1. Sorvesporachem utor mhaka pavlem; Tannem mhollem:
2. Mon'xachea puta, oxem sang: "Israelachea desak Sorvespor Dev oxem mhonntta: Somplem! Desachea char-ui konnxank xevôtt pavlo!
3. Ho tuzo xevôtt; Hanv tujer Mhozo rag ôt'tolom, ani tujê chalik favo toxem tuji zhôddti kortolom ani sogllea tujea kanttalleanchea kortubancho tujê koddcho hixôb ghetolom.
4. Koslich doia Hanv tuka dakhouncho na, tuka sôddcho na Hanv; tujê vagnnukê pasot ani tum sôddich naim tea tumchea kanttalleanchea kortubam khatir Hanv tuka farik kortolom. Tedna Hanv Sorvespor mhonn tumkam gomon ietolem.
5. "Sorvespor Dev oxem mhonntta: Orixtta pattlean orixtt! Polle, to ieta!
6. Xevôtt lagim pavlo, tujê-xim ieta. Ho polle to ailo!
7. Hea desant ravtai nhoi tum? Tôr tujem noxib tem. Vêll pavlo, dis lagim asa, porvotancher fokot goddbôdd, khuxali-mouza korop na.
8. Ani atam aik, rokddoch Hanv tujer Mhozo krôdh otounk vetam ani oxem Mhozo rag tujer varounchi tan puraien bhagoitolom: tujê chali pormannem Hanv tuji zhôddti korunk vetam ani sogllea tujea kanttalleachea kortubam khatir Hanv tuka farik kortolom.
9. Koslich doia Hanv tuka dakhouncho na, sôddcho na Hanv tuka; tujê vagnnukê pasot ani tum sôddich naim tea tujea kanttalleanchea kortubam khatir Hanv tuka farik kortolom. Tedna tuka mar dita to Hanv Sorvespor mhonn tumkam kollon ietolem.
10. "Ho polle to dis! Ho polle to ieta! Tuji palli atam, ti pavli; danddo ful'lo, gorv ekdom' chodd vaddlam.
11. Zulum' vaddon khotteponnacho danddo zala. Tanchem kãich urchem na: tanchi vhôdd sonkia, nhoi mhonn tanchi dovlôt-girestkai, nhoi mhonn konnachich vhoddvik.
12. Vêll ieta, dis lagim pavla. Viktem ghetat tim sontosum noiê, viktat tankam khônt disum noiê, kiteak sogllea lokacher krôdh zollta.
13. Viktoleank, tim jivim aso-sôr, apnnem viklam tem portun mellchem na. Kiteak hem dorxon soglleank pavoilam astam, konnuch aplem patok sôddun dina. Sogllim aplea noxtteponnant adlêch bhaxen jietat, mon bodlunk tankam ghottai mellona.
14. Tuturi vazli, sogllem toiar zalam, punn konnuch zhuzak bhair sorona, kiteak soglleancheruch Mhozo krôdh zollon denvta.
15. "Bhailean torvar, bhitorlean zorimori ani dukôll. Jim konn kheddea-ganvamnim jietat torvarin mortolim; jim konn xarant jietat, tankam dukôll ani zorimori girastolim.
16. Ani hantlim suttot tim, falkeanchea parveam bhaxen, porvotancher pollun vetolim, ani thoinsôr ap-aplea patkam pasot sogllim pinrgun astolim.
17. Soglle hat osokt zaun gollgolltole, sogllim dhompram koddkoddtolim.
18. Bhieun kampun sogllim sakafottem ghaltolim. Soglleanchea tonddar denvtolo lojecho kallôkh, ani soglleanchim mathim boddkim zatolim.
19. Aplem rupem tim bhair rostear uddoitolim, aplem bhangar mhellem mhonn somzotolim. Sorvesporachea krodhachea disa tankam rakhunk tanchea rupeak ani bhangarak podvi na. Hea vostumnim tanchean apli bhuk marunk ani aplem pott bhôrunk zaunchem na, kiteak tankanch lagun tim patkant poddlim.
20. Aplea sundor-sobit bhangram-xingrank lagun tim boddai dakhoitalim, hannem tim apleô kanttalleacheô murti, apleô ollxikô kortalim; dekhun Hanvem heô vostu mhelleô korun tankam dileat.
21. Hanv tem porkeanchê adhin kortolom, tem tankam luttunk sôddtolom, prithumê velea sogllea poros paxtt lokak lutticho mhal korun ditolom. Te tem bhoxttaitole.
22. Tanchê vatten Hanv polleunchochna, ani tedna Mhojea bhanddarachem ghor bhoxtton vetolem ani chor zobordosten tantum rigtole ani tem bhoxttaitole.
23. "Tuka êk sankôll korun ghe, kiteak ak'kho dês vikrail'lea rogtan bhoron aila ani xar zobordosten bhòrlam.
24. Dekhun sogllea raxttram poros krur asa tea raxttrak Hanv haddtolom ani hem tanchim ghoram apnnachê adhin kortolem. Tanchea unch-unch vorgachea mon'xanchi urmottai Hanv môddun uddoitolom, ani tanchem devmondir bhoxtton vetolem.
25. Thorthoro pavta: tim xanti sôdunk bhonvtolim, punn xanti mellchich na.
26. Orixtta pattlean orixtt, sursurea pattlean sursuro; ek koslem-i disnnem gheun ie mhonnun tim provadia pattlean lagtolim; somurti vixim kitem sangchem mhonn iadnik nokllo zatolo, ani malgoddeam koddchi koslich budh mellchi na.
27. Raza dukh kortolo, kunvôr khontint buddlolo astolo, desantlea lokache hat koddkoddtole. Tanchê vagnnukek favo toxem Hanv tankam vagoitolom, ani tancheanch nirnnoiank favo toslo Hanv tankam nirnnoi ditolom. Tedna Hanv Sorvespor mhonn tankam gomon ietolem." '
