1. Dhavea vorsa, dhavea mhoineachea baravea disa, Sorvesporachem utor mhaka pavlem; Tannem mhollem:
2. Mon'xachea puta, Faraoh Ejiptachea raza vatten vollon polle, ani tachê virudh ani ak'khea Ejipta virudh sondêx di.
3. Uloi ani oxem mhonn: "Sorvespor Dev oxem sangta: Polle, Ê Faraoh, Ejiptachea raza, aplea Nil nodimnim bhonvpi-lollpi manngem tum, ani oxem tum chint'tai: 'Mhoji Nil nôd ti mhojich!', tôr tuka Hanv sangtam: Tuzo dusman Hanv!
4. Tujea daddmonnantlean Hanv ankdde ghaltolom, ani tujea nodintleô maslliô tujea kovllank xirkon urtoleô; ani tujea nodintli soglli maslli tuka xirkol'li asun, tujea nodintlo tuka Hanv ôddun bhair kaddtolom.
5. Tuka Hanv tujea nodintlê sogllê masllê soit oronneant vhorun uddoitolom. Tum uktea moidanar poddtoloi, konn tuka thoinsorlo kaddun vhorcho na ani purcho-i na. Tuka Hanv ranantlea savzanchem ani mollba velea suknneanchem khann zaunk ditolom.
6. Ani Ejiptantlo sogllo lôk, tãnnim Israelachea Ghoranneak lovea itloch tenko dila mhonnun, Hanv Sorvespor mhonn vollkhunk pavtolo.
7. Israelkaram tuka hat lavunk gelim titlê-i pavtti, tunvem tancho hat môddloi ani tanchim bhuzam khankentlim konchoun kaddlim-i. Tuka tenkunk ailim tedna, tunch gollgollon poddloi ani oxem tanchim-i benddam moddon poddlim.
8. "Dekhun Sorvespor Dev oxem sangta: Tujê add Hanv torvar dhaddtam, ani ti tumchê modlim mon'xank ani zonavorank marun uddoitoli.
9. Ejipt osadd poddlolo dês ani oronnem zatolo, ani Hanv Sorvespor mhonn tim vollkhunk pavtolim. 'Mhoji Nil nôd ti mhojich' - oxem tunvem chintleim dekhun,
10. Hanv tuzo ani tujea nodincho virodhi zatam. Ejipt desachem Hanv ek oronnem ani osadd poddlolo zago kortolom, Migdola thaun Siene porian ani hachê pelean Etiopiechea ximam porian.
11. Khoinchoch monis tê vatten aplo pãi ghalcho na, nhoi mhonn ek-ui zonavor porian tê vatten aplo pãi ghalchem na. Challis vorsam-bhôr thoim konnuch ravcho na.
12. Ani Ejipt desak Hanv osadd poddlolea sogllea desam modem odikuch osadd zago kortolom. Ani challis vorsam-bhôr tachim nogram sogllea osadd poddlolea nogram modem odikuch osadd poddlolim zatolim. Ani Ejiptachea lokak raxttram modem ximpddaitolom ani veg-vegllea porzam modem tankam dispottaitolom.
13. Punn Sorvespor Dev oxem sangta: Challis vorsam bollanddon gelea uprant, Ejiptkarank tankam dispottaun dhaddlolem tea raxttram thaun Hanv portun zoma kortolom.
14. Koidi korun vhel'lea Ejiptkarank Hanv portun haddtolom ani tankam novean Pathros desant, tanchea mull-ganvant, jieunk ditolom. Thoim tanchem ek lhan raj zatolem.
15. Ejipt soglleam-vôn hinn raj zatolo ani heram raxttrancher anink kednanch aplo odhikar cholouncho na; kiteak tannem anink kodinch heram raxttrancher razvôttki choloina zaunk, Hanv Ejiptkaranchi sonkia sarki komi kortolom.
16. Ejiptachi gôt oxi zatoli ki Israelachem Ghorannem anink kednanch tacher visvas dovrunk pavchem na; portench, tancho adar magunk vochun kitlem vaitt apnnem kelem tem hi tanchi gôt Israelkarank ugddas kortoli. Ani Hanv Sorvespor mhonn tankam kollon ietolem." '
17. Sot'tavisavea vorsa, poilea mhoineachea poilea disa, Sorvesporachem utor mhaka pavlem; Tannem mhollem:
18. Mon'xachea puta, Nebukadnezzar, Babiloniecho raza, Tiracher zhuz korunk apli fouz gheun gelo. Zhuz itlem lamb ani zodd zalem ki tanchim mathim sarkim boddkim zalim, tanchea bhuzanchi kat zhoron geli; tori Tiracher hem zhuz kel'lean taka, nhoi mhonn tachê foujek, kosloch faido mellunk na.
19. Hea pasot Sorvespor Dev oxem sangta: "Polleiat, Ejiptak Hanv Nebukadnezzarachea, Babiloniechea razachea, hatant ghaltolom. Dês lutt'tun chorun, soglli tachi dovlôt to ubarun vhortolo; ho mhal zatolo tachê foujechi mozuri.
20. Tachea koxttanchi mozuri koxi, Hanv Tirachê bodlek Ejiptaktachea hatant ghaltam (kiteak, khorem mhollear, tãnnim Mhojê khatir kam' kelam). Uloita to Sorvespor Dev!
21. "Tea disa, Israelachea Ghorannem novea bollan soktivont kortolom ani tuka, Ezekiela, tanchê modem tujem tondd ugddun ulounk ditolom. Ani Hanv Sorvespor mhonn tim vollkhun ghetolim. " '
