1. Sorvesporachem utor mhaka pavlem; Tannem mhollem:
2. Tum, mon'xachea puta, Tirapasot vilap kôr.
3. Tirak oxem sang: "Doriachê deger xinvasonar boslolea Xara, zaitea kinarianchea ani zunveanchea lokam modem veapar korpi tum; Sorvespor Dev oxem tuka sangta: Tira, tum oxem sangtalii: Hanv bhov sundôr-sobit
4. Tujeô ximô pois somudrant pavtaleô; Tuka bandun kaddlea tãnnim tuka hi sopurnn sobitai sundorai dil'li.
5. Tujim sogllim follim Hermon porvota thaun haddlolea soru-rukhanchim kel'lim. Tujê voir xidd-katthi korunk Lebanona thaun devdar-rukh haddlolo.
6. Bashan'che xindur-rukh haddun tuje vole kel'le. Kittimachea zunveam thaun haddlolea devdarachi hostodantan khonchoil'li malli bandloli.
7. Ejiptantlea nokxil'lea sonni lugttachim kel'lim tujim xiddam ani tuzo bavtto. Elisha zunveam thaun haddlolea zambllea ani tambddea-lal lugttacho kel'lo tujê xidd-katthicho monddôp.
8. Tujê tanddeli Sidon ani Arvad nograntle. Tira, vidvan tujer choddtale ani tarum choloitale.
9. Tujeô khanchi bhôrun haddunk Gebal nograntle zannte ani hikmotiche kamgar asle. Tujê-xim pavtalim somudrant firtalim tim sogllim tarvam ani tanche tarvotti; tim tujê kodde veapar-dhondo choloitalim.
10. "Persieche, Ludache ani Lidieche monis zhuzari koxe tujê foujent seva kortale; aple ddhal ani matheachim xirostrannam tujer lamboun, tujem tez te fankoitale.
11. Arvad nograntle soinik tujê foujê borabôr sogllim tujim kottam rakhtale, ani Gam'madache soinik tujea gopuramnim pahro kortale; aple ddhal tujea kottamnim lamboun tuji sobitai te purnn kortale.
12. Tujê subham' douloti pasot Tarshis tujê kodde veapar kori, ani tuzo mhal gheun tuka rupem, lokhondd, pitull ani xixem haddun dii.
13. Javan, Tubal ani Meshekh tujê lagim veapar-dhondo kori. Tuzo mhal gheun, te tuka gulamam ani kanxeacheô vostu haddun dii.
14. Beth-Togar-mah hangasorlo lôk, tuzo mhal gheun, tuka ghodde, zhuza-ghodde ani kochor haddun dii.
15. Deda-nacho lôk tujê lagim veapar-dhondo kortalo; khub zunveancho-i lôk tujê lagim veapar choloun tuka hostidant ani abnus-lankudd haddun dii.
16. Khub-khub vostu tum kortalii dekhun, Siria tujê kodde veapar-dhondo choloitali, ani tuzo zaito mhal gheun tuka pach, zambllim lugttam, nokxil'lim lugttam, nazuk sonni lugttam, ponvllem ani kirmiji-lal iakutt-mannkam dii.
17. Juda ani Israelacho dês tujê kodde veapar kortale; tujea mhalachê bodlek Min'nith ani Pan'nag ganvancho gonv, mhonv, tel ani molom' tuka dii.
18. Tujeô khub-khub kel'leô vostu ani zaito her mhal tujê koddcho gheun, tuka Helbonacho soro ani Zaharacho kapus dii.
19. Tuzo mhal gheun, Dan ani Javanacho ani Uzala voilo lôk tuka lokhondd, tikhi ani rotam tuka haddun dii.
20. Dedan tujê kodde ghoddea-patti voilea xelancho dhondo kori.
21. Arabia ani Kedarche soglle kunvor tujê kodde veapar-dhondo kori: tuzo mhal gheun tuka kenkre, menddre ani bokdde dii.
22. Sheba ani Ramasache veapari tujê lagim veapar-dhondo kori: tuzo mhal gheun, te tuka unch molacho sambhar-mosalo, motiam-mannkam ani bhangar tuka dii.
23. Haran, Kan'neh ani Eden hea ganvancho lôk, toxench Sheba, Ashur ani Kilmad hea ganvanche veapari tujê kodde veapar-dhondo kori;
24. tujea mhalachê bodlek te tuka girest kopdde, nokxil'le ani zamblle zhube, vividh roganchim zomkhannam ani ghôtt sutanchi ôdoriô tuka dii.
25. Tuzo mhal vhorun Tarxisachim tarvam doriar firtalim; mottem vozon gheun tum bhoron pois somdirant vetalii.
26. Tujê taneli tanddun-tanddun tuka doriachea mazak pavoitale; Udenticho varo suttlo ani doria modem tum futton gelii.
27. Tuji dovlôt, tuzo mhal, tujem vozon, tuje tarvotti ani tuje tandeli, tuje khanch-bhôrpi ani tuje veapari dolal, tujê bhitôr asle te soglle zhuzari, ani tarvar poinn kortat tim sogllim, tum futton vetai tedna, sogllench - mon'xam ani mhal - doriachea pottant buddon vetolem.
28. Tujea tandelincheô bobô-hueli aikun, kinariancho lôk koddkoddtolo.
29. Vole choloitat te soglle tarva voile denvun ietole. Tandeli ani tarvar poinn korpi lôk veller ube ravtole.
30. Aple talle tujê khatir ubarun ddullddulleam tim sogllim roddtolim. Aplea tokler dhul'l uddoun, gobrar poddun lolltolim;
31. tujê khatir aplim mathim tastolim ani penkttak sakafottem ghaltolim. Tujê khatir khontint buddon ddullddulleam roddtolim ani kôddsannin pinrgotolim.
32. Pinrgrun-pinrgum tujê pasot vilap-git kortolim, Hench tem tujê pasot kel'lem vilap-git: Tira bhaxen doria modem ogi poddlolem dusrem anink xar asot?
33. Doriantlean vhorun tuzo mhal denvoitalii tedna, zaitea lokank tum dhadoxi kortalii. Tujê subham' dovlotin ani udôndd veaparacho mhal vanttun, sonvsarachea razank tunvem girest kelei.
34. Punn atam doria modem tum futtlii, ani somdirachê khorik buddon gelii. Tum vhortalii to mhal ani tujer poinn kortalim tim sogllim tujê borabôr buddon gelim.
35. Kinariancher ani zunveancher ravtat tim sogllim tujem odruxtt polleun thottak zatat. Tanche raza koddkoddtat, tanchea tonddar xirxiro chhaplolo asa.
36. Tujem odruxtt polleun raxttranche veapari khillonchi ghaltat. Xirxiro haddta tosli zaleai tum, tuzo nas-vinas zalo, anink kodinch utthchi naim tum!"
