1. Sorvesporachem utor mhaka pavlem. Tannem oxem mhollem:
2. Purvozamnim tornneô dakô kheleô ani bhurgeanche dant xinnxinnle': hi mhonn'nni Israelachea desant bogor-bogor kiteak uchartat tumi?
3. Mhojeach jivachean - uloita to Sorvespor Dev! - Israelant hi mhonn'nni anink kednanch tumi ucharchim nant.
4. Polleiat, soglle jiv Mhoje; bapaicho jiv ani putacho jiv, he don-ui Mhoje. Patok korta toch mortolo.
5. Konn-êk monis promannik zalear,
6. to kaide pallta ani niti pormannem cholta; to dongrancher vochun jevina ani Israelachea Ghoranneachea kuddea devank to aple dolle ubarina; to aplea peleachê potinik pordvar korunk ôddina vô mhoineachem zal'lê bailê-xim vochona;
7. to konnakuch zulum' korina, gahann dovorlolem tem portun dita, konnachem chorun kaddina, bhukel'leak aplench jevonn dita, vinglleak nhesunk-pangrunk dita;
8. to uxnnem dita punn labh ghena, rinnacher veaz magina, vaitt korina, mon'xam modem sarki nit korun dita,
9. Mhojea kaideam pormannem cholta ani khorea monan Mhojea adniank pallo dita. Oslo monis dubavavinn promannik ani jivo urtoloch.
10. Punn eka mon'xak êk zobordosti korpi ani rogot varovpi put asot zalear ani ho put oslem ek kortub korit zalear,
11. (bapui apunn oslim kortubam korina zalear-ui) mhonngê to put dograncher vochun jevunk fattim sorona, aplea peleachê potinik pordvar korunk ôddun vhorta,
12. goribank ani gorjevontank zulum' korta, chorun kaddta, gahann ghetlolem portun dita, kuddea devank dolle ubarta, kanttalleachim kortubam korta,
13. uxnnem diun labh gheta, rinnacher veaz magta - oxem zalear, oslo monis kodinch jivo urcho na; him sogllim khotteponnam kelea uprant to mortoloch, ani tachem rogot taka buztolem.
14. Punn portench, tea mon'xak êk put asot ani ho bapain kel'lim sogllim patkam polleun-ui, tachi vatt dhôrina,
15. dongrancher vochun jevina, Israelachea kuddea devank aple dolle ubarina, aplea peleachê potinik pordvar korunk oddun vhorona,
16. konnakuch zulum' korina, gahann gheich na, konnachem chorun kaddina, bhukel'leank aplench jevonn dita, vinglleank nhesunk pangrunk dita,
17. kosleach khotteponnak aplo hat laina, uxnnem diun labh ghena, rinnacher veaz magina, Mhojea kaideam pormannem cholta ani khorea monan Mhojea adniank pallo dita - oxem zalear, aplea bapaichea patkam pasot to morcho na; to jivo urtoloch.
18. Punn tacho bapui zalear, to zulum' kortalo, dusreanchem chorun kaddtalo ani aplea loka modem borem kitench korinaslo dekhun, to aplea guneanvant mortolo.
19. Tori tumi mhonnttat: "Kitea pasot bapaicho guneanv putacher poddo-na?" Put Somurt pallun aila ani promannikponnan cholta zalear, soglle Mhoje kaide pallun aila ani tanchê pormannem to vagla tôr, to jivo urtoloch.
20. Jea mon'xan patok kelam, taka moronn favo zata; bapaicho guneanv putacher poddcho na, ani putacho guneanv bapaicher poddcho na. Promannik mon'xachem promannikponn tachench zatolem, ani noxttea mon'xachem noxtteponn tachench.
21. Punn noxtto monis apnnem kel'lea sogllea patkank patt korit zalear, Mhoje kaide samballit ani Somurt pallit ani promannikponnan cholot tôr, to jivo urtoloch: to morcho na.
22. Hea fuddem tannem kel'lea patkancho Hanv hixôb gheuncho na; tachea borea kornniam pasot to jivo urtoloch.
23. Noxtto monis morun gelo zalear, Mhaka sontôs bhògta mhonn dista tumkam? - uloita to Sorvespor Dev! - Kednanch na! aplem noxtteponn sôddun diun to jivo urlo zalear ki Mhaka odik sontôs bhògta!
24. Punn promannik monis promannik-ponnachi vatt sôddun dita ani khottea mon'xancheô kanttalleacheô chali dhôrun vaitt tem korta zalear, to jivo urtolo? Sogllea tachea adlea promannikponnan kel'lea kamancho anink ugddas urcho na; to ovisvaxi zala ani oxem patok kelam dekhun, to mortoloch.
25. Punn tumi sangtat: "Sorvespor korta tem sarkem nhoi." Israelachea Ghorannea, Mhojem aikat: Hanv kortam tem sarkem na mhonn dista tumkam? Vô portench tumi kortat tem ki sarkem na mhonnchem?
26. Jedna promannik monis promannikponnachi vatt sôddun dita ani vaitt tem korta ani oso morta, tannem kel'lea vaitta pasot to morta.
27. Toxench, jedna khotto monis khotteponnachi vatt sôddun dita ani Mhoje kaide pallunk lagta ani promannik-ponnan cholta, tedna to aploch jiv vanchoun dovorta.
28. Apnnem adim kel'lea patkank patt korunk tannem vinchun kaddlem mhonnttôch, to jivo urtoloch: to morcho na.
29. Tori astana Israelachem Ghorannem oxem sangta: 'Sorvespor korta tem sarkem na.' Israelachea Ghorannea, Hanv kortam tem sarkem na? Portench zalear, tumi kortat tem ki sarkem na, oxem mhonnchem nhoi?
30. Hea pasot, Israelachea Ghorannea, tumchê modlea ek-ekleachi ap-aplea kornniam pormannem Hanv zhôddti kortolom - uloita to Sorvespor Dev! - Tumchem jivit bôdlat, tumchea sogllea khotteponnank patt korat, tankam lagun koslêch torecho guneanv tumkam ascho nhoi.
31. Tumi keleant tim sogllim patkam zhaddun uddoiat, tumkam ek novem kalliz ani ek novem mon zôddun gheiat! Kiteak mhonn tumi morunk sôdtat, Israelachea Ghorannea?
32. Konnacheach mornnan Mhaka sontôs bhogona - uloita to Sorvespor Dev! - dekhun jivit bôdlat ani jivim urat.'
