1. Sorvesporachem utor mhaka pavlem; Tannem mhollem:
2. Mon'xachea puta, fitur loka modem tum jietai; tankam dolle asat punn kãich disona, kan asat punn kednanch aikonant, kiteak tim ek fitur ghorannem.
3. Dekhun, mon'xachea puta, eka nirvaxiachem samonn ghalun tuji khattli-pottli band ani disa-uzvadda, tanchea dolleam mukhar, pordesant vochunk bhair sor. Tanchê nodrê mukhar tum ghorantlo bhair sortoloi ani anink khoim vetoloi. Tedna ghoddiê, tim fitur lôk zaun-ui, tankam somzunk melltolem.
4. Tujem saman eka nirvaxiachi khattli-pottli koxi bandtoloi, disa-uzvadda, tanchea dolleam mukhar; ani pordexi lôk veta toso, sanjê vellar, tanchea dolleam mukhar vattek lagtoloi.
5. Tanchea dolleam mukhar vonntint êk burak kôr, ani tantuntlean bhair sor.
6. Tanchea dolleam mukhar tuji khattli-pottli khandar martoloi ani bhair sorun kallokhant rigtoloi; zomin dixtti poddona toxi tujem tondd dhamptoloi, kiteak hanvem tuka Israelachea Ghoranneak êk xokun korun dovorla.'
7. Mhonnttôch mhaka sanglolem toxem hanvem kelem. Disa-uzvadda eka nirvaxitachi khattli-pottli koxi hanvem mhojem samonn bandlem; ani sanjechea vellar mhojea hatamnim hanvem vonntintlean êk burak kelo; magir, tanchea dolleam mukhar mhoji khattli-pottli khandar marun, hanv bhair sorlom ani kallokant riglom.
8. Dusrê sokallim Sorvesporachem utor mhaka pavlem; Tannem mhollem:
9. Mon'xachea puta, "Kitem kortai tum?" oxem Israelachea Ghorannean, tea fitur lokan, tujê lagim vicharunk na?
10. Tankam sang: "Sorvespor Dev oxem sangta: Hem bhakit Jerusaleant odhikar gheun aslolea kunvra vixim ani thoim ravtolea Israelachea ak'khea Ghorannea vixim."
11. Oxem-i sang: "Hanv tumkam êk khunna; zoxem hanvem kelam, toxem tankam ghòddtolem; tankam koidi korun pordesant vhortole.
12. Tancho kunvôr apli khattli-pottli kallokhant khandar martolo ani vonntintlean bhair sorun vetolo; taka bhair sorunk diunk êk burak kortolim; dês pollena zaunk to aplem tondd dhamptolo.
13. Hanv Mhojem zall tacher uddoitolom ani taka Mhojea fasant dhôrtolom; Hanv taka Babilonient vhortolom, Kaldeikaranchea desant, punn to dês to polleuncho na; ani thoim to mortolo.
14. Ani tachi seva kortolea somestank, tachê foujek ani sogllea tachea loskorank, sogllea vareanchea dixamnim Hanv ximpddaitolom ani torvar gheun Hanv tanchea pallank lagtolom.
15. Hanv tankam raxttram modem zollim-mollim ximpddaitolom ani porkea desamnim duspottaitolom tedna, Hanv Sorvespor mhonn tankam kollon ietolem.
16. Punn tanchê modlea thoddea zannank torvarichea, dukollachea ani zori-morichea ghansantlim Hanv nivartolom; oxem, jea lokam modem him pavtolim, tea lokank tim sogllea aplea kanttalleachea kortubanchi khobor sangtolim, ani oxem he-i lôk Hanv Sorvespor mhonn vollkhun ghetole." '
17. Sorvesporachem utor mhaka pavlem; Tannem mhollem:
18. Mon'xachea puta, tujem jevonn ghetana tum koddkoddtoloi ani tujem udok pietana bhirantin kamptoloi, ani desachea lokak oxem sangtoloi:
19. "Israelachea desant ozun Jerusaleant ravtoleank Sorvespor Dev oxem sangta: Aplem jevonn ghetana tim bhirantin kamptolim ani bhieun-bhieun aplem udok pietolim, kiteak thoim jietoleanchea zuluma pasot tancho ak'kho dês boddko korun sôddtole.
20. Jedna lokan bhòrlolea xaranchem nisontton zatolem ani desachi zatoli dêsvatt, tedna Hanv Sorvespor mhonn tumkam kollon ietolem." '
21. Sorvesporachem utor mhaka pavlem; Tannem mhollem:
22. Mon'xachea puta, Israelachea desant hi mhonn'nni cholta nhoi? "Dis bollanddot asat punn dorxonam pallon iech nant'. Kitem mhonnunk sôdtat tumi?"
23. Borem tôr, tankam oxem sang: "Sorvespor Dev oxem sangta: hi mhonn'nni Hanv bond kortam; ti anink kednanch Israelant aikunk ieunchi na." Portench zalear, tankam sang: "Sogllim dorxonam pallon ieunche dis pavot aile.
24. Israelachea Ghoranneant nirorthi dorxonam vô khottim bhakitam anink aschim nant,
25. kiteak Hanv, Sorvespor, uloitolom; ani jem Hanv sangtam tem veginch ghoddon ietolem; karonn jem Hanv sangtam, tem tumcheach jivitant, fitur Ghorannea, Hanv palltolom - uloita to Sorvespor Dev!" '
26. Sorvesporachem utor mhaka pavlem; Tannem mhollem:
27. Mon'xachea puta, Israelachem Ghorannem atam oxem mhonntta: "Ho monis polleta tem dorxon bhov fuddlea kallachi gozal; anink boreach vellan zatolem tê vixim to bhakit korta."
28. Borem tôr, tankam oxem sang: "Sorvespor Dev oxem sangta: Mhojim sogllim utram pallon ieunk anink kallav aschoch na. Hanvem sanglam tem atanch Hanv ghoddun haddtolom - uloita to Sorvespor Dev!" '
