1. Sorvesporachem utor mhaka pavlem; Tannem mhollem:
2. Jerusaleachea tonddar tachim pozddim kortubam mar!
3. Oxem sang: "Sorvespor Dev Jerusaleak oxem mhonntta: Mullan ani zolman tum Kanaan desantlem. Tuzo bapui êk Amorkar, ani tuji avoi êk Hitkarnn.
4. Zolma-somoiar, tum zolma ailãi teach disa, tuji bomblechi dori konnem katrunk na, tuka nitoll korunk konnench tuka udkan dhuunk na, mittan tuka rogddunkna, nhoi mhonn falliamnim tuka guttlaunk na.
5. Konnench tuka doia dakhounk na, tuje churchure dhôrun oslem kitench tuka konnench korunk na. Tujea zolmachea disa, tuji vitt dhôrun uktea mollar tuka osadd sôddlolem.
6. "Tujê sorxilean vetalom tedna, tujeach rogtant tum foddfoddtaleim tem Hanvem dekhlem, ani tujea rogtan mhellem astana, Hanvem tuka mhollem: jivem rav!
7. ani xetantlea tonna vori Hanvem tuka vaddoilem. Tum vaddleim, tornnattem zaleim, lognachê piraiek pavleim. Tujim thanam vaddlim, tuka kens aile, punn tum sarkench vingllem asleim.
8. Tujê sorxilean vetana Hanvem tuka dekhlem. Tuzo vêll pavlolo, môg korpa-cho vêll. Mhojem avoronn tujer Hanvem patllailem ani tujem vinglleponn dhamplem; tuka Hanvem soput dilo, tujê kodde korar kelo ani tum Mhojem zaleim - oso uloita to Sorvespor Dev!
9. Hanvem tuka udkan nhannoilem, tujem rogot dhuun kaddlem, tuka tel kaddlem.
10. Zori lugttachim nhesnnam Hanvem tuka dilim, mhov chambddeacheô vhannô, êk sonni mathea-rumal ani ek resmachem avoronn.
11. Tuka Hanvem mannkam-rotnamnim nettoilem, tujea hatank kanknnam ghalim ani tujea golleak êk sorpolli.
12. "Hanvem tuka nakachi nôth ani kanantlim dilim; tujea mathear ghalo êk sobit-sundôr mukutt.
13. Tuka bhangaran ani rupean xringarlem, ani sonni, resmi ani zorichea lugttan tuka nhesoilem. Puxtt gonvachem pitt, mhonv ani tel tujem jevonn zalem. Disan'dis odik sundor zait geleim; ani tum ranni zaunk pavleim.
14. Hanvem tuka Mhojeach khaxa tezan nettoil'lem dekhun, tuji sobitai sopurnn zali ani tujê sundoraiechi kirti raxttram modem gazli. Uloita to Sorvespor Dev!
15. "Punn tujêch sundoraiecher patieun ani tujê kirticho faido kaddun tum xindôll zaleim ani ieteam-veteam kodde tunvem xindollkecho dhondo keloi. tum tanchench zaleim.
16. Tujim thoddim vostram gheun, tunvem tukach unch zage toiar kelei, vividh ronganche, ani thoim xindollki choloilii.
17. Hanvench tuka dil'lea bhangarache ani rupeache kel'le tujê olonkar gheun tuji xindollki vaddounk tunvem ling korun ghetlei.
18. Tujim zorichim vostram gheun tunvem tankam nhesoilei ani tankam Mhojea telachi ani Mhojea dhumpachi vôpnni kelii.
19. Ani domdomit pormôll koso tunvem tankam bhettoileim tuka Hanvem dil'lem jevonn, tujea posonnak dil'lem puxtt gonvachem pitt, tel ani mhonv. "Odik paxtt kelãi tunvem - uloita to Sorvespor Dev! - :
20. tunvem Mhaka zolma haddlolea putank ani dhuvank vhelim-i ani tancho iôdn korun tunvem tankam jevonn koxem murtink bhettoilim-i. Tuji xindollki puro nasli tuka?
21. Mhojea bhurgeank jivexim marun tancho hôm' tunvem kuddea devank bhettounchi anink goroz asli?
22. Tujea bhurgeponnar tum sarkench nagddem asleim ani tujeach rogtant zomnir foddfoddtaleim - tea disancho, sogllea tujea kanttalleachea kortubam ani xidollkê modem, tunvem matui ugddas korunk naim.
23. "Xirap tujer, xirap tujer! Uloita to Sorvespor Dev! Sogllim tujim hispabhailim khotteponnam korchê korun,
24. tunvem tuka êk machi ubarlii ani
25. dôr-eka nakear êk unch zago toiar keloi: tuji sundorai bhoxttailii ani ietea-veteank tuje pãi ugddun hixôb-naslolim pozoddponnam tunvem adarlim-i.
26. Ejiptkaram-i kodde, vhodd lingachea hea tujea xezariam kodde, tunvem pozoddponn keleim, ani tuji xindollki odikuch vaddoun Mhozo rag odik tiddoiloi.
27. Dekhun atam Hanvem Mhozo hat tujê virudh ubarlo, tujem jevonn komi kelem, tujea dusmana Filistikarnninchea hatant tuka sôddlem: tuji kanttalleachi chal polleun tankam porian loz bhògta.
28. Tori tum dhadoxi zaunk naim, ani vochun Assiriekaram-i kodde xindollki kelii; hôi, tanchê lagim tunvem xindollki kelii ani tori tum dhadoxi zaunk naim.
29. Tea fuddem tunvem veaparianchea desant Kaldeikaram-i kodde tuji xindollki vaddoilii, punn hanchê-i kodde tum dhadoxi zaunk naim.
30. "Kitlo mhonn tum Mhaka tiddoitai! Uloita to Sorvespor Dev! Xindollkechea dhondeant goll'loli naikinn korta tem sogllem tum korit ailãi,
31. tukach dôr-eka chovkar êk machi ubarlii ani dôr-êka nakear êk unch zago tukach toiar keloi. Tori tum dhondeachea kolvonta bhaxen korinaim, kiteak mhollear tum bhaddem lagun ghenaim.
32. Êk pordvar ostori aplea ghovachê bodlek dusrea khoinchea-i mon'xank apnna-xim gheta.
33. Sogllim kolvontam danam ghetat, punn tum zalear tujea sorv mogiank danam ditai, sogllê-koddche tankam tujê-xim oddun haddunk ani tujê kodde xindollki korunk, denneamnim tankam bhuloit asai!
34. Xindollki korpant heram bailam thaun tum sarkench vegllem, kiteak mhollear tujê kodde pozoddponn korunk konnuch tujê pattlean dhanvun vochona; tum mozuri ghenaim, portench zalear tum mozuri ditai mhonn-ttôch, tuji chal sarki veglli!
35. "Borem tôr, kolvonta, Sorvesporachem utor aik! Sorvespor Dev oxem mhonntta:
36. Tuji girestkai tunvem ibaddlii tujea mogiam kodde ani tujea kanttalleachea kuddea devam kodde xindollki kortana tuji kudd vinglli korun dakhoilii, ani hankam tunvem tujea bhurgeanchem rogot bhettoun dileim:
37. hea sogtta pasot, tuka dhadoxi kelam tea sogllea tujea mogiank, nhoich tuka avoddtale team soglleank punn tum dvês dhôrtaleim team-i somestank, Hanv zoma kortolom. Tujê bhonvtim Hanv tankam ektthaim kortolom ani tanchea dolleam mukhar tuka vingllem kortolom, ani ak'khi tuji vinglli kudd tankam polleunk ditolom.
38. Pordvar ani khun adartoleam ostoriank niti formonn lagu zata tea formonnan hanv tuji nit kortolom ani rogtacho kinv ani nirdukaiecho rag hanv tujer ot’tolom.
39. Hanv tuka tanchea hatamnim ghaltolom ani te unch vedi toddun-foddun sokla uddoitole ani tujea unch zageanchem nisontonn kortole. Tukai te vinglle kortole ani tujim sringaran ani tuka vingllem ani ugtem dovortole.
40. Ani tujê add ek polltonn uprasaitole, fatramnim tuka fatraitole ani tanchea tolvarimnim tujê kuddkean-kuddke kortole.
41. Ani ujean tujim ghoram te lhasun uddoitole, ani puskoll ostoriam mukhar tujer add niti-formonn martole; ani tuji xindulki hanv bond kortolom ani tum-i anik mozuri diunchi naim.
42. Tujê add mhozo kinv hanv denvoitolom ani mhojê nirdukaiecho rag tujê sorxilo koddsortolo, hanv xant zatolom ani portun kednach ragabhorit zaunchonam.
43. Tum tujê bhurgeponnaile dis visorleim dekhun ani hea soglleam vostumnim mhaka uchamboll keloi dekhun, polle, hanv-ui tuji chal tujer thapun tuka farik kortolom – uloita to Sorvespor Dev. Tunvem tujeam soglleam kantalleam velean, kam’char adarlo nhoi?
44. Polle, soglle tujê vixim hi vopar martole: Zoxi avoi, toxi dhuv.
45. Tum tujê avoichi dhuv. Tinnem aplea potik ani bhurgeank kikont korta. Ani tum tujeam bhoinninchi bhoinn. Tim apleam potink ani bhurgeank kikont korta. Tuji avoi Hitit ani tuzo bapui Amorit.
46. Samaria tuji vhoddli bhoinn. Ti ani ticheo dhuvo tujea dhavean ravtat. Sodom tuji dhaktti bhoinn. Ti ani ticheo dhuvo tujea uzvean ravtat.
47. Tori astam tum tanchea vattannim bhonvunk na-i, nhoi mhonn tanche kantalle tunvem adarunk na-i, tuka tem unnem dislem. Soglle tujê chalin tum tanchea-von odik padd zalem.
48. Mhojea jivan sangtam – uloita to Sorvespor Dev – Sodom tujê bhoinnin, tinnem ani tichea dhuvamnim tujê ani tujeam dhuvam porim korunk na.
49. Polle, Sodom tujê bhoinnichem noxtteponn mholler hem: gorv, pottarth, sust jinnem, tujê ani tujeam dhuvam sovem vostalim punn tinnem dubllenak ani gorjevontank hat dilo na.
50. Ani tim mijaxi aslim ani mhojê mukhar tãnnim kantallo adarlo, hem pollenam fuddem hanvem tankam pois kelim.
51. Samarien, tujea-von ordhan legun patkam adarunk na; Tanche-von odik tumi kantallo adarla.
52. Tujeam patkam vorvim, tujeam bhoinnam-von odik kantallo tunvem adarloi mhonn ani he porim tujeam bhoinnancho opradh unno keloi mhonn, tum loz bhog. Tim tujê-von odik promannik. Tunvem tujeam bhoinnank niropradhi kelim-i mhonn, tum lojek podd ani loz bog.
53. Hanv tanchem doiv bodoltolom: sodomachem ani ticheam dhuvanchem doiv, toxench Somariechem ani ticheam dhuvanchem doiv. Ani tanchea vangdda tujem-i doiv bodoltolom.
54. He porim tunvem sogllem kelam-i tachê khatir, tum loz bhogtoli ani lojek poddtoli. He porim karonn tum tankam buzvonn haddtolii.
55. Tujeo bhoinni Sodom ani ticheo dhuvo, Samaria ani ticheo dhuvo, adle doxer ieta tedna, tum-i ani tujeo dhuvo adle doxer portotolim.
56. Tum gorvixtt aslem-i tedna, Sodom tuje bhoinnichem nanv tum ibaddi nasli,
57. tujem noxtteponn dakhol zaunche poilim? Atam tum, Siriecheam dhuvancho ani tanchea xezariancho ani sobhonvtim tuzo dves kortoleam Filistinanchea dhuvancho kedneancho mal.
58. Tum tuzo beabru ani tuzo kantallo sostai, – uloita to Sorvespor Dev.
59. Sorvespor Dev oxem mhonnta: Tunvem kelaim tea pormannem hanv tujê lagim vagtolom. Korar moddun tuvnem soputachi beporva keli.
60. Tori astam, tujea bhurgeaponnachea disamnim tujê lagim kel’lea mhojea koraracho hanv ugddas kortolom ani ek sasnnik korar hanv tujê lagim sthaptolom.
61. Tujê chalicho tuka ugddas ietolo ani tuka loz bhogtoli jedna tujea bhoinnank vhoddlek ani dhakttek, tujeo dhuvo korun ditolom punn hem tujea korarachea dhorman nhoi.
62. Ani Hanvuch mhozo korar tujê lagim sthaptolom ani Hanv Sorvespor Dev mhonn tuka kollon ietolem.
63. He porim soglle jem tunvem kelam tem tuka bhogxilea uprant, tuka ugddas ietolo ani loz bhogtoli ani tujê loje khatir tum anik kodinch tondd ugoddchem naim – uloita to Sorvespor Dev.
