sorvespor mhonn tumkam kollon ietolem." '
