1. Sorvesporachem utor mhaka pavlem; Tannem mhollem:
2. Mon'xachea puta, Israelachea Ghoranneak ek humannem ghal, êk vopar sang.
3. Oxem mhonn: "Sorvespor Dev oxem sangta: Vixall ani lamb pakhtteancho, vividh ronganchea pakancho, êk vhôdd gorudd Lebanonak pavlo ani devdarachea mathear boslo.
4. Tannem unchlo khando tôddun kaddlo ani to veaparianchea desant vhorun dukan'karanchea xarant dovorlo.
5. Magir tannem desantlem ek bim kaddun vhelem ani tem eka pikall xetant roilem; nodi-degêvoilea eka zhadda bhaxen, tannem tem bhorpur udkachea vhalla-xim ghalem.
6. Tem vaddlem ani sadaronn vhoddaiechi êk sufôll dakvêl zalem; hi dakvêl goruddachê vatten vaddot geli, tichim pallam pondchean vaddlim. Mhonnttôch tem bim zalem êk dakvêl: tika khandiô zaleô ani nove komb futtle.
7. Punn aniêk vhôdd gorudd aslo, vhoddam pakhtteancho ani datt pakhancho. Ani atam tê dak-velin aplim pallam tachê vatten vôllun ghetlim; apunn roil'li asli tea zagear poros odik tannem apnnak ximpchem mhonn, tinnem apleô khandiô tachê vatten lamboileô.
8. Tika khandiô zaunchêo ani tinnem follam diunchim ani oxem ti chôdd molachi dakvêl zaunchi mhonn, tika eka pikall xetant roil'li, eka rund vhallachê degek."
9. Oxem mhonn: "Sorvespor Dev oxem vicharta: Tika ies mellot? To gorudd tichim pallam umttun kaddcho na ani tichim follam ôddun kaddcho na kai? Ani oxem tika zatat tim sogllim novim panam sukun vechim nant? Ani tika pallam soit umttun kaddunk chodd kãi boll naka zatolem vô chôdd lôk-ui naka zatolo.
10. Tika roilea khorem, punn tika ies mellot? Udenticho varo sutt'ta tedna ti sarkich sukun vechi na kai? Khorench, ti vaddtali teach zagear ti sukun vetoli!"
11. Sorvesporachem utor mhaka pavlem; Tannem mhollem:
12. Tea fitur Ghoranneak oxem sang: "Hacho ôrth zannont tumi?" Sang tankam: "Babiloniecho raza Jerusaleak ailo; tannem razak ani kunvrank ubarun vhele, ani tankam Babilonient apnna-xim vhorun dovorle.
13. Tannem raiall ghoranneantlea eka vangddiak ghetlo ani tachê lagim êk korar kelo; apnnak visvaxi ravtolo mhonn soput gheunk tannem taka boll kelem. Desachea heram fuddariank tannem pordesant pavoile.
14. Oxem tem raj lhanuch urtolem ani vhodd zaunk sôdchem na, ani to aplo korar samballtolo ani taka visvaxi ravtolo: hi tachi ievzônn.
15. Punn to kunvôr tacher kolpolo ani apnnak ghodde ani vhoddlim loskoram magun Ejiptak dut pattoile. Taka ies mellot? Oxem korta to monis khast poddonastana urot? Korar môddta ani xikxa poddchi na?
16. Mhojeach jivachean Hanv soput ghetam - uloita to Sorvespor Dev! - Babilonient, mhonngê taka xinvasonar bosoil'lo to raza jieta tea desant, jea raza kodde soput gheun kel'lo korar tannem môddla,tea razachea desant, to mortolo.
17. Faraohchi fouz kitli-i bollixtt zaum ani tachim loskoram kitlim-i vhodd zaum, khub mon'xancho jiv sonkottant ghalun kitle-i matieche band to ubarum ani kitle-i khondok to khonnum, zhuz korun to taka nivarunk xokcho na.
18. Pallunk bhasail'lo to korar moddun tannem aplea soputacho -i tiroskar kelo; itlem kelea uprant, xikxa nastana to sutt'tolo kitem?
19. "Dekhun Sorvespor Dev oxem sangta: Mhojeach jivachean Hanv soput ghetam: Mhaka dil'lea soputacho tannem tiroskar kelo, Mhojê lagim kel'lo korar tannem môddlo, tôr he don-ui Hanv tachea mathear buzo-xe kortolom.
20. Tacher Hanv Mhojem zall uddoitolom, Mhojea fasant to sampoddtolo; Hanv taka Babilonient vhortolom ani Mhaka ovisvaxi zala dekhun thoim taka xikxa laitolom.
21. Tachea loskorantle soglle ut'tom' soinik tolvarin mortole, ani urtat te char-ui vareanchea dixamnim ximpoddtole. Tedna Hanv Sorvespor mhonn tumkam kollon ietolem.
22. "Sorvespor Dev oxem mhonntta: Unch devdar rukhachea mathea velo, tachea soglleam-vôn unchlea khandea velo Hanv êk kombri kaddtolom ani Mhojeach hatan ti eka unch ani mukhêl porvotar roitolom.
23. Israelantlea soglleam-vôn unch porvotar Hanv ti roitolom. Tika khande zatole ani ti follam ditoli, ani vaddon-vaddon ti êk ut'tom' devdar rukh zatoli. Sogllea jin'sachim suknnim tachê khala jietolim, sogllea jin'sacheô pakhtte-asloleô rochnna tachea khandeanchê savllent visôv ghetolim.
24. Ani Hanv Sorvespor mhonn xetam-mollantlea sogllea zhaddank gomon ietolem. Hanv ki unch rukh hinn-holkott kortam ani hinn-holkott zhadd unch ubartam; pachvem-hirvem zhadd Hanvuch sukoitam ani suklolea zhaddak follam utpon'n kortam. Hanv Sorvespor oxem sangun dovortam, ani oxem Hanv kortolonch! " '
