1. Tea mon'xan mhaka udentê vatten aslolea darvonttea-xim vhelo,
2. ani thoim udentê thaun ietali ti Israelachea Devachi mhoima hanvem dekhli. Tacho avaz somdirachê gaji sarko sadlo, ani Tachê mhoimen prithum' loklokli.
3. Jerusaleachem nisontton korunk To ail'lo tedna mhaka polleunk mell'llolem toslem dorxon hem; ani Kebar Nodi-xi hanvem dekhlolem toslench hem dorxon. Tedna hanv saxttangim poddlom.
4. Sorvesporachi mhoima udentichea darvontteantlean Dev-mondirant bhitôr sorli.
5. Sorvesporachea Atmean mhaka ubarlo ani mhaka bhitorlea angnnant vhelo; Dev-mondir Sorvesporachê mhoimen sogllench bhòrlolem mhonn hanvem dekhlem:.
6. To monis thoim mhojê kuxik ubo ravlo ani Dev-mondira thaun Sorvespor mhojê lagim uloita to hanvem aikolo:
7. Mon'xachea puta, hem Mhojem xinvason. Hanv hanga Israelachea loka modem jietolom ani tancher sodankal raj choloitolom. Israelache raza, nhoi mhonn tache odhikari, hea fuddem heram devanchi seva korun vô tanchea razanchim pretam hanga purun Mhojem Nanv anink bhoxttaunche nant.
8. Tanchea razamnim aplea razvoddeachea daranche umbre Mhojea umbrea sorxim ani aplea daranche khambe Mhojea khambeam sorxim bandlole, ani oxem amchê modem fokot êk vonnôt asli. Aplea kanttalleachea kortubamnim tãnnim Mhojem povitr Nanv bhoxttailem ani oxem Mhojea ragan Hanvem tancho nas kelo.
9. Punn atam thaun tim dusrea devank anink bhôzchim nant ani tanchea razachim pretam Mhojê mukhailim kaddun bhair uddoitolim. Oxem tim kortit zalear, Hanv tanchê modem jietolom sodam-sorvodam.'
10. Ani Sorvesporan fuddem mhollem: 'Mon'xachea puta, Israelachea putam-dhuvank Devmondirachi soglli khobor sang ani tacho nokaso kaddun barkaien to tankam xikum-di. Oxi tankam aplea ollxikonnea kortubanchi loz bhôgumdi.
11. Tedna, tankam aplea kortubanchi loz dista zalear, Dev-mondirachi soglli ievzônn tankam kolloi: tachem chitr, tantum provês korpachim ani bhair sorpachim daram, tacho akar, sogllea vostunchi manddavôll ani tache soglle nem' ani kaide. Hem sogott tankam boroun di; oxem sogllem koxem manddun haddlam tem tankam gomtolem ani soglle kaide tim pallunk pavtolim.
12. Ho asa Dev-mondiracho nêm': Dongrachê tenkxer Dev-mondira bhonvtim asa titlo-i zago sonvskarlolo ani povitr.'
13. Dev-mondirachem zokh ghetana vaporlolem tench map dhôrun, him asat vedichim zokham: vedichea mulla bhonvtonnim xekan'xek pon'nas sentimetr khôl ani pon'nas sentimetr rund êk folli asli; degek ponchvis sentimetranchi unch ek kantth aslem.
14. Vedicho soglleam-vôn sokoilo bhag voir thaun mulla porian êk metr unch aslo. Dusro bhag xekan'xek pon'nas sentimetr degê thaun fattim vhel'lo aslo; tachi unchai don metranchi. Tachê uprantlo-i bhag xekan'xek pon'nas sentimetr degê thaun fattim vhel'lo aslo.
15. Hea unch-lea bhagacher hom' bhettoitale; taka-i don metranchi unchai asli. Char konnxeamnim xingam aslim; him vedichea mathea poros unch aslim.
16. Vedichem mathem chovkonnem aslem: dôr êkê bazuk sôv metr.
17. Modlo-i bhag choukonno aslo: dôr êkê bazuk sat metr; degek ponchvis sentimetr unch ek kantth aslem. (Folli pon'nas sentimetr rund asli). Vedicher choddun vochunk udenti vatten panvdde asle.
18. Tea mon'xan mhaka mhollem: 'Mon'xachea puta, Sorvespor Dev oxem sangta: "Jedna vedi bandon ietoli, tedna ticher hom' korun ani bolidan korunk marlolea mon'zatinchem rogot ticher xinvraun ti vedi tumi sonvskarunk zai.
19. Fokot Levichea kullantle Zadokache put iadnik asat te Mhoji seva korunk Mhojê mukhar ieunche. Hanv Sorvespor Dev ho hukum' ghaltam. Patkam khatir bolidan korunk tumi tankam êk paddkulo ditoleat.
20. Tantlem thoddem rogot tumi ghetoleat ani vedichea mathear konnxeank aslolea xingancher ani toxench vedichea modlea bhagachea konnxeancher ani xekan'xek tanchea kantthanr tem tumi varoitoleat. Hê ritin tumi vedichi xud'dhavnni ani sonvskarnni kortoleat.
21. Patkam khatir bolidan korun bhettoil'lo boil tumi ghetoleat ani Gabharea bhair omkea nemlolea zagear tacho hôm' kortoleat.
22. Dusrea disa khôdd-naslolo êk bokddo tumi ghetoleat ani patkam khatir tachem bolidan kortoleat. Boilachem rogot gheun kel'lem toxem, hachem-i rogot gheun vedi xud'dh korat.
23. Oxem kelea uprant êk paddkulo ani êk menddurlo gheiat: tankam-i koslich khôdd aschi nhoi,
24. ani tankam Mhojea fuddeant haddat. Iadnik tancher mitt xinvraitole ani tancho hôm' korun Mhaka bhettoitoleat.
25. Sat dis-bhôr, dôr-eka disa tumi êk bokddi, êk boil ani êk menddro patkam khatir bolidan korun bhettoitoleat; tankam soglleank koslich khôdd aschi nhoi.
26. Sat dis-bhôr iadnik vedi sonvskartole ani oxi ti sodanchê sevek toiar kortole.
27. Sat dis bhòrlea uprant, atthvea disa ani tachê magir, iadnik tumche hom' ani xantichim bolidanam tê vedicher bhettoitole, ani Hanv tumkam proson'n zatolom. Uloita to Sorvespor Dev!" '
