1. Tannem mhaka mhollem: 'Mon'xachea puta, tujea pãiancher ubo rav; tujê lagim Hanv ulounk sôdtam.'
2. Ani To mhojê lagim uloita astana, Sorvesporacho Atmo mhojê bhitôr ieun riglo. Tannem mhaka mhojea pãiancher ubo kelo ani to mhojê lagim uloitalo tem hanvem aikolem.
3. Tannem mhaka mhollem: 'Mon'xachea puta, Hanv tuka Israelkaram thaim dhaddtam; fituri korun tim Mhojer kolpoleant. Tanchea purvozamnim kel'lem toxench, tãnnim aiz meren Mhojer add kutt kelea.
4. Tancheô put-dhuvô apleach vadeacheô ani darunn kallzacheô zaleat dekhun, tanchê-xim Hanv tuka dhaddtam. Tum tankam mhonnttoloi: "Sorvespor Dev oxem sangta."
5. Tim aikum vô na aikum, tanchê modem êk provadi aslo mhonn tankam gomun ietolem.
6. Ani tum, mon'xachea puta, tanchi ani tanchea utranchi bhirant dhôrum naka. Kantteam-kuntteam modem asun-ui ani vichvancher boslolo asun-ui, tum bhieum naka. Tanchea utrank bhieum naka, tanchim tonddam polleun akantum naka, kiteak tim ek fituranchem Ghorannem.
7. Tim aikum vô na aikum, tum Mhojim utram tankam sangtoloi. Tim ek fituranchem Ghoranne mmhonn ugddas dhôr.
8. Punn tum, mon'xachea puta, Hanv tuka sangtam tem aikun ghe. Tea fitur Ghorannea porim tum fitur zaum naka. Tujem tondd ugôdd ani Hanv tuka ditam tem kha.'
9. Ani hanvem mhojea dolleamnim polle zalear, mhojê vatten patllail'lo êk hat aslo, ani to êk kovllo dhôrun aslo.
10. Mhojê mukhar Tannem to usoilo; tachê fuddlean ani pattlean boroil'lem aslem; ani tacher boroil'lem aslem tem oxem: 'vilap, mornnagitam ani pinr-gonni.'
