1. Sorvesporachem utor mhaka pavlem; Tannem mhollem:
2. Seir Porvota vatten tujem tondd vôll ani tachê virudh ho sondêx di.
3. Taka oxem sang: "Sorvespor Dev oxem sangta: Polle, Seir Porvota, Hanv tujer virudh; ani tujer add Hanv Mhozo hat ubartolom, ani tujem Hanv ghorttann kortolom, tuji dêsvatt kortolom;
4. Tujim nogram padd kortolom ani tujem ghorttann zatolem, ani Hanv Sorvespor mhonn tuka kollon ietolem.
5. Kiteak magam thaun tunvem monant dusman'kai ballgileai ani Israelachea putam-dhuvank tanchea vignachea vellar, tanchê nimannê khastichea disa, torvarichê darik sôddun dilim-i.
6. Hea pasot, Mhojea jivachean - uloita to Sorvespor Dev! - soput gheun sangtam: tujem rogot tunvem varounk zai mhonn Hanvem ievjilam, ani dekhun rogot tujea pallank lagtolem; tunvem dusreanchem rogot vikraileim dekhun, rogot tujea pallank lagtolem.
7. Ani Seir Porvotachem Hanv nisontton kortolom, tacho Hanv êk osadd dês kortolom; tê vatten ietim-vetim konnuch aschim nant.
8. Tache dongor Hanv marloleanchea pretamnim bhôrtolom; tujea dongrancher ani tujea falkeamnim ani sogllea tujeam vhallamnim torvarin marlolim bhuim poddtolim.
9. Hanv tuka sorvkallak ek oronnem korun sôddtolom ani tujea nogramnim anink kednanch lôk ascho na. Ani Hanv Sorvespor mhonn tuka kollon ietolem.
10. "Tunvem oxem mholleim: 'Mhojim zatolim him don raxttram, Judas ani Israel, ani tanche don-ui dês, ani ami tim amchea tabeant kortoleanv.' Sorvespor thoim asun-ui tunvem oxem mholleim.
11. Tôr Mhojea jivachean - uloita to Sorvespor Dev! - Mhojê porjê thaim tunvem ballgiloi to rag, ti nattkai ani to dvês Hanv tuka farik kortolom. Tunvem tankam oxem kelãi dekhun, Hanv tuka xikxa laita mmhonn tankam kollon ietolem.
12. Tunvem oxem mholleim: 'Te Israelache dongor osadd poddleat; te amkam atam girasunk dovorleat.' Heô Israelachea dongram virudh tunvem ucharloleô sorv kenddnniô Hanvem, Sorvesporan, aikoleat.
13. Tujeach tonddan Mhojê virudh tum urmottaien uloiloi, Mhojê add tunvem zaitim utram ucharlim-i: hem sogllem Hanvem aikolam.
14. Sorvespor Dev oxem sangta: Ak'kho sonvsar murgott'ta tedna Hanv tujem ghorttann kortolom.
15. Israelachea Ghoranneachem daiz osadd poddlolem dekhun tum tachê vixim sontosloi, toxench Hanv tujê vixim kortolom: Seir Porvota, tum osadd poddtoloi, ani tujê borabôr Edomacho ak'kho dês, ani Hanv Sorvespor mhonn tankam kollon ietolem." '
