1. Tum, mon'xachea puta, êk vitto ghe ani to tujê mukhar dovor; tacher ek xar kantoi, tem mhollear Jerusalem.
2. Magir tum taka veddho ghal ani tacher êk kil'lo band, sobhonvtim matieche band ubar, ani zhuzachem moidan toiar kôr ani sobhonvtim tacher dhonuxoi mandd.
3. Tum êk lokhonddi pott'tti ghe ani tujê ani xara modem ek lokhonddi durig koxem bosoi; tachê vatten tujem tondd vôll, taka veddho ghal'lo tum polletoloi, tunch taka veddho ghaltoloi. Israelachea Ghoranneachi hi êk khuna.
4. Tum tujea davean add podd ani Israelachea Ghoranneacho guneanv tujer ghe; jitle dis tum add poddlolo aschi title-i dis tum tancho guneanv bhôgtoloi.
5. Dôr-eka vorsa pottim êk dis dhôrun, tin'xim nnovod dis to tunvem bhôgcho mhonn Hanv tharaitam; oso tum Israelachea Ghoranneacho guneanv bhôgtoloi.
6. Ani he dis tunvem palltôch, tum dusrê-i kuxin, uzvean, add podd ani Judachea Ghoranneacho guneanv challis dis tum bhôgtoloi, dôr-eka vorsak êk dis. Hanvem tuka dôr-eka vorsak êk dis tharaila.
7. Ani tujem tondd Jerusaleachea veddhea vatten vôlltoloi, ani tuzo ugto bavllo ubarun tea xara add tum bhakit kortoloi.
8. Ani polle, Hanv tuka doriamnim bandunk vetam ani, tujea veddheache dis sompo porian, tujean hê ani tê vatten vollonk zaunchem na.
9. Tum gonv, zôv, ollsande, vattanne, bazri ani zondlle ghe ani hem sogllem êkêch moddkent ghal ani tuka êk unddo toiar kôr. Jitle dis tum tujê kuxicher add poddtoloi ,t tin'xim-nnovod dis te, tum to khatoloi.
10. Ani tum jevtoloi tem khann disak vis shekelanchea oznan aschem ani tem tunvem ilem-ilem khaunchem
11. Ani tum pietoloi tem udok êk hinacho sovo vantto aschem ani tem tunvem ilem-ilem pieunchem.
12. Lokank dixtti poddtolem toxem mon'xachea guvan bhakri bhaz ani zovachê bhakrê porim kha.'
13. Ani Sorvesporan mhollem: 'Zoim raxttram modem Hanv tankam ximpddaitolom, thoim Israelacheô put-dhuvô bhoxttail'lem jevonn jevtolim.'
14. Hanvem mhollem: 'Na, Sorvespora Deva! Polle, hanv boxttonvk na, nhoi mhonn mhojea bhurgeponnar thaun tem aiz meren mel'lê mon'zatichem vô ran'vott zonavoramnim pisuddlolê mon'zatichem mas hanvem kodinch khaunk na. Ani mhellem mas hanvem kednanch tonddant ghalunk na.'
15. Sorvesporan mhaka mhollem: 'Borem tôr, mon'xachê vixtthê bodlek Hanv tuka gorvachem xenn gheupak ditam; tacher tuzo unddo bhaz.'
16. Tea uprant tannem mhaka mhollem: 'Mon'xachea puta: Jerusaleachem jevonn-khann Hanv bond korpacho asam; tanchea dukollant tanchem jevonn tankam zokhun-mokhun melltolem; tanchê bhoinkor poristhitint, tim pietat te mudok mezlolem-maplolem astolem.
17. Xekim jevonn-khann ani udok na zaun tim besud'd zatolim ani aplea opradhan sukun vetolim.'
