1. Tea mon'xan mhaka Dev-mondirachê udentek aslolea bhailea darvonttea-xim portun vhelo. Darvontto dhamplolo aslo,
2. ani Sorvesporan mhaka mhollem: 'Ho darvontto dhamploloch urtolo, ani tumi to kodinch ugddunk favo na. Konnakuch to darvontto ugddunk vô tea darvontteantlean vochunk hôk'k na, kiteak Hanv, Sorvespor, Israelacho Dev, tea darvontteantlean bhitôr sorlam. To dhamploloch urunk zai.
3. Tori razkunvrak mat thoim bosun Mhojê mukhar aplem jevonn korunk rojia asa. To darvontteachea bolkanvantlean bhitôr sortolo ani bhair sortolo.'
4. Magir tea mon'xan ut'torechea darvontteantlean Devmondirachea fuddeant mhaka vhelo. Tedna polle zalear, Devmondir Sorvesporachê mhoimechea loklokan bhòrlolo hanvem dekhlo. Hanv saxttangim poddlom
5. ani Sorvesporan mhaka mhollem: 'Mon'xachea puta, chit di, chotraien polle ani Hanv sangtolom taka kan di. Dev-mondirache nem' ani kaide konn te tuka sangunk vetam. Konnam-konnank Devmondirant bhitôr vochunk rojia asa ani konnam-konnank rojia na tem chitan aik.
6. Tea Israelachea fitur putam-dhuvank oxem sang: "Sorvespor Dev oxem sangta: Israelachea Ghorannea, tumi kanttalleachim kortubam korun sarkinch ximam bhair pavleant:
7. bolidan korun bhettoil'lea mon'zatinchi chorôb ani rogot vôptana, sunôt korunk naslolea porkeank, Mhojeô adnia pallinant tosleank, Dev-mondirant bhitôr kaddun, tumi Mhojem Ghor bhoxttailem. Oxem tumchea ollxikonneam kortubamnim tumi Mhozo korar môddlo.
8. Mhojea povitr vostunchi favo tê ritin seva korchê svater, tumi porkeank Mhojê sevechi zutti dili.
9. Sorvespor Dev oxem mhonntta: Khoinchoch porko monis, sunôt korunk naslolo, ani Mhojeô adnia pallina toslo, Mhojea Devmondirant provês korcho na.
10. "Sorvesporan mhaka mhollem: 'Israelachea Ghorannea borabôr Mhaka sôddlo ani kuddea devank bhôzle tea Levitank Hanv hea tanchea patkachi xikxa laitam:
11. darvontte rakhun ani Devmondirachim kamam korun tanchean Dev-mondirant Mhoji seva korum-ieta. Homa ani heram bolidanam khatir bhettoil'lea mon'zatincho te jiv kaddtole, ani lokachi seva koruk sodam toiar astole.
12. Punn kuddea devank bhôzunk te lokachê sevek toiar asle, ani Israelachea Ghoranneak tãnnim patkant ghalem, dekhun tanchê virudh Hanv Mhozo hat ubartam - uloita to Sorvespor Dev! - Tanchea guneanvachi tankam xikxa poddtoli.
13. Iadnik koxe te Mhoji seva korche nant, nhoi mhonn Mhaka sonvskarlolê koslêch vostu sorxim te veche nant, nhoi mhonn Gabhareant provês korche nant. Tãnnim kel'lea kanttalleachea kortubam khatir hi tankam xikxa.
14. Toripunn Devmondirant korpachim kamam ani thoim korpachê sevechi zobabdari Hanv tanchea hatant ghaltolom.
15. "Sorvespora Devan oxem mhollem: 'Israelacheô put-dhuvô Mhaka patt korun pois geleô tedna Mhojea Devmondirant visvaxiponnan seva korit ravle te iadnik, Levichea kullantle, Zadokache put, Mhoji seva korit astole; te Mhojea fuddeant ietole ani mon'zatichi chorôb ani rogot Mhaka bhettoitole - uloita to Sorvespor Dev!
16. Te Mhojea Povir-Sthanant bhitôr sortole, vedi sorxem Mhoji seva kortole ani Devmondirant soglli Mhoji seva samballtole.
17. Devmondirachea bhitorlea angnnant te bhitôr sortat tedna, tãnnim sonni vostram ghalchim, ani bhitorlea angnnachea darvonttea bhitôr ani Dev-mondirant seva kortat tedna, tãnnim lhonvechem koslench vostr ghalchem nhoi.
18. Oxem Tãnnim sonni topiô mathear ghalcheô ani angar sonni vostram ghalchim; tankam gham' haddta toslo tãnnim penkttak kosloch pott'tto bandcho nhoi.
19. Lôk asa thoim bhailea angnnat vechê adim, tãnnim poilim sevadhormak ghal'lim vostram kaddchim ani Povitr Zageachea kuddimnim tim dovorchim. Lokak povitr vostram-nim koslench vaitt zaina zaunk, tãnnim dusrim vostram ghalchim.
20. Tãnnim aplim mathim taschim nhoi, nhoi mhonn kens lamb sôddche nhoi, punn tãnnim aple kens moriadin samballche.
21. Bhitorlea angnnant provês korchê adim, iadnikamnim soro pieunchoch nhoi.
22. Vidvê lagim vô logn-môddnnem korun sôddlolê bailê lagim khoinchoch iadnik logn zauncho nhoi. Te fokot êkê Israel lokachê ankvar dhuvê kodde vô dusrea iadnikachê vidva zal'lê bailê kodde logn zaunche.
23. "Mhojea lokak povitr ani opovitr vostum modem, toxench xud'dh ani oxud'dh vostum modem ontôr asa ti iadnikamnim lokak xikounchi.
24. Loka modem vad uprasta tedna, iadnikamnim neai korcho; punn tancho neai Mhojea nirnnoiam pormannem zauncho; soglle Mhoje utsov Mhojea kaideam ani formavnniam pormannem tãnnim samballche, ani Mhoje Son'var povitr dis mhonn pallche.
25. "Bapui vô avoi, dhuv vô put, bhavvô logn zaunk-nasloli bhoinn, hankam sôddun, mel'lea mon'xachê kuddik hat lavun konn-êk iadnik mhello zaum noiê.
26. To novean xud'dh zalea uprant, sat dis tannem ravchem,
27. ani tedna Dev-mondirachea bhitorlea angnant vochun tannem aplê xud'dhavnnê khatir êk iôdn bhettouncho, ani oxem novean tachean Devmondirant seva korunk zatolem. Uloita to Sorvespor Dev!
28. "Tankam daiz asum noiê; Hanv Hanvuch tanchem daiz zatolom. Israelant tankam bapaichea daizacho vantto ascho na; Hanv Hanvuch tancho bapai-chea daizacho vantto zatolom.
29. Tanchem jevonn-khann mhollear, orovacheô bhettovnniô, patkam khatir kel'lim bolidanam, ani farikponnachim bolidanam; ani jem kitem Israelant Mhaka angovnn korun bhettoitat, tem tanchem zatolem.
30. Sogllea prothom' follantlim boreantlim borim ani Mhaka bhettoitat tea sogttantlim boreantlim borim danam iadnikanchim zatolim. Undde bhaztat titlê-i pavtti, poilo unddo iadnikank diuncho, ani oxen Mhozo axirvad tumchea ghorancher astolo.
31. Apxim mel'lea vô dusrê mon'zatin marlolea suknneachem vô mon'zatichem mas iadnikamnim khaunchem nhoi." '
