1. Sorvesporachem utor mhaka pavlem; Tannem mhollem:
2. Mon'xachea puta, mon'subi korunk toiar asai tum? Rogot vikrail'lea xarachi mon'subi korunk toiar asai tum? Sogllim tachim kanttalleachim kortubam tachea dolleam mukhar ghal!
3. Tankam sang: "Sorvespor Dev oxem mhonntta: Jerusalea xara, tujeach lokachem rogot tunvem vikrailãi ani kudde devanchi bhozônn korun tum apunnuch bhoxttoleai: tuzo xevôtt lagim pavla.
4. Tunvem rogot vikrailãi mhonn tuka guneanv asa, tukach kudde dev korun tum bhoxttoleai, mhonnun tuje dis mêzlole asat, tuzo kall somplo atam. Hea pasot Hanvem tuka kelea raxttram mukhar kenddnniancho mhal, ani sogllea desank tujeô moskoriô korunk dilam.
5. Lagxilo ani poixilo lôk tujê moriad naslolê chalik lagun tuji ninda kortolo.
6. "Polle! Israelachea sogllea fuddariam-nim aplêch podvecher patieun tumchê modem rogot vikrailam.
7. Jerusalea Xara, tujê bhitôr konnuch aplea avoibapaik man dina; porkea mon'xank tumchê modem konn-konn tras ditat; tumchê modem konn-konn vidvank ani onathank dogdaitat.
8. Hanv povitr mhonn dhôrtam tea vostunk tumi man dinant, Mhoje Son'var tumi bhoxttaitat.
9. Tumchê modem peleacho jiv kaddchea monan konn-konn dusreancher boglanttam ghaltat; tumchê modem konn dongrancher kuddea devank bhettoilolim orponnam khatat-pietat ani pozoddponnak lobhdol'lim asat;
10. tumchê modem konn apleach bapai lagim pozoddponn korta; konn-konn ap-aplê potini kodde tichea mhoineachea disamnim bollan ekvôtt kortat;
11. Konn aplea xezariachê potini lagim pordvar korta, dusre konn aplea sunank bhurxeponnan bhuloitat; anink konn aplêch bhoinni kodde, aplea khaxa bapaichê dhuvê kodde, ekvôtt korta.
12. Tumchê modem konn-konn lonch gheun peleachem rogot vikraitat; dusre konn aplea bhavbondhank uxnnem ditat ani uxnnem dil'leacher veaz ghetat; tumchea xezariank pillun tumi apunnuch girest zatat; Mhaka tumi visorleat. Uloita to Sorvespor Dev.
13. "Tumi dusreank nagoileant ani dusreanchem rogot varoilam, hea tumchea kortubank khôr khast laitolom.
14. Hanv tumcho hixôb gheunk ietam tea disa Mhaka fuddo korunk tumkam dhir astolo vô tumche hat ghôtt astole mhonn dista tumkam? Hanv Sorvespor hem sangun dovortam ani sanglam tem Hanv kortolonch.
15. raxttram modem Hanv tumkam ximpddaitolom, ani porkea desamnim tumkam dhaddtolom. Ani tumchê modem atam choltat tim sogllim bhurxeponnam Hanv kaddun uddoitolom;
16. tujeach guneanvak lagun raxttranchea dolleam mukhar tum bhoxttail'li zatolii; tedna Hanv Sorvespor mhonn tumkam kollon ietolem." '
17. Sorvesporachem utor mhaka pavlem; Tannem mhollem:
18. Mon'xachea puta, Mhaka zalear Israelachem Ghorannem mhêll zalam: bhatt'ttientlem tambem, potrem, lokhondd, xixem, sogllem misoll kel'lem.
19. Dekhun Sorvespor Dev oxem mhonntta: "Tumi sogllim mhêll zaleant mhonnttôch, borem, soglleank tumkam borabôr Jerusalea bhitôr zoma kortolom.
20. Zoxem rupem, tambem, lokhondd, xixem ani potrem êkêch batt'ttient borabôr ghaltat, ani tankam koddhounk tichê pondak uzo funktat, toxench Mhojea zolltea krodhan Hanv tumkam zoma kortolom ani tumkam koddhoitolom;
21. Khorench, Hanv tumkam zoma kortolom ani tumchea pondak Mhojea ragacho uzo fuktolom, ani tumkam Xara bhitôr koddhoitolom.
22. Zoxem rupem batt'ttient koddhoitat, toxench tumkam-i Xara bhitôr koddhoitolom, ani tedna Hanv Sorvespor mhonn ani tumcher Mhozo rag Hanvem varoilo mhonn tumkam gomun ietolem." '
23. Sorvesporachem utor mhaka pavlem; Tannem oxem mhollem:
24. Mon'xachea puta, Jerusalek oxem sang: "Tum nitôll korunk naslolo dês, Mhojea ragachea disa tujer paus poddunk na.
25. Tujê bhitôr fuddari aplê xikareche kuddke kortana gorozta toslea xinva sarke. Te lokak girastat, tanchi girestkai ani bhanddaram luttun vhortat, ani khun korun zaitea bailank vidva korun sôddtat.
26. Iadnik Mhoji Somurt môddtat ani Hanv povitr mhonn dhôrtam tea vostunk man dinant; Mhojê sevek sonvskarlolea ani sonvsari vostum modem te koslich ontôr korinant, nitoll ani mhelleam vostum modem samballunk zai ti ontôr te lokak xikoinant; Mhojea Son'varank te lokx diich nant ani hea pasot lôk Mhaka man dina.
27. Tichê bhitôr fuddari xikareche kuddke kortolea landdgeam sarke: te rogot vikraitat ani dusreancho astêmal apnnank chorun vhorchê khatir tancho prann kaddtat.
28. Tiche provadi aplea pokoll dorxonamnim ani fottkirea bhakitamnim hea sogllea kortubancher chuno kaddtat; Sorvesporan kãich sangunk na astana, te mhonttat: 'Sorvespor oxem sangta'.
29. Desacho lôk zulum' korit asa ani lutt marit asa; goribank ani gorjevontank dogdaitat ani onit korun desant ravunk ail'lea porkeank tras ditat.
30. Hanvem desacho nas korina zaunk, konn tori ek durig bandit ani khavteant ravun Mhaka fuddo korit ani oxi desachi rakhônn korit kai mhonn polletalom; punn konnuch Mhaka mell'llo na.
31. Mhonnttôch Hanvem tancher Mhozo krôdh denvoilo; Mhojea krodhachea ujean Hanvem tancho bhosm kelo. Tanchim kortubam tancheach mathear poddo-xim kelim. Uloita to Sorvespor Dev!" '
