1. Sorvesporachem utor mhaka pavlem; Tannem mhollem:
2. Mon'xachea puta, sondêx di ani oxem sang: "Sorvespor Dev oxem sangta: Hueli mar! Odruxttacho dis!
3. Kiteak dis lagim pavlo, Sorvesporacho dis pavot ailo; kallkia kupancho dis to, raxttrank khast lavpacho dis to!
4. "Torvar Ejiptacher poddtoli, ani jivexim marlolim mon'xam Ejiptant dhortorer poddtolim tedna, tachi dovlôt ubarun vhortole ani tachea buniadincho nas kortole tedna, Etiopiecho dês tollmolltolo.
5. Ethiopieche, Lidieche ani Ludache, ak'khê Arabieche, Libieche bhaddeak ghetlole soinik ani Mhojê lagim Korar kel'lea desachim bhurgim tanchê borabôr torvarin poddtolim.
6. "Sorvespor oxem sangta: "Ejiptak tenko ditat te soglle dês poddtole; tachea bollachem gorv konsllon xevttotolem; Migdola thaun Siene porian torvarin tim mortolim - uloita to Sorvespor Dev!
7. "Osadd poddlolea desam modem soglleam-vôn odik osadd poddlole he dês zatole, ani ghorttann zal'lea nogram modem sogllea-vôn vhodd ghortann zatolem tachea nogranchem.
8. Ani Hanv Ejiptak uzo laitolom ani taka tenko ditat tea soglleancho nas zatolo tedna, Hanv Sorvespor mhonn tankam kollon ietolem.
9. "Tea disa Hanv Mhojea niropiank tarvan dhaddtolom ani te huskea vinnem jietolea Ethiopiekarank bhenkddaitole, ani tancher-ui, Ejiptak ghòddlolem toxem, akant ietolo. Ho dis pavot ailo!
10. Sorvespor Dev oxem sangta: Babiloniechea raza Nebukadnezzarachea hatan Hanv Ejiptachea loskorank nattak kortolom.
11. Taka ani tachea lokak, soglleam-vôn odik krur raxttrak, hea desachi sarki desvatt korunk Hanv haddtolom. Ejiptacher zhuz korunk te apleô torvari bhair kaddtole ani ak'kho dês marloleanchea pretamnim bhôrtole.
12. Soglleô nodi sukoitolom ani dês khottea mon'xank viktolom. Porkea lokachea hatan Hanv ak'khea desachem ani tantum asa tea soglleachem ghorttann kortolom. Hanv, Sorvespor, hem sangun dovortam.
13. "Sorvespor Dev oxem sangta: Menfisantleô ollxikonneô murti Hanv nattak kortolom ani tachea kuddea devank kaddun uddoitolom. Ejiptak fuddari anink ascho na. Ak'khea Ejiptachea desant Hanv bhirant ghaltolom.
14. Patracho Hanv êk osadd ganv kortolom, Joanak uzo laitolom, ani Tebesak Mhojem xikxechem formonn laitolom.
15. Sinacher, Ejiptachea burinjacher, Mhozo krôdh varoitolom; Tebesacheô urponji Hanv nattak kortolom.
16. Ejiptak-ui uzo laitolom: Sinak thorthore ietole; Tebesachim kottam môddtolom ani nogor sarkench buddtolem.
17. Heliopolis ani Bubastis nograntle tornnatte zhuzant mortole ani nograntlea her lokak koidi korun pordesant vhortole.
18. Ejiptachem boll Hanv môddun uddoitolom tedna, apunn bollixtt mhonn vhoddvik dakhoita ti somptoli tedna, Tafanes nogracher disacho soglloch kallôkh poddtolo. Ak'khea Ejiptacher ek kup vistartolem, ani tacho sogllo lôk koidi zaun pordesant pavtolo.
19. Osli xikxa Hanv Ejiptak laitolom. Ani Hanv Sorvespor mhonn tankam kollon ietolem." '
20. Ikravea vorsa, poilea mhoineachea satvea disa, Sorvesporachem utor mhaka pavlem; Tannem mhollem:
21. Mon'xachea puta, Faraohcho, Ejiptachea razacho, Hanvem bavllo môddlo. Polle, torvar dhôrunk taka novean boll mellchem mhonn konnench tacher molom'pott'tti korun to bandunk na.
22. Dekhun Sorvespor Dev oxem sangta: "Polle, Faraohcher, Ejiptachea razacher, Hanv virudh asam; tache don-ui bavlle Hanv môddtolom, dhôdd asa to ani mòddlolo asa to, ani oxi torvar tachea hatantli sokla poddtoli.
23. Ejiptachea lokak Hanv raxttram modem ximpddaitolom ani veg-vegllea desam modem tankam duspottaitolom.
24. Babiloniechea razache bavlle Hanv ghôtt kortolom ani Mhoji torvar tachea hatant ghaltolom. Faraohche bavlle Hanv moddun uddoitolom, ani, dusman tachê mukhar pavtolo tedna, eka mortolea mon'xa bhaxen to pinrgotolo.
25. Babiloniechea razache bavlle Hanv ghôtt kortolom, ani Faraohche bavlle gollgolltole. Ani Babiloniechea razachea hatant Hanv Mhoji torvar ghaltolom tedna, ani to ti Ejiptacher add ubartolo tedna, Hanv Sorvespor mhonn tankam kollon ietolem.
26. Ani Ejiptkarank Hanv veg-vegllea desamnim duspottaitolom; tedna Hanv Sorvespor mhonn tankam kollon ietolem." '
