1. Satvea vorsa, panchvea mhoineachea dhavea disa, Israelache kãi zannte Sorvesporacho prosad magunk aile ani mhojê sangatim bosle.
2. Tedna Sorvesporachem utor mhaka pavlem; Tannem mhollem:
3. Mon'xachea puta, Israelachea zanntteam lagim uloi. Tankam oxem mhonn: "Sorvespor Dev oxem sangta: Mhozo prosad gheunk tumi aileat? Mhojea jivachean - uloita to Sorvespor Dev! - Mhozo prosad gheunk tumkam diuncho na."
4. Tanchi mon'subi korunk toiar asai tum? Mon'xachea puta, tanchi mon'subi kortoloi tum? Tanchea purvozanchim kanttalleachim kortubam tanchea tonddar mar.
5. Tankam sang: "Sorvespor Dev oxem sangta: Hanvem Israelak vinchun kaddlo tea disa, Jakobachea Ghoranneak Hanvem soput dilo tedna Hanvem tankam Ejiptachea desant Mhoji vollokh korun dili. Tea disa Hanvem soput gheun tankam mhollem: Hanv Sorvespor, tumcho Dev.
6. Tumkam Hanv Ejiptantlim bhair kaddtolom ani Hanvench sôdun kaddlolea, dudacheô ani mhonvacheô nodi vhanvtat toslea, sogllea modem mannkulea desant, tumkam pavoitolom, oxem tea disa soput gheun Hanvem tankam bhas dili.
7. Tedna Hanvem tankam oxem mhollem: Tumkam bhuloitat tea sogllea kanttalleachea kuddea devank tumchê modlea ek-eklean sôddun diunche, Ejiptachea kuddea devank bhôzun tumich bhoxttom nakat; Hanv Sorvespor, tumcho Dev.
8. Punn tim Mhojer add kolpolim ani Mhojem aikunk kobul na zalim. Tanchê modlea eklean porian tankam bhuloitale tea kanttalleachea kuddea devank sôddun diunk nant, Ejiptachea ollxikonnea devank patt korunk na. Tedna Hanvem mhollem: Mhozo zollto rag Hanv tancher poddo-so kortolom, Ejiptant tancher add Mhojea ragak zai tem korunk ditolom.
9. Punn oxem Hanvem korunk na, kiteak toxem kel'lem zalear Mhojeach Nanva-chi ixim' buddon vetoli asli; karonn tim jietalim tea raxttram modem Hanvem tankam Mhoji vollokh korun dil'li ani tankam Ejiptantlim bhair kaddtolo mmhonn Hanvem sanglolem.
10. "Oxem astam, Hanvem tankam Ejiptantlim bhair kaddlim and oronneant tankam vhelim.
11. Tankam Hanvem Mhoje kaide dile ani Mhoje nirnnoi kollit kele; he pallun tankam jivit melltolem aslem.
12. Ani Mhojê ani tanchê modem kel'lea korarachi êk khunna koxi, tankam Hanvem Mhoje Son'var-ui sthapun dile; oxem tim Hanv Sorvespor mhonn ani tankam Mhojê sevek kuxin kaddun dovortam mhonn tankam kollon ieunchem aslem.
13. Punn Israelachem Ghorannem oronneant Mhojer kolpolem; Mhojea kaideanchea margan tim cholunk nant; Mhoje nirnnoi tãnnim manun ghetlole zalear tankam jivit mellpachem aslem, punn Mhojea nirnnoian-chi tãnnim beporva keli; toxench tãnnim Mhoje Son'var sarkech bhoxttaile. Tedna Hanvem mhollem: oronneant tancher Hanv Mhozo zollto rag varoitolom ani oso tancho nas kortolom.
14. Punn oxem Hanvem korunk na kiteak oxem kel'lem zalear, jea raxttramnim Hanvem tankam Ejiptantlim bhair kaddlolim, tea raxttram modem Mhojea Nanvach iixim' buddon vetoli asli.
15. Oxem astam, oronneant soput gheun Hanvem tankam sanglem: tumkam dil'lea desant, dudacheô ani mhonvacheô nodi vhanvtat toslea, sogllea desam modem mannkulea desant Hanv tumkam pavouncho na.
16. Kiteak mhollear tumi Mhojea nirnnoianchi beporva keli, Mhojea kaideanchea margan tumi cholunk nant, Mhoje Son'var tumi bhoxttaile, ani tumchim kallzam kuddea devank chikttun dovorlim.
17. Tori astam Hanvem tanchi doia keli; tancho Hanvem nas korunk na, ani oronneant tankam Hanvem nattak korunk na.
18. "Tanchea putam-dhuvank oronneant Hanvem sanglem: tumchea purvozanchea kaideanchea margan cholum nakat, ani tanche nirnnoi pakllum nakat; tanchea ollxikonnea kuddea devank bhôzun tumich bhoxttom nakat.
19. Hanv Sorvespor, tumcho Dev. Mhojea kaideanchea margan cholat, Mhoje nirnnoi manun gheiat ani te pallat.
20. Mhoje Son'var povitr dis koxe samballat; Mhojê ani tumchê modem kel'lea korarachi te êk khunna zatole; oxem Hanv Sorvespor tumcho Dev mhonn tumi dakhoitoleat.
21. Punn tancheô put-dhuvô Mhojer kolpoleô, Mhojea kaideanchea margan tim cholunk nant, Mhoje nirnnoi tãnnim manun gheunk nant ani pallunk nant; khoinchea-i mon'xan he tôr pall'lole, te taka jivit ditole asle. Tedna tancher Mhozo zollto rag varounk ani Mhojea ragak oronneant tancher add zai tem korunk diunk Hanvem tharailem.
22. Punn oxem Hanvem korunk na; kiteak, kel'lem zalear, jea raxttramnim Hanvem Israelak Ejiptantlo bhair kaddlolo mhonn dekhlolem, tea raxttram modem Mhojea Nanvachi ixim' buddon vetoli asli.
23. Punn aniêk pavtt oronneant Hanvem soput gheun tankam sanglem: raxttram modem Hanv tumkam ximpddaitolom ani porkea raxttramnim tumkam duspottaitolom,
24. kiteak tumi Mhoje nirnnoi pallunk nant ani Mhojea kaideanchi beporva keli and Mhoje Son'var bhoxttaile ani tumchim kallzam tumchea purvozanchea kuddea devank chikttun dovorlim.
25. "Dekhun Hanvem tankam bore nhoi tosle kaide ani jivit diunkuch xokonant tosle nirnnoi dile;
26. ani tancheanch orponnamnim Hanvem tankam bhoxttonk nirmilem: apleanch malgoddea putanchem bolidan korunk dilem. Tim xirxiro haddtat toslim zaunchê khatir ani Hanv Sorvespor mhonn tãnnim vollkhun gheunchê pasot Hanvem oxem kelem."
27. Dekhun, mon'xachea puta, Israelachea Ghorannea kodde uloi ani tankam oxem sang: "Sorvespor Dev oxem mhonntta: ani êkê bhaxen tumchea purvozamnim Mhaka ovisvaxi zaun Mhoji ninda keli:
28. Hanvem soput gheun tankam ditolom mhonn sanglolem tea desant tankam bhitôr kaddlea uprant, tãnnim soglle unch dongor ani soglle panamnim matlole rukh tãnnim dekhle, ani thoim tãnnim aple iodn bhettoile, ani Mhozo rag challoitat toslim orponnam kelim; thoim tãnnim dom-dommit dhump laslo ani pivonn-orponnam varoilim.
29. Tedna Hanvem tankam vicharlem: tumi vetat tea dongra voilea mondirachem nanv kitem? Ani tãnnim Bamas (mhonngê 'dongra voilem mondir') mhonn tachem nanv sanglem, ani ozun porian tench nanv taka urlam."
30. Dekhun Israelachea Ghoranneak oxem mhonn: "Sorvespor Dev oxem sangta: Tumchea purvozam bhaxen tumi-i bhoxttotat ani tea ollxikonnea kuddea devam kodde xindollki korit ravtat?
31. Kiteak mhollear tumi tumchim danam bhettoitat ani tumchea bhurgeank ujeant lasun tancho iôdn kortat mhonnttôch, tumi aiz porian sogllea tumchea ollxikonnea kuddea devam kodde bhoxttot asat. Oxem astam Israelachea Ghorannea, tumkam Hanv Mhozo prosad magunk diuncho? Mhojea jivachean - uloita to Sorvespor Dev! - Mhozo prosad magunk Hanv tumkam diuncho na.
32. Tumi oxem mhonnttat: Ami heram porzam bhaxen zatoleanv, porkea desantlea lokam bhaxen; ani lankddak ani fatrank bhôztoleanv: oxem tumi kedna-kedna chint'tat tem ghòddchench na.
33. "Mhojea jivachean - uloita to Sorvespor Dev! - Mhojea zolltea ragan Mhozo bollixtt hat ubarun ani soglli Mhoji podvi dakhoun, Hanv ki tumcher razvôttki choloitolom.
34. Mhojea zolltea ragan apnnak zai tem korun zatôch, Hanv mhozo bollixtt hat ubarun ani Mhoji podvi dakhoun tumkam veg-vegllea lokam modlim portun haddtolom ani tumkam ximpddaileant tea desantlim novean ektthaim kortolom.
35. Hanv tumkam raxttranchea oronneant vhortolom ani thoim tondda-tonddim Hanv tumchi mon'subi kortolom.
36. Zoxem Ejiptachea oronneant tumchea purvozanchi Hanvem mon'subi keli, toxench tumchi-i Hanv mon'subi kortolom - uloita to Sorvespor Dev!
37. Tumkam Hanv danddo gheun Mhojea niontronnant dovortolom, tumi Mhozo korar mandun ghe-so kortolom,
38. ani Mhojer kolpoleant tea fiturank tumchê modlim kaddtolom; Tim atam ravtat tea desantlim Hanv tankam bhair kaddtolom, punn tim Israelachea desant bhitôr sorchim nant, ani tedna Hanv Sorvespor mhonn tumkam kollon ietolem.
39. "Ani, tumkam, Israelachea Ghorannea, Sorvespor Dev oxem sangta: Cholat, sogllim tumi, tumchea ollxikonnea kuddea devanchi seva korit ravat, punn magir tumi Mhojem aikotat ki na tem ami polletoleanv! Tedna tea tumchea ollxikonnea devank tumcheô bhettovnniô tumi anink korchim nant ani oxem Mhojem povitr Nanv anink bhoxttaunchim nant.
40. Kiteak Mhojea povitr dongrar, Israelachea unch dongrar - uloita to Sorvespor Dev! - Israelachem ak'khem Ghorannem, desant ravtat tim sogllim, Mhoji seva kortolim. Thoim Hanv tumkam mandun ghetolom, ani tumchim danam, tumchim boreantlim borim orponnam ani tumchim povitr kel'lim danam gheun ietoleat mhonn Hanv ravtolom.
41. Lokam modlim Hanv tumkam portun haddtolom tedna, ani tumkam ximpddaileant tea sogllea raxttrantlim tumkam zoma kortolom tedna, domdomit pormôll koso Hanv tumkam mandun ghetolom, ani tumchê udexim raxttranchea dolleam mukhar Mhoji povitrtai fankoitolom.
42. Ani tumkam Hanv Israelachea desant, mhonngê soput gheun tumchea purvozank ditolom mhonn Hanvem bhasaila tea desant, portun haddtolom tedna, Hanv Sorvespor mhonn tumkam kollon ietolem.
43. Thoim tumchê adlê vagnnukecho ani tumkanch bhoxttaun tumi kel'lea kortubancho tumkam ugddas ietolo. Ani tumi kel'lea sogllea patkam pasot tumkam tumchoch kanttallo bhògtolo.
44. Ani tumchê khottê chalik ani kusddea kortubank favo toxem nhoi, Israelachea Ghorannea, punn Mhojea Nanvacho obhiman rakhunk goroz toxem Hanv tumkam kortolom tedna, Hanv Sorvespor mhonn tumkam kollon ietolem." '
45. Sorvesporachem utor mhaka pavlem; Tannem mhollem:
46. Mon'xachea puta, dokhinnê vatten vollon polle, ani dokhinnecher add hem utor sang, Negebachea ranam-vonancher add ho sondêx di.
47. Negebachea ranam-vonank oxem sang: "Sorvesporachem utor aikat! Sorvespor Dev oxem mhonntta: Polle, tujê bhitôr Hanv êk uzo pettounk vetam, ho uzo tujê bhitôr soglle hirve rukh ani soglle suklole rukh lasun uddoitolo; tea ujeacho bogbôg palounk zaunchench na, ani to Negeba thaun ut'torê porian sogllea mon'xanchim tonddam hulpaitolo.
48. Hanvench, Sorvesporan, to pettoila mhonn sogllem mon'xakull polletolem; ani to konnuch palouncho na. " '
49. Tedna hanvem mhollem: 'Naka, Saiba, Sorvespora Deva! Poilinch tim mhojê vixim oxem mhonnot asat: "ho monis fokot voparimnim uloita! " '
