1. Sorvesporachem utor mhaka oxem pavlem:
2. Mon'xachea puta, Israelachea porvotam vatten tujem tondd vôll ani tanchê virudh bhakit kôr; oxem sang: "Israelachea porvotamnô, Sorvesporachem utor aikat! Porvotank, dongrank, khonnink ani falkeank Sorvespor Dev oxem mhonntta: Hanv tumcher add torsad upzo-xi kortolom and tumchea unch svatancho nas kortolom.
4. Tumchea vedinchem nisontton zatolem ani tumche povitr khambe moddon poddtole; ani tumchea jivexim marloleank tumchea kanttalleachea kuddea devam mukhar Hanv khala xevttitolom.
5. Ani Israelachea putam-dhuvanchim moddim tanchea kanttalleachea kuddea devam mukhar Hanv ghaltolom.
6. Tumi ravtat thoim, tumchea nogranchem nisontton zatolem, ani tumchea unchlea zageancho nas zatolo. Hê porim tumchea vedinchem zatolem nisontton ani nas, tumchea kanttalleachea kuddea devancho zatolo churo ani vidvas, tumchea povitr khambeanche kuddkean'-kuddke korun sôddtole ani tumchea hatancho vavr nanch zatolo.
7. Jivexim marlolim tumchê modem poddtolim tedna, Hanv Sorvespor mhonn tumkam kollon ietolem.
8. "Tori tumchê bhitorlea thoddea zannank Hanv jivim dovortolom; Hanv tumkam desam-desamnim ximpddaitolom tedna, him torsadin raxttram modem poddchim nant;
9. ani tankam koidi korun vhortolim tea raxttram modem torvarin morunk nant tim Mhozo ugddas kortolim; thoim, pordvari kallzan Mhaka tãnnim sôddlo mhonnun, kitlem mhonn Mhojench Kalliz chirddon gelam, hem tanchea monant ietolem. Aplea kanttalleanchea kortubamnim vaitt kelam titlea-i pasot tankam apnnanchoch kanttallo ietolo.
10. Tedna Hanv Sorvespor mhonn tankam kollon ietolem; tancher him noxttam dhaddtolom mhonn Hanvem dhomkavnni dil'li tedna Hanv nirfollim uloinaslom."
11. Sorvespor Dev oxem sangta: "Talliô pêttat, tumche pãi apttat, ani mhonnat: Israelachea Ghoranneachea sogllea kanttalleachea patkam pasot kottakotta amchem! Kiteak tim torvarin, bhuken ani piddê-xidden morun poddtolim.
12. Pois asat tim piddê-xidden mortolim; lagim asat tim torvarin khala poddtolim; ani ozun jivim astit tim ani vanchon urtit tim bhuken mortolim. Hê bhaxen Hanv tancher Mhozo krôdh ôt'tolom.
13. Ani jedna tanchim moddim kapakapi korun khala poddtolim tanchea kanttalleanchea kuddea devam modem, tanchea vedim bhonvtonnim, sogllea unch dongrancher, sogllea porvotanchê tenkxer, sogllea hirvea zhaddam pondak, sogllea panamnim matlolea devdaram pondak, ani zoim-zoim tim tanchea sorv kuddea devank man'pacho domdom' bhettoitat, tedna Hanv Sorvespor mhonn tankam kollon ietolem.
14. Mhozo hat tancher ubartolom ani tancho dês, mhonngê Riblasachea oronnea thaun tim vosti korun asat te soglle ganv, êk rito padd ganv kortolom, ani tedna Hanv Sorvespor mhonn tankam kollon ietolem." '
