1. Tedna Sorvesporachem utor mhaka pavlem; Tannem mhollem:
2. Mon'xachea puta, Jerusalea vatten vollon polle, povitr zageancher add hem utor sang, Israelachea desacher add ho sondêx di.
3. Israelachea desak oxem sang: "Sorvespor oxem mhonntta: Atam Hanv tujer virudh utthtam; Mhoji torvar poteantli bhair kaddunk vetam, ani tumchê modlim soglleank marun uddoitolom, borea toxem vaitt mon'xank.
4. Hanv borea toxench vaitt mon'xank tumchê modlim marun kaddtolom mhonnttôch, Negeba thaun ut'torê porian sogllea jivea mon'xank nattak korunk Hanv Mhoji torvar poteantli bhair kaddunk vetam.
5. Ani Hanvem, Sorvesporan, Mhoji torvar poteantli bhair kaddlea mhonn sogllea mon'xakullak gomon ietolem; ti novean poteant bhitôr vechi na."
6. Mon'xachea puta, tujem kalliz fafson gel'lê porim, pinrgot rav. Soglleank dixtti poddtai toso dukhi-khontin pinrgot rav.
7. Ani "kitea pasot pinrgotai?", oxem tim tujê lagim vichartit zalear, tankam oso zobab di: Khobrek lagun! Khobor pavchi asa! Tê khobrek lagun soglleanchim kallzam bhirantin virghon vetolim, soglleanchea hatanchem boll moddon poddtolem, sogllim niraxi zaun vetolim ani soglleanchim dhompram koddkoddtolim. Ti khobor pavta, polleiat! Ti pavli! Uloita to Sorvespor Dev!" '
8. Sorvesporachem utor mhaka pavlem; Tannem mhollem:
9. Mon'xachea puta, sondêx di ani oxem sang: "Dhoni oxem sangta: Sang: Torvar! Torvar! Tika dhar kaddlea, chokchokit kelea,
10. Maramari korunk ti pazlea, zhoglavnnea bhaxen jhigjhigunk tika chikchikit kelea
11. Hatant dhôrun cholounchi mhonnun Sorvesporan ti chikchikit kelea, maramari kortoleachea hatant ghalpak hi pazloli ani chikchikit kel'li torvar!
12. Bobô-hueli mar, mon'xachea puta; kiteak hi torvar Mhojê porjecher denvtoli ani Mhojêch porjê bhaxen morunk nemlolea Israelachea sogllea fuddariancher ti denvun ietoli.
13. Dekhun horddem boddoi boddoi, kiteak Mhojê porjechi Hanv porikxa kortam - uloita to Sorvespor!
14. Dekhun, mon'xachea puta, sondêx di, ani talliô pêtt! Ani hi torvar, maramari korunk nemloli torvar, addvi-tiddvi firoi, tin pavtti! maramari korunk dhaddloli torvar ti, bhirant ghalta tosli torvar ti, sogllea vattamnim bhenkddaita tosli torvar ti!
15. Kallzam virghon vechê khatir ani puskôll lokacho jiv kaddunk chukoina zaunk, zhoglavnnea bhaxen jhijhigit ani maramari korunk pazloli, dôr-eka darvonttear Hanvem ti maramari-korpi torvar ubi kelea.
16. Uzvean davean tuji dhar dakhoi, pazlolê torvari! Khoinchê-i vatten vollxi, tê vatten tuji dhar dakhoi!
17. Hanv-ui Mhojê vatten talliô pêtt'tolom ani Mhojea ragak dhadoxi kortolom! Hanv, Sorvespor, hem sangun dovortam!" '
18. Ani Sorvesporachem utor mhaka pavlem; Tannem mhollem:
19. Mon'xachea puta, Babiloniechea razachê torvarik vatt korunk don roste khunnaun dovor; ekach desa thaun don-ui bhair sortole. Magir marôg dakhovpachi, don hatanchi, êk patti ubar; rosto Xara vatten veta thoim ti ubarun dovor;
20. êk hat Am'mon'karanchea Rab'bas xarak pavoita ti vatt dakhoitolo, ani dusro hat Judak, kottamnim ghott kel'lea Jerusaleak, pavoita ti vatt dakhoitolo.
21. Kiteak Babiloniecho raza marog futt'tat tea nakear thartolo, ani khoinchi vatt dhôrchi ti zanno zaunk xokunantlean parkhun kaddunk sôdtolo. Oxem korunk to bann haloun sokla uddoitolo, aplea ghorabeachea devancho prosad ghetolo, ani marlolê mon'zatichem kalliz topastolo.
22. Tachea uzveak 'Jerusalem' dakhoita to sorticho bann poddtolo; to taka oxem sangtolo: hê vatten voch, kottank khavttem ghalpacheô pattiô mandd, maramari korpak hukum' ghal, zhuzachi huel mar, darvontteancher teôch pattiô sôddunk lai, matieche band ubar, choriô khonnunk lai.
23. He xokun fottkire mhonn Jerusaleantlea lokak distolem, kiteak tankam tanchea provadiamnim soput gheun oxem sanglam; tori astam Hanv tanchea khotteponnancho ugddas kortolom, ani tankam tanchea dusmananchea tabeant poddo-xim kortolom.
24. Dekhun Sorvespor Dev oxem sangta: "Tumchim khottim kortubam sobhê-mazar dixtti poddtat, tumcho guneanv soglleank tthavo, tumi kortat titlea-i kortubamnim tumchem khotteponn tumi dakhoitat; oxem tumchea khotteponnacho tumi ugddas kela; mhonnun tumchea dusmananchea tabeant tumi poddtoleat.
25. Ani tum, Israelachea khottea ani noxttea raza, Tuzo xevôtt lagim pavla, tujim khotteponnam atam somptolim.
26. Sorvespor Dev oxem sangta: Tuzo mukutt ani tuzo muddaso kadd. Adim aslem toxem kãich urchem na: khala asat tankam Hanv unch kaddunk vetam, ani unch asloleank khala uddounk vetam.
27. Ghorttann! Ghortann! Hôi, kodinch zaunk na toslem Hanv Xarachem ghorttann korunk vetam; zaka Hanv venchun kaddtolom to raza ie-sôr hem ghòddchem na; uprant Hanv razvôttki tachea hatant ghaltolom."
28. Mon'xachea puta, sondêx di ani sang: "Sorvespor Dev oxem mhonntta: Am'mon'karank Israelachi ninda kortat mhonn tankam zobab diun oxem sang: Torvar, jiv kaddunk torvar poteantli bhair kaddloli asa, girasunk ti zhogzhokit kel'li asa, zhoglannea bhaxen ti loklokta.
29. Tumchim dorxonam polkim, ani tumche prosad fottkire. Tumi khottim mon'xam mhonnun, torvar tumcheô gomttiô kapun uddoitoli. Tumcho xevôtt pavlo, tumche oprad atam somptole.
30. Torvar tichea poteant portun ghal. Tumkam rochleant tea zagear, tumchea zolmachea desant, Hanv tumchi mon'subi kortolom.
31. Tumcher Hanv Mhozo krôdh varoitolom, tumcher Mhojea ragacho svas sôddtolom ani nas korpant goll'lolea krur mon'xanchea tabeant tumkam ghaltolom.
32. Tumi uzo perounk zollôv zatoleat, tumchem rogot ak'khea desant vhanvot vetolem, tumchê pattlean konnuch tumcho anink ugddas korcho na; kiteak Hanv, Sorvespor, oxem sangun dovortam!" '
