1. Ikravea vorsa, tisrea mhoineachea poilea disa, Sorvesporachem utor mhaka pavlem; Tannem mhollem:
2. Mon'xachea puta, Faraohk, Ejiptachea razak ani tachea urponjink oxem sang:
3. "Tuji thorai konna sarki mhonn sangum? Sangtam: Lebanonacher vaddlolea devdarachê thoraiê sarki ti! Sundor tache khande, panamnim to matlolo, kupank tachem mathem pavo-sôr to unch choddla.
4. Puxkôll udok asa mhonnun to oso vaddlo, pondchea nodink lagun itlo unch to choddlo, kiteak to roil'lo tea zagear bhonvtonnim nodi vhanvtaleô, ani ranantlea zhaddank porian tache vhall pavtale.
5. Heach pasot ranantlea sorv heram ranantlea zhaddam-rukham poros tachi unchai, tache khande khub-khub zale ani sobhonvtim vistarle, kiteak thoim subham' udok vhanvtalem.
6. Mollba velim sogllim suknnim tachea khandeancher aple gonther kortalim; ranantlim sogllim savzam aplim poram tachea khandeam pondak zolma haddtalim; tachê savllek visôv ghetaleô hixôb-nasloleô porza.
7. Kitlo sundôr aslo to rukh - unchaien itlo vhôdd ani itlea lamb ani vistarlolea khandeancho. Oso to aslo kiteak tachim pallam subham' udkamnim riglolim.
8. Devachê bagent tachê sarko dusro devdar naslo, khoincheach soruak tachê osle khande nasle, khoincheach platan-zhaddak nasle tachê osle thalle, Devachê bagent khoinchoch rukh tachê sundoraiek pavonaslo.
9. Hanvem taka zaite khande diun itlo rupvont kel'lo ki, Edenant, Devachê bagent, aslolea sogllea rukhank tachi nattkai bhògtali.
10. "Hea pasot, Sorvespor Dev oxem sangta: "To rukh itlo unch vaddlo dekhun, tachem mathem kupank pavlem dekhun, ani aplê unchiek lagun to gorvan itlo bhoron ailo dekhun,
11. Hanvem taka raxttranchea fuddariachea tabeant ghalo, ani ho tachea khotteponnak favo tê bhaxen taka xikxa laitolo. Hanvem taka sôddlo.
12. Porkea lokan, raxttram modem chôdd krur asa tea lokan, taka kapun thoinsõruch sôddlo. Tache khande dongrancher ani sogllea falkeamnim poddle, ani tache thalle moddon desachea sogllea khonddamnim ximpddon poddle; desantlo sogllo lôk tachi savlli sôddun pollun gelo.
13. Tea mòddlolea rukhar mollba velim sogllim sukhnnim pennem kortat; tachea khandeancher dhanvun vetat ranantlim sogllim savzam.
14. "Mhonnttôch fuddarak khoinchench zhadd, udkam-xim lail'lem asa mhonnun, itlem unch vaddot vochum noiê, khoincheach zhaddan aplem mathem kupam porian pavoum noiê, khoinchench ximplolem zhadd kupam vatten vaddonk sôdum noiê. Kiteak heram soglleam mon'xam modem, visôr poddloleanchea fonddant purloleam modem, tim sogllim mortolinch, ani patallachê khorik pavtolim.
15. "Sorvespor Dev oxem sangta: Patallant to poddlo tea disa Hanvem dukh korunk formailem, ani prithvê-pondchea udkamnim Hanvem taka dhampun dovorlo. Tacheô nodi Hanvem addaun dovorleô ani subham' udkam sukun gelim; taka lagun Hanvem Lebanonacher kallôkh dhaddlo, ani teach pasot ranantlim sogllim zhaddam bavun-sukun gelim.
16. Visôr poddloleanchea fonddant purun Hanvem taka Patallant xevttun uddoilo: oso to poddlo tedna raxttrank Hanvem koddkoddailim. Patallachê khorint Edenachea sogllea zhaddank, Lebanonachea boreantlea-borea rukhank, subham' udkamnim ximplolea sorv rukham-zhaddank zaiti buzvônn mell'li.
17. Tim-i tachêch bhaxen torvarin marloleam modem Patallant denvun gel'lim; ani ekdam tachê savllek aslim tim raxttram modem ximpoddlim.
18. "Mhoima ani thorponn pollelear, Edenachea zhaddam-rukham modem konnak tujê kodde sôr korunk zata? Tori Edenachea zhaddam borabôr tum-i Patallachê khorint, sunôt korunk nasloleam modem, xevtton poddtoloi, ani torvarin marloleam vangdda thoinsoruch tum urtoloi. Hi vopar soglli Faraoh vixim ani tachê sogllê urponji vixim. Uloita to Sorvespor Dev!" '
