1. Amchea pordesachea ponchvisavea vorsa, vorsachê survatek, mhoineachea dhavea disa, Jerusalem Xar dusmananchea tabeant poddlea uprant chovdavea vorsa, teach disa, Sorvesporacho hat mhojer denvlo ani Tannem mhaka ubarun vhelo.
2. Eka drixttavant Devan mhaka Israel desant pavoilo ani eka bhov unch porvotar denvoilo; tachê dokhinnek ek Xar bandlolem asa mhonn distalem.
3. Thoim Tannem mhaka vhelo; ani pitullcho kel'lo distalo toslea eka mon'xak hanvem dekhlo. Tachea hatant asli êk sonnachi dori ani zhok ghevpachi êk boddi. To darvonttear ubo aslo.
4. Tea mon'xan mhaka mhollem: 'Mon'xachea puta, tujea dolleamnim polle ani tujea kanamnim aik, ani Hanv tuka dakhoitolom tea soglleacher tujem dhean-mon lavun dovor. Kiteak hem dakhounk tuka hangasôr haddla. Tum polletai tem sogllem Israelachea Ghoranneak sangun kolloi.'
5. Ghora bhair sobhonvtim ek durig aslem, ani mon'xachea hatant zhok gheunchi tin metranchê lambaiechi êk boddi; ti boddi gheun tannem durgachem zokh ghetlem. Tachi unchai tin metranchi ani tachi dhattai tin metranchi asli.
6. Tedna udentê vatten aslolea darvonttea-xim to ailo ani tachea panvddeancher choddun tannem umbreachem zokh kaddlem. Taka tin metranchi rundai asli.
7. Dôr-eka rakhonndarachê kuddik lambaien tin metr ani rundaien tin metr asle, ani tanchê modem aslolê vonntik oddêz metranchi dhattai; ani darvontteachea umbrea thaun darvontteachea bolkanva porian tin metr.
9. Magir tannem darvontteachea bolkanvachem zokh kaddlem: chovis metr; tachea vonntinchem zokh: sô metr; darvontteachem bolkanv bhitorlea tonkak poddtalem.
10. Udentichea darvontteachê dôr-êkê vatten tin rakhonndaracheô kuddi asleô, tin-ui êkêch zokhacheô, ani tanchê modleô vonnti êkêch dhattaiecheô.
11. Ani tannem darvontteachê rundaiechem zokh ghetlem: tis metr. Darvontteachi lambai ekunnchallis metr.
12. Rakhonndaranchea kuddim mukhar tin metranchi êk mottvi vonnôt asli; ani don-ui vattamnim rakhonndarachea kuddink otthra metr asle.
13. Magir tannem êkê kuddichê pattlê vonnti thaun dusrê kuddichê pattlê vonnti porian ontôr mezun kaddli: ti saddê-bara metranchi asli. Nimannê kuddi thaun choukant vochunk vatt asli.
14. Hea choukachem tannem zokh kaddlem; tachi rundai dha metr.
15. Darvontteachê bhailê vonnti thaun nimannê kuddichê patllê vonnti porian provês-darvontteachi ak'khi lambai ponchvis metr asli.
16. Dôr-êkê kuddichê bhailê vonntik lhan-lhan dolle asle, ani toxench kuddim-modlea bhitorlea vonntink. Bolkanvant sogllea vattamnim zonelam aslim ani vonntincher khazur-madd kantoil'le asle.
17. Tea mon'xan mhaka angnnant vhelo. Thoim kuddi bandloleô asleô ani sobhonvtim êk chirebondi. Tea angnnant tis kuddi asleô.
18. Hem angonn darvontteanchea kuxink porian pavtalem ani tanchê poros sokla poddtalem. Taka Sokoilem Angonn mhonn nanv aslem. Tannem hea angnnachem zokh kaddlem,
19. Sokoilea darvonttea mukhar thaun bhitorlea angnnachea fuddea porian: pon'nas metr (udentê vatten ani ut'torê vatten).
20. Magir tea mon'xan bhailea angnnachea ut'torechea darvontteachi lambai ani rundai mezun kaddleô.
21. Tachê êk-êkê kuxik rakhonndarancheô tin kuddi asleô; tanchea vonntink ani bolkanvak poilea darvonttea itlich vhoddai asli: lambaiek ponchvis metr ani rundaiek saddê-bara.
22. Tachim zonelam, tachem bolkanv ani tanche khazur-madd udentêchea darvontteak aslim tanchê itlêch vhoddaiechim. Darvonttea-xim choddun vochunk sat panvdde asle, ani tachem bolkanv sarkem bhitôr poddtalem.
23. Bhitorlea angnnant, ut'torechea darvonttea fuddeant, udentechea darvonttea mukhar aslolea sarko êk darvontto aslo. Eka darvonttea thaun dusrea darvonttea porian asloli ontôr tea mon'xan mezun kaddli: pon'nas metr.
24. Tea mon'xan mhaka dokhinnechê vatten vhelo; thoim êk dokhinnecho darvontto aslo; tannem tachea rakhonndarachea kuddinchem, vonntinchem ani bolkanvanchem zokh kaddlem; tanchi vhoddai heram bhaxenuch asli.
25. Darvontteachê lambaiek ani bolkanvak sobhonvtim zonelam aslim, heram sarkinch zonelam; tanchi lambai ponchvis metranchi asli ani tanchi rundai saddê-bara metranchi.
26. Voir choddun vochunk sat panvdde asle; bhitorlean sarkem tonkar tachem bolkanv aslem ani tachea vonntincher khazur-madd kantoil'le asle, dôr-êkê vatten êk.
27. Hanga-i bhitorlea angnnant vochunk êk darvontto. Eka darvonttea thaun dusrea darvonttea porian asloli ontôr tea mon'xan mezun kaddli: ti pon'nas metranchi asli.
28. Tea mon'xan mhaka dokhinnechea darvontteantlean bhitorlea angnnant vhelo. Tannem darvontteachem zokh kaddlem; tachi vhoddai bhailea darvonttea itlich asli.
29. Tacheô rakhonndarancheô kuddi, vonnti ani bolkanv heram sarkich asli.
30. Hea darvontteachea kuddink-ui ani bolkanvank sobhonvtim zonelam aslim. Tanchi ak'khi lambai ponchvis metranchi asli, ani tanchi rundai saddê-bara metranchi.
31. Tanche bolkanv bhailea angnnak tenktale. Ani khazur-madd tanchea vonntincher kantoil'le asle. Ani thoim porian choddun vochunk atth panvdde asle.
32. Tea mon'xan mhaka udentechea darvontteantlean bhitorlea angnnant vhelo. Tannem darvontteachem zokh kaddlem: tachi vhoddai heram itlich.
33. Tachea rakhonndaranchea kuddinchem, bolkanvanchem ani bhitorleam vonntinchem zokh heram darvontteam itlench aslem. Sobhonvtim taka zonelam aslim ani bolkanv-ui. Tachi ak'khi lambai ponchvis metranchi asli ani tachi rundai saddê-bara metranchi.
34. Bolkanv bhailea angnnak tenktalo. Vonntincher khazur-madd kantoil'le asle. Hea darvonttea-xim choddun vochunk atth panvdde asle.
35. Tedna tea mon'xan mhaka ut'torechea darvonttea-xim vhelo. Tannem tachem zokh ghetlem ani heram itlich tachi vhoddai asli.
36. Tanchê bhaxen taka-i rakhonndarancheô kuddi asleô, nettoil'leô bhitorleô vonnti, bolkanv ani sobhonvtim zonelam. Tachi ak'khi lambai ponchvis metranchi asli, ani tachi rundai saddê-bara metranchi.
37. Tacho bolkanv bhailea angnna vatten poddtalo. Vonntincher khazur-madd kantoil'le asle. Thoim choddun vochuk atth panvdde asle.
38. Bhitorlea angnnachê kuddi lagim êk lhan kudd asli; angnnachea bolkanva vatten tachem dar aslem. Thoim hôm' korun bhettovpacheô mon'zati dhutale.
39. Hea bolkanvant char mezam aslim, tê kuddichê êk-êkê vatten don mezam. Hea mezancher te bolidanancheô mon'zati martale, zaum tancho hôm' korunk, zaum patkam khatir tim somorpunk, zaum farikponnachim bolidam koxim tim bhetttounk.
40. Bhailean, ut'torêchea darvontteachea provesa lagim, don mezam aslim; ani, dusrê vatten, darvontteachea bolkanva lagim, anink don mezam.
41. Mhonnttôch, bolidan korun bhettouncheô mon'zati marunk sogllim mellun atth mezam aslim: char bhitôr kuddint, ani char bhair angnnant.
42. Tê bhailê kuddint aslolea char mezancher hôm' korun bhettovpacheô mon'zati toiar kortale. Him mezam taslolea fatrachim aslim. Tanchi unchai pon'nas xentimetranchi, ani voilean tim poncheastôr (75) sentimetranchim chovkonnim aslim. Mon'zatinchem bolidan korunk gorjechim sogllim autam hea mezancher dovorlolim aslim.
43. Voilea fatra bhonvtonnim bosoil'lim aslim saddê-sat xentimetranchim govetam. Hea mezancher bolidan korun bhettovpachem mon'zatinchem sogllem mas dovorlolem aslem.
44. Tedna tea mon'xan mhaka bhitorlea angnnant vhelo; tea bhitorlea angnnant don kuddi asleô, êk ut'torechea darvonttea vatten punn dokhinnek fuddo korun, dusri Dokhinnechea darvonttea vatten punn ut'torek fuddo korun.
45. Dokhinnek fuddo korun asli ti kudd Dev-mondirachi seva korunk nemlolea iadnikam khatir;
46. ani ut'torek fuddo korun asloli kudd vedichi seva korunk nemlolea iadnikam khatir. He iadnik Zadokache put, ani te zalear Sorvesporachi seva korunk Tachê mukhar vochunk rojia aslole Leviche put.
47. Tea mon'xan bhitorlea angnnachem zokh kadlem: tem choukonnem aslem, lambaien pon'nas metranchem ani rundaien-ui pon'nas metranchem. Thoim Devmondira mukhar vedi ubi asli.
48. Tedna tannem mhaka Devmondirachê devddent vhelo ani don-ui vattamnim aslolea tichea khambeanchem zokh kaddlem: tankam oddêz metr asle. Provesachi rundai dêdd metranchi asli.
49. Devddek asli dha metranchi rundai ani sôvmetranchi lambai. Thoim choddun vochunk dha panvdde asle; provesachê dôr-êkê vatten don khambe asle.
