1. Nnovea vorsa, dhavea mhoineachea dhavea disa, Sorvesporachem utor mhaka pavlem; Tannem mhollem:
2. Mon'xachea puta, aichi tarik boroi, hôi, aichea disachi tarik, kiteak heach disa Babiloniecho raza Jerusaleacher akromonn korunk laglo.
3. Mhonnttôch hê fiturê porjê mukhar hi vopar ghal. Tankam oxem sang: "Sorvespor Dev oxem sangta: Chulicher hem toplem dovor; Hôi, dovor thoinsôr, ani tem udkan bhôr!
4. Atam soglle masache kuddke tantum ghal, bore-bore masache kuddke, donkeanche ani bhuzanche. Bori-borim haddam-i tantum ghal.
5. Hinddantlim borim-borim menddram dhôr, magir chuli pondchean zollôv ghal; hem sogllem sarkem xizoun kadd, haddam porian oxim randun ieum-di.
6. "Kiteak Sorvespor Dev oxem sangta: Rogot vikrail'lea Xarachem, tea kollmel'lea topleachem, kollom' kaddunk zaich na tea topleachem, nisontton zaunchem asa. Ritem kôr tem toplem, tantum asa te masache kuddke êk-êk bhair kadd, bhair kaddunk sorti ghalum naka,
7. kiteak tichê bhitôr ozun rogot vikraitat; tinnem hem rogot tollpacher rokhoilam, dhul'lin tem dhampon urona zaunk tinnem tem zomnir varounk na.
8. Dhul'lin tem rogot dhampon urona zaunk ani oso sudd gheunchê pasot Mhozo krôdh pettounk Hanvench tem tollpar rokhounk dilem.
9. "Dekhun Sorvespor Dev oxem sangta: Rogot vikrail'lea xarachem nisontton zaunchem asa! Hanv-ui ek agttem pettounk chint'tam.
10. Zollovachim lankddam ghalit rav, uzo peroit rav! Mas borench xizoun kadd, pollôv sarko xizun ieum-di, haddam porian lasom-di!
11. Ritem toplem kollxeancher dovortolom ani tem koddok-un zaixem kortolom. Oxem tambem jhigjhigit zatolem, bhitorlo mhêll koddhon vetolo, ani tachi kollom' lason nanch zatoli!
12. "Tori ti soglli kollom' ujean porian bhair sorchi na.
13. Jerusalea, tujea mhellea kortubamnim tum bhoxttouleai. Tuka nitôll korunk Hanvem proitn kele, punn tujea mhelleponnantli tuka nitôll korunk tunvem diunk naim. Mhonnttôch atam tujer Mhozo rag nivo-sôr, tujea mhelleponnantli tum nitôll zaunchich naim.
14. Hanv, Sorvespor, hem sangun dovortam; sanglam tem ghoddon ietolem; Hanvuch tem ghoddo-xem kortolom, ani sôddcho na; doia korchoch na, konnvallai dakhouncho na. Tujê chalik ani kortubank favo toxem, tuji mon'subi kortolom. Uloita to SorvesporDev!" '
15. Sorvesporachem utor mhaka pavlem; Tannem mhollem:
16. Mon'xachea puta, ekach faran tujea dolleanchem dhadosponn tujê thaun Hanv kaddunk vetam. Punn tum vilap korcho naim, roddun boscho naim, dukam gollonk diuncho naim.
17. Ogoch ravun haskar-suskar sôdd, tujê mel'lê potini khatir dukh korum naka, matheak rumal band, pãiank vhannô ghal, tujem khadd dham-pum naka, sodanchem jevonn gheum naka.'
18. Hench hanvem sokallim lokak sanglem, ani têch sanjê mhoji potin meli, ani, dusrê sokallim, mhaka hukum' ghal'lo toso hanvem kelem.
19. Tedna lokan mhaka mhollem: 'Tum kortai tem amkam koxem lagu zata? hachi somzonni diuncho naim tum amkam?'s
20. Hanvem tankam oso zobab dilo: 'Sorvesporachem utor mhaka pavlem; Tannem mhaka oxem mhollem:
21. "Israelachea Ghoranneak sang: Sorvespor Dev oxem mhonntta: Mhojea Mondiracher asa tumchem boll ani tumchi vhoddvik, tacher dolle lavunk tumchem dhadosponn, tachea umbrear tumche pãi dovrunuch tumchim kallzam sontostat; punn atam hem Mhojench Mondir Hanv bhoxttaunk vetam. Tumchê pattlean Jerusaleant urtat teô tumcheô put-dhuvô zhuzant mortoleô.
22. Tedna hanvem kelam toxem tumi kortoleat: tumchim khaddam tumi dhampche nant, sodanchem jevonn tumi gheunche nant.
23. Tumchea mathear tumcho rumal astolo ani tumchea pãiank vhannô astoleô; tumi vilap korche nant, nhoi mhonn roddche nant, punn tumi kel'lea khunam pasot tumi sukun-bhagun vetoleat, ani ekamekak polleun pinrgotoleat.
24. Hê bhaxen Ezekiel tumkam êk khunna. Tannem kelam titlem-i tumi kortoleat. Ani jedna tem ghoddon ietolem, tedna Hanv Sorvespor Dev mhonn tumkam kollon ietolem."
25. Mon'xachea puta, tanchea Devmondiracher asa tanchem boll ani vhoddvik, tacher dolle lavun ravunk asa tanchem dhadosponn, tachea umbrear pãi dovrunuch tanchim kallzam sontostat; tori hea tanchea Devmon-dirachem Hanv atam nisontton korunk vetam; toxench tanchea putank ani dhuvank-ui tanchê thaun kaddunk vetam.
26. Teach disa, nisonttonacho vattavlolo eklo konn ietolo ani tuka hi khobor ditolo.
27. Teach disa, tea vattavlolea mon'xa kodde ulounk tuji jib sutt'toli; tujean ulounk zatolem, tum anink mono urcho naim; tum tankam êk khunna zatoloi ani Hanv Sorvespor mhonn tankam kollon ietolem.'
