1. "Sorvespor Dev oxem mhonntta: 'Bhitorlea angnnant pavoita to darvontto kamache sô dis dhampun dovorcho. Punn Son'vara disa ani Amashechea disa to ugôddcho.
2. Kunvôr bhailea darvontteachea bolkanvantlean provês kortolo ani darvontteachea khambeam lagim ubo ravtolo. Tedna iadnik tache hom' ani tachem xantichem bolidan bhettoitole. Darvontteachea umbrear to saxttangim poddtolo ani magir novean bhair vetolo. Sanz zai-sôr darvontto dhampcho nhoi.
3. Dôr-eka Son'vara ani dôr-êkê Amashechea disa desacho sogllo lôk darvonttea mukhar Sorvesporak bhôzunk saxttangim poddtolo.
4. "Son'vara disa kunvran Sorvesporak hancho hôm' korun bhettouncho: khôdd-naslole sô menddurle ani khôdd-naslolo êk menddro;
5. ek-eka menddrea pattlean orovachea eka efachem orponn tannem korchem, ani menddurleam pattlean apnnak zai toslem tannem orponn korchem, ani ek-eka efa pattlean telacho êk hin.
6. Amashechea disa khôdd-naslolo êk paddkulo, khôdd-naslole sô menddurle ani khôdd-naslolo êk menddro, hanchem tannem orponn korchem.
7. Tedna ek-eka boila pattlean orovacho êk efa ani dôr-eka menddrea pattlean êk efa, ani menddurleam pattlean apnnak zai tem, ani dôr-eka efa pattlean telacho êk hin, hanchem tannem orponn korchem.
8. "Bhitôr veta tedna, kunvôr darvontteachea bolkanvantlean provês kortolo, ani têch vatten bhair sortolo.
9. Desantlo lôk dobajik utsovanchea somoiar Sorvesporachea fuddeant veta tedna, saxttangim poddunk ut'torechea darvontteantlean aileant tim dokhinnechea darvontteantlean bhair sortolim; ani dokhinnechea darvontteantlean aileant tim ut'torechea darvontteantlean bhair sortolim. Konnuch apunn bhitôr sorleant teach darvontteantlean bhair sorunk portun ieunchim nant, punn tanchê mukhar aslolea darvontteantlean tim bhair sortolim.
10. Kunvôr loka sangatim astolo, tanchê borabôr bhitôr sortolo ani tanchêch borabôr bhair sortolo.
11. "Porbanchea ani utsovanchea disamnim dôr-eka boila pattlean orovacho êk efa ani toxench dôr-eka menddrea pattlean êk efa, ani menddurleam pattlean ek-eklean apnnak zai tem, ani ek-eka efa pattlean telacho êk hin, hanchem lokan orponn korchem.
12. "Jedna kunvôr aplêch khuxen hom' vô xantichem bolidan bhettounk sôdta, udentecho darvontto taka ugddun diuncho; ani Son'vara disa korta toxench, aplea homanchem ani aplea xantichea bolidanachem to orponn kortolo; ani to bhair sorlea uprant tachê pattlean darvontto dhampcho.
13. "Dôr-eka disa Sorvesporak tannem khôdd-naslolo eka vorsacho êk mendurlo bhettoun diuncho: tannem hem somorponn dôr-sokallim korchem.
14. Tea bhair, pittachea efacho êk sovo vantto, ani pittak misllun ghal-pacho, telacho eka hinacho tisro vantto, hanchem tannem orponn korchem. Hem Sorvesporak korpachem somorponn sodam togpachea hukuman thir kel'lem mhonn dhôrchem.
15. Menddurlo, orovachem orponn ani zoitunanchem tel dôr-sokallim bhettoun diunchim sodam-sorvodam.
16. "Sorvespor Dev oxem mhonntta: Kunvôr aplea daizacho êk vantto dan koxem aplea putam modlea ekleak diit zalear, tem dan putanchea dhoniponna khal astolem ani putanchem daiz mhonn urtolem.
17. Punn kunvôr aplea daizacho vantto eka aplea gulamak diit zalear, to vantto gulamachea hatant astolo, punn suttkechem voros pavta tedna to portun kunvrachea hatant poddtolo. Kiteak tachem daiz fokot tachea putanchem.
18. Kunvran lokachea daizacho êk lhan porian kuddko kann gheuncho nhoi ani oxi tanchea astêmalachi chori korchi nhoi. Tannem aplea putank fokot apleach astêmalantlem daiz dovorchem, oxem Mhojê porjechea konnacheach astemalantlo kuddko porian to chorun kaddcho na." '
19. Devmondirant iadnikam khatir kherit kuddi dovorloleô asat, tantum bhitôr sorunk ut'torechea darvontteantlean vochunk zai; hea darvontteachê kuxik aslolea provesantlean tea mon'xan mhaka vhelo. Thoim, ostomtê vatten, amchê mukhar êk svat asli.
20. Tannem mhaka mhollem: 'Hea zagear iadnikamnim patkam khatir bhettovpachea bolidanak ani farikponnachea bolidanak marlolea mon'zatinchem mas xizounchem, ani orovachim orponnam bhazchim; oxem povitr zal'lem kãich bhailea angnnant te vhorche nant, kiteak, na zalear, lokak vaittak poddot.'
21. Tedna tannem mhaka bhailea angnnant vhelo ani tachea char-ui konnxeam-xim pavoilo; hea bhailea angnnachea ek-eka konnxeak ek odik lhan angonn aslem;
22. dusrea utramnim, angnnachea char-ui konnxeamnim char odik lhan angnnam aslim: ek-ek vis metr lamb ani pondra metr rund; char-ui têch vhoddaiechim.
23. Dôr-eka bhonvtim ek durig aslem, ani durgak tenkun xekan'xek chuli asleô.
24. Tannem mhollem: 'Lôk bhettoita tim bolidanam Devmondirachea sevokamnim randun kaddpak heô chuli kel'leô asat.'
