1. Ani tum, mon'xachea puta, êk pazloli torvar ghe, mhaleacho êk vakôr zal'lea porim tujea mathear ani khaddar ti bhonvddai. Magir êk tagddi gheun tunvem katorlolea kensanche vantte kôr.
2. Veddheache dis sompot ietat toxe tea kensancho êk tisro vantto xara bhitôr ujeant las. Êk tisro vantto gheun, to torvarin xinun xara bhonvtim uddoi. Ani hanv poteantli torvar kaddun tanchê fattlean lagtam mhollear to nimanno vantto varear uboi.
3. Toxench tantle thodde kens ghe ani tujea vostrachea miriamnim band
4. ani tantle-i thodde kadd ani te ujeant uddoi ani las. Tantuntlo uzo Israelachea Ghoranneacher poddtolo.
5. Sorvespor oxem mhonntta: "Hem tem Jerusalem, taka Hanvem raxttram modem ghalam ani tachê bhonvtim porki dês.
6. Tem mhojea nirnnoiam add tea raxttram von odik noxtteponnan kolpolam, tannem bhonvtonnchea desam poros odik mhoje nem' môddleat; karonn tãnnim mhojea nirnnoianchi beporva kelea ani mhoje nem' pallunk nant."
7. Hea khatir Sorvespor oxem mhonntta: "Tumchê sobhonvtonnchea raxttranchea opradham poros tumche opradh paxtt zalear, mhoje nem' tumi pallinant ani mhoje nirnnoi bhoxttaitat ani sov-bhonvtonnchea raxttranchea-i nirnnoiank tumi man dinant mhonnun
8. Sorvespor oxem mhonntta: borem tôr, Hanvum-i tumchê add asam ani raxttramnim polloupa pasot tumchi mon'subi kortolom
9. ani tujê bhitôr jem Hanvem kednanch korunk na, nhoi mhonn jem oslem Hanv anink kodinch korcho na, tem tujea kanttalleachea kortubank lagun Hanv kortolom.
10. Dekhun tujê modem avoibapui aplea bhurgeank ani bhurgim aplea avoi-bapaiank khatolim. Ani atam tujer add Mhoje nirnnoi Hanv pallun haddtolom ani tujê bhitôr urloleank Hanv sogllea dixamnim ximpddaitolom.
11. Dekhun, Mhojea jivachean - uloita to Sorvespor Dev - kuddea devank bhôzun ani tujea kanttaleachea kortubank lagun Mhozo povitr zago tunvem khorench bhoxttailai dekhun, tuji doia dhôrinastana Hanv tuka chirun uddoitolom, tuka khast lailea bogor Hanv tuka sôddcho na.
12. Tujea lokantlo êk tisro vantto zorimorin mortolo vô tujê modem bhuken virun vetolo; ani tujê sobhonvtim êk tisro vantto torsadin mortolo, ani êk tisro vantto Hanv varear sogllea dixam-nim ximpddaitolom, ani poteantli torsad kaddun tanchê pattik lagtolom.
13. Oso Mhozo rag puraien bhagoitolom ani Hanv dhadoxi zai porian Mhozo krôdh tancher denvoitolom. Jedna Mhozo krôdh tancher varoun to puraien bhagoitolom, tedna Hanv Sorvespor premaxen uloilom mhonn tankam kollon ietolem.
14. Tujê bhonvtonnchea raxttram modem ani sogllea ieteaveteanchê nodrê mukhar tujem ghorttann kortolom ani tuka kenddnniancho mhal kortolom.
15. Jedna, ragan ani krodhan tuka koddok xikxa laitolom ani tujer add Mhoje nirnnoi pallun haddtolom, tedna bhonvtonnchim raxttram tuka polleun thottaktolim ani tuji ninda kortolim, tankam tum zatolii borabôr kenddnniancho mhal ani êk khôr xiddkavnni.
16. Jedna Hanv tumchem nisontton korunk tumcher bhukeche khoddegantt bann sôddtolom - khorench tumcho nas korunk Hanv te sôddtolom! - tumchea jevnnacho purument ibadd korun Hanv tumchi bhuk vaddoitolom.
17. Tuka bhurgeam virêt dovrunk Hanv tumcher dukôll dhaddtolom ani ran'vott zonavoram sôddtolom; tujê modlean vetoli zorimori, tujê modem vhanvtolem rogot; Hanv tumcher add torsad upzo-xi kortolom. Hanv, Sorvespor, hem sangun dovortam." '
