1. Atam Israelachea fuddariam pasot vilapachem git kôr.
2. Oxem mhonn: Kosli asli avoi tumchi? Xinvam modem êk xinvinn, Aplea poram modem add poddun aplea petteank ti ballgitali.
3. Tantlea eka petteak tinnem pôslo: to êk tornno xinv zalo; xikari dhôrun tiche kuddke korunk to xiklo; mon'xank porian girasunk xiklo.
4. Tachi khobor raxttranchea kanar poddli; tanchê khonnint to poddlo; sankllimnim bandun tãnnim taka Ejiptachea desant vhelo.
5. Apli axa fiskottli ani aplo bhorvanso bhonglo mhonn polleun, tinnem dusrea eka aplea petteak ghetlo ani taka êk tornno xinv kelo.
6. Xinvam modem to bhonvunk laglo, tornno xinv zalo, ani xikar dhôrunk xiklo; mon'xank-ui girasunk laglo.
7. Tanche kil'le tannem padd kele, Tanchea xaram-nogranchem tannem ghorttann kelem; tache goroz aikun ak'kho dês ani desant ravpi sogllim thottak zalim.
8. Tedna bhonvtonnchim raxttram tacher upraslim; tacher tãnnim aplem zall uddoilem; tanchê khonnint to poddlo.
9. Sankllimnim tankam bandlo ani Babiloniechea raza-xim taka vhelo, ani tacho tallo anink kednanch Israelachea dongrancher aikunk ieuncho nhoi mhonn, taka eka kil'leant uddoun bond kelo.
10. Tuji avoi udka sorxim lail'lê dak-veli sarki asli; khub udok aslem dekhun, ti follamnim bhòrloli ani panamnim matloli.
11. Tika ghôtt khandiô zaleô, heô khandiô raiall betkattiô zaleô. Kupam porian pavo-sôr, ti dak-vêl choddon-vaddon geli. Kitli unch ti vaddon geli ani kitli ti khandiam-panamnim matloli, tem soglleamnim pollelem.
12. Punn tika pallam soit ragan umttun kaddli, ani zomnir xevttun uddoili; Udentichea varean tichim follam sarkinch sukoilim, tiche kuddke-kuddke kele; ticheô ghôtt khandiô sukun geleô ani ujean tancho bhosm kelo.
13. Atam tika oronneant êkê sukê-korddê zomnir vhorun laili.
14. Tichea khandiantlo uzo bhair sorlo ani tichea khandiancho ani follancho bhosm kelo. Tika anink ghôtt khandiô urunkuch nant, tanchi raiall betkatti anink mellpachi na.' Hem ek vilap-git; toxench tem gavun aileant.
