1. Baravea vorsa, baravea mhoineachea poilea disa, Sorvesporachem utor mhaka pavlem; Tannem mhollem:
2. Mon'xachea puta, Ejiptachea raza Faraoh pasot ek vilap-git kôr. Taka oxem sang: "Raxttranchea tornnea xinva, tujem nisontton zalem! Ekdam tum doriant firtolea manngea sarko asloi, Tujea Nil nodintlo tum bhair sortaloi, udkam tum tujea pãiamnim haloitaloi, ani vhanvtem udok khodôll kortaloi.
3. "Sorvespor Dev oxem sangta: Zaitea raxttrank zoma korun tanchê modem Hanv Mhojem zall tujer uddoitolom; tim tuka Mhojea zallant oddun voir kaddtolim.
4. Magir Hanv tuka sukhê zomnir sôddtolom, tuka bhair moidanar uddoitolom, ani mollba velea sogllea suknneank tujer bosunk haddtolom, ani ranantlea sogllea savzank tujem mas khaun dhadoxi zai-xim kortolom.
5. Tujem mas Hanv dongrancher ximpddaitolom, ani tujea kuslolea moddean falkim bhôrtolom.
6. Tujê thaun bhair sorun vhanvtolea rogtan tuzo dês hanv ximptolom, dongranchê tonkxer porian tem pavo-so kortolom, ani tannem falkim bhortun haddtolom.
7. Tujem nisontton kelea uprant Hanv mollob dhamptolom, ani noketrancho uzvadd lipoitolom. Suria kupamnim dhamptolom, ani chondrim' aplo uzvadd diuncho na.
8. Mollba velea sogllea tarancho uzvadd paloitolom ani tuzo dês kallokhant buddoitolom. Uloita to Sorvespor Dev!
9. "Raxttram modem, tum vollkhonaim tea desam modem, tujea nisonttonachi khobor pavtoli tedna, zaitea lokanchea monacher akant haddtolom.
10. Ani tuka polleun khub-khub lokank dhoko bostolo, te thottaktole; tanchea razanchea dolleam mukhar Mhoji torvar ubartolom tedna, tuka ghòddlam tem polleun, xirxiro ieun te koddkoddtole. Tum xevttotoloi tea disa dôr-ekleak apleach jivachea huskean thorthoro ietolo.
11. "Kiteak Sorvespor Dev oxem sangta: Babiloniechea razachi torvar tujer denvun ietoli.
12. Mhojea zhuzarianchê torvarin tujea urponjink dhornnir xevttitolom. Raxttram modle soglleam-vôn krur monis te. Ejiptachi vhoddvik te môddun uddoitole, ani tachea urponjincho nas zatolo.
13. Subham' udkam sorxim chorvak vetat tachea sogllea hinddank Hanv marun uddoitolom. Udkam khodoll korunk mon'xanche pãi, nhoi mhonn hinddanche-i kur, asche nant.
14. Tedna tachim udkam Hanv novean thondd kortolom, ani tacheô nodi tela vori xantin vhanvo-xeô kortolom. Uloita to Sorvespor Dev!
15. "Ejiptachi Hanv desvatt kortolom tedna, ani desant asa titleacho-i Hanv nas kortolom tedna, ani thoim ravtolea soglleancho jiv kaddtolom tedna, Hanv Sorvespor mhonn tankam gomun ietolem.
16. "Desacheô dhuvô hench vilap-git gavun vilap kortoleô. Ejipta pasot ani tachê sogllê porjê pasot teô hem vilap-git gaitoleô. Hench zatolem tanchem vilap-git. Uloita to Sorvespor Dev! " '
17. Baravea vorsa, poilea mhoineachea pondravea disa, Sorvesporachem utor mhaka pavlem; Tannem mhollem:
18. Mon'xachea puta, Ejiptachê porjê pasot vilap kôr, kiteak thor-bollixtt raxttram borabôr Patallachê khorik porian ti sokla vetoli; thoim anink konn ugddas korina tanchea vangdda ti poddloli astoli.
19. Soglleam poros odik sundôr tum? Tori sokla poddun voch, thoim odhormi mon'xam modem add poddun rav.
20. Torvarin marun uddoileant tanchea vangdda tum-i rav. Torvar toiar asa, ti ubarloli asa. Tachê ak'khê porjê soit Ejipt poddtolo.
21. Patallachê khori thaun soglleam-vôn xrextt vir, tache samil, taka mhonnttole: "Ie rê sokla! Odhormi mon'xanchea, torvarin marloleanchea vangdda khala poddloi tum atam!" '
22. Assiria polle thoim asa, ani tichê sobhonvtim purlolim sogllim tichim loskoram; soglleank jivexim marleat, torvarin te poddleat;'
23. tanche fondd Patallachea khol-khol zageanr marlole asat; ani tichim loskoram Ejiptachea fonddam bhonvtonnim asat; magam te jiveanchea sonvsarant akant ximpddaitale, tori tankam soglleank jivexim marleat, te soglle torvarin poddleat.
24. Ho polle asa Elam' ani tachea fondda bhonvtonnim sogllim tachim loskoram; tankam soglleank jivexim marleat, te soglle torvarin poddleat: magam te jiveanchea sonvsarant akant ximpddaitale, tori atam odhormi mon'xanchea vangdda Patallachê khorik te pavle. Patallant, zancho anink konn ugddas korina, tanchê borabôr te atam lojek sampoddleat.
25. Jivexim marloleam modem taka êk khatt toiar kelea, tachea loskorank ap-aplea fonddamnim tachê bhonvtonnim ghaleat; te soglle odhormi monis; magam te jiveanchea sonvsarant akant ximpddaitale, punn atam soglleank jivexim marleat, torvarin tancho jiv kaddla. Patallant, zancho anink konn ugddas korina, tanchê borabôr te atam lojek sampoddleat. Tankam zhuzant marloleam modem ghaleat.
26. Thoim polle Meshek asa ani Tubal, ani tanchê sobhonvtim tanchea loskoranche fondd; te soglle odhormi monis; magam te jiveanchea sonvsarant akant ximpddaitale, punn torvarin tancho jiv kaddla.
27. Adlea kallar poddlole vir sogllim aplim zhuza-hatiaram gheun Patallant gele, tancheô torvari tanchea matheam pondak asleô ani tanche dhal tanchea angar; he vir magam jiveanchea sonvsarant akant ximpddaitale; punn Meshekachea ani Tubalachea mon'xank tanchê osle fondd mellunk nant.
28. Tum odhormi mon'xam modem mòddlolo poddtoloi ani torvarin marloleam borabôr poddlolo urtoloi.
29. Ho polle Edom' asa! Tache raza ani soglle tache kunvor, zhuzant dhiradik zaun-ui, torvarin marloleam modem poddlole asat. Odhormi mon'xanchea vangdda, Patallant zancho anink konn ugddas korina, tanchea vangdda te poddlole asat.
30. He polle Ut'toreche soglle kunvor ani soglle Sidon'kar asat! Apunn bollixtt mhonn dakhoun te akant ximpddaitale, punn atam jivexim marloleam modem te poddle. Lojen bhòrlole, odhormi monis te, torvarin marloleanchea vangdda te poddlole asat ani, Patallant zancho konnuch anink ugddas korina, tanchea vangdda apli loz gheun asat.
31. Faraoh tankam polletolo ani, hi soglli torvarin marloli urpônz polleun, taka - mhonngê Faraohk ani borabôr tachê foujek - thoddi punn buzvônn melltoli. Uloita to Sorvespor Dev! Jiveanchea sonvsarant akant ximpddail'lo dekhun, odhormi mon'xam modem, torvarin marloleam modem, to poddlolo astolo. To mhonngê Faraoh ani vangdda tachim sogllim loskoram. Uloita to Sorvespor Dev!'
