1. Mhonnttôch tum, mon'xachea puta, Goga add sondêx di ani sang: "Sorvespor Dev oxem mhonntta: Arê Goga, Meshekacho ani Tubalacho odhipoti tum; tori polle, Hanv tujê virudh asam.
2. Hanv tuka portitolom, tuka fuddem vhortolom ani Ut'torechea poixilea ganvam thaun Hanv tuka Israelachea dongrancher zhuz korunk haddtolom.
3. Ani Hanv tujea davea hatantlo tuzo dhonu môddtolom ani tujea uzvea hatantle tuje bann.
4. Israelachea dongrancher tum poddtoloi, tum ani toxench sogllim tujim loskoram ani tujea vangdda asat tim raxttram. Hanv tuka dusrea sovnneank khatolea sorv suknneanchem ani savzanchem khann zaunk uddoitolom.
5. Tum ranant poddtoloi kiteak oxem Hanvem sanglam - uloita to Sorvespor Dev!
6. Ani Magogacher ani sust jietolea kinarianchea lokancher Hanv êk uzo dhaddtolom. Ani Hanv Sorvespor mhonn tankam gomun ietolem.
7. Ani Mhoji Israel-porza Mhojem povitr Nanv vollkun gheunk pavo-xi kortolom ani Mhojem povitr Nanv hea fuddem bhoxttonk diuncho na. Ani Hanv Sorvespor, Israelacho Povitr Dev mhonn raxttram vollkhun ghetolim.
8. "Polle, hem sogllem zatolem, hem ghoddon ietolench - uloita to Sorvespor Dev! Hanvem sanglolo to dis hoch!
9. "Ani Israelachea nograntlo lôk bhair sortolo ani zhuza-hatiaram, ddhal ani pott'tte, dhonu ani ban, tir ani bhale zollôv koso vaportolim; sat vorsam-bhôr tim zollot astolim,
10. ani kheddea-ganvantlo anink zollôv haddchim nant ani ranant-ui rukh katorchim nant; kiteak tim zhuza-hatiaram ujean lastolim. Ani apleanch luttnnarank luttun uddoitolim ani aplea nagovnnarank nagoitolim. Uloita to Sorvespor Dev!
11. "Ani tea disa Gogak Hanv Israelant êk nanvvosto fôndd ditolom; to mhollear Doriachê udentik aslolem Obarimachem Falkem; ani thoim Gogak ani tachea sorv loskorank purtolim. Ietim-vetim tea Falkeant thambtolim; ani tea zageak Gogachea loskoranchem Falkem mhonn nanv ditolim.
12. Tankam purunk ani dês xudh korunk Israelachea Ghoranneak sat mhoine lagtole.
13. Ani desantlo lôk tankam purunk fondd ugôddtolo, ani Hanv Mhoji vhoddvik fankoitolom tea disa tim apnnank vhodd nanv zôddun ghetolim. Uloita to Sorvespor Dev!
14. Ani desantlean vochun zomnir melltat tankam purunk ani zomin xud'dh korunk tim kãi-kãi mon'xank nemtolim. Sat mhoine sorlea uprant tim sôd kortolim,
15. ani desantlean vetana, tanchê modlea konnak-ui mon'xanchim haddam sampoddlim zalear, to tanchê kuxik êk khunna korun dovortolo, ani fondd-kaddpi tankam Gogachea Loskoranchea Falkeant puri-sôr
16. (ani tea-i nograchem nanv Loskoram) ani dês xud'dh kori-sôr ti khunna thoim urtoli."
17. Mon'xachea puta, Sorvespor Dev oxem sangta: "Sogllea jin'sanchea suknneank ani ranantlea sogllea savzank oxem sang: Ektthaim zaun ieiat; Mhojea bolidanak sogllê-koddchim zoma zaun ieiat; tumchêch pasot hem bolidan Hanv kortam, Israelachea dongrancher vhoddlem bolidan, ani thoim tumkam mas khaunk ani rogot pieunk melltolem.
18. Podvedar mon'xanchem mas tumi khatoleat ani prithvechea odhikarianchem rogot pietoleat; te soglle menddre ani menddurle, bokdde ani Bashanache chorboil'le boil.
19. Hanv tumchê pasot korunk vetam tea bolidanant dhadoxi zai-sôr tumi chorob khatoleat ani bebde zai-sôr rogot pietoleat.
20. Mhojea mezar ghoddeank ani ghoddesvorank, virank ani sogllea bollixtt zhuzariank khaun-khaun tumi sarkim dhadoxi zatoleat. Uloita to Sorvespor Dev!"
21. Ani Hanv Mhoji mhoima raxttram mukhar fankoitolom. Ani khastichem formonn Hanv martam tedna, Hanv koso mon'subi kortam to sogllim raxttram polletolim, ani Hanv tankam khast laitam tedna, Mhozo hat kitlo bollixtt to tim dekhtolim.
22. Oxem tea disa thaun sorvkallak Hanv Sorvespor tancho Dev mhonn Israelachea Ghoranneak gomun ietolem.
23. Ani aplea patkam pasot Israelachea Ghoranneak pordesant vechem poddlem mhonn raxttrank kollon ietolem; tim Mhaka ovisvaxi zalim dekhun Hanvem tankam Mhojem mukhamoll lipoilem ani tankam tanchea dusmananchea tabeant sôddlim, ani tim sogllim torvarin morun poddlim.
24. Kanttallo haddtat toslea tanchea ovisvaxiponnak favo toxem Hanvem tankam vagoilim ani tankam Mhojem mukhamoll lipoun dovorlem.
25. Dekhun Sorvespor Dev oxem mhonntta: "Koidi korun pordesant vhel'lea Jakobachea putam-dhuvank atam Hanv portun haddtolom, ani Israelachea ak'khea Ghoranneachi doia kortolom ani Mhojea Povitr Nanvacho man premaxen rakhtolom;
26. apnnem bhôgloli loz tim visortolim, ani toxench, aplea khaxa desant apunn koxim surokxitponnim jietalim ani konnuch apnnank tras dinaslo tedna apunn Mhaka koxim ovisvaxi zalim, tea sogttacho tankam anink ugddas ieuncho na.
27. Raxttram modlim Hanv tankam portun haddtolom ani tanchea dusmananchea hatantlim tankam soddoun zoma kortolom tedna, ani zaitea raxtranchea dolleam mukhar Mhoji povitrtai tanchê modem fankoitolom tedna,
28. Hanv Sorvespor tancho Dev mhonn tankam gomun ietolem; ani tankam raxttram-raxttramnim nirvaxi kelea uprant, atam, tanchê modlea konnakuch soddinastana, tanchea khaxa desant tankam portun zoma keleant to Hanvuch mhonn tankam kollon ietolem.
29. Ani hea fuddem Hanv Mhojem mukhamoll tankam anink lipouncho na, kiteak Hanv Mhozo Atmo Israelachea Ghoranneacher denvoitolom." '
