1. Mon'xachea puta, Israelachea porvotank sondêx diun oxem sang: "Israelachea porvotamnô, Sorvesporachem utor aikat.
2. Sorvespor Dev oxem mhonntta: Dusmanan tumchê vixim mhollam: 'Arêrê! Thir-ochol porvot amchech zale atam!'
3. Dekhun sondêx diun tankam oxem sang: Sorvespor Dev oxem mhonntta: Xezarchea raxttramnim tumkam padd kele ani tumkam sarkech mostile; oxem tumi dusrea raxttranchea tabeant poddle ani lokam modem tumi chaddiancho ani kenddnniancho mhal zaunk pavle.
4. Dekhun, Israelachea porvotamnô, Sorvespora Devachem utor aikat: Sorvespor Dev porvotank ani dongrank, vhallank ani falkeank, lôk-naslolea ani osadd poddlolea nogrank oxem sangta: Bhonvtonnchea sorv raxttramnim tumkam sarkim luttlim ani kenddnniancho mhal kelim.
5. Hea pasot Sorvespor Dev oxem mhonntta: Heram raxttram add ani Edoma add Mhozo rag boroch pettla ani hea ragan Hanv uloitam. Sontosan murgottun ani sarkich beporva korun tãnnim Mhozo dês aplea tabeant kelo ani tachim chorvachim moidanam luttlim."
6. Dekhun Israelachea desa vixim sondêx di ani porvotank ani dongrank, gholank ani falkeank oxem sang: "Sorvespor Dev oxem sangta: Mhojê premaxen ani Mhojea zolltea ragan Hanv uloilom, kiteak tumi raxttranchi loz bhôgli.
7. Hea pasot Sorvespor Dev oxem mhonntta: Hanvem Mhozo hat ubarla ani tumchê bhonvtonnchea raxttrank kenddnniô bhôgcheô poddtoleô mhonn Hanv soput ghetam.
8. "Punn tumcher, Israelachea porvotamnô, zhaddam-rukhanche khande posortole, ani tankam Mhojê porjê Israela pasot bhorpur follam zatolim, kiteak tim veginch portun ieunchim asat.
9. Polleiat atam, Hanv tumchê vatten asam, ani tumkam proson'n zalam mhonn dakhoitolom. Tumchê zomnichi novean nangornni zatoli; bianchi vompnni zatoli.
10. Hanv tumchea lokachi sonkia vaddoitolom, Israelachea ak'khea Ghoranneachi, khorench soglleanchi. Ani nogram lokan bhoron ietolim ani osadd poddlolea ganvamnim novean ghoram bandon ietolim.
11. Tumcher ravtolea lokachi toxench mon'zatinchi sonkia vaddoitolom. Tim vaddot ani choddot vetolim. Magam tumgher aslo toso, atam-i tumgher lôk ravo-so kortolom, ani tanchi poristhiti adlê poros odik sudharo-xi kortolom. Tedna Hanv Sorvespor mhonn tumkam kollon ietolem.
12. Israel Mhojê porjê, Hanv tuka novean tujea desant jieunk portun haddtolom; tum to dês tujea tabeant ghetolii ani to tuzoch zatolo. Ani to anink kednanch bhurgeam virêt urcho na.
13. "Sorvespor Dev oxem sangta: Lôk tuka mhonntta: Tum mon'xank girastai ani tujem raxttr bhurgeam virêt dovortai.
14. Dekhun hea fuddem tum mon'xank giraschi naim, ani tujem raxttr bhurgeam virêt dovorchi naim. Uloita to Sorvespor Dev!
15. Hea fuddem raxttrancheô kenddnniô tuka aikunk diuncho na, ani raxttram mukhar tuka anink kednanch loz bhògchi na. Ani tum anink kednanch tuzo dês bhurgeam virêt dovorchi naim. Uloita to Sorvespor Dev! " '
16. Sorvesporachem utor mhaka pavlem; Tannem mhollem:
17. Israelachem Ghorannem aplea desant jietalem tedna, tãnnim to dês aplê chalin ani kortubamnim bhoxttailo - mhoineachem zal'lean mhelli zal'lê êkê bailê sarki zal'li tanchi chal Mhojê mukhar.
18. Oxem asun, Hanvem Mhozo krôdh tancher varoilo kiteak tãnnim desant rogot vikrail'lem ani kuddea devanchi seva korun to dês bhoxttail'lo.
19. Ani Hanvem tankam raxttram modem ximpddailim ani oxem veg-vegllea desamnim tim ximpddon gelim. Tanchê chali ani tanchea kortubam pormannem Hanvem tanchi nit keli.
20. Ani jea-jea raxttramnim tim pavlim, thoinsor-ui tãnnim Mhojem Povitr Nanv bhoxttailem, kiteak tanchê vixim lôk mhonnunk laglo: "Hich ti Sorvesporachi porza; tori Tachea desantli tankam bhair vechem poddlem."
21. Punn Israelachem Ghorannem pavlem tea raxttram-nim tãnnim Mhojem Povitr Nanv bhoxttailam; dekhun tea Mhojea Povitr Nanvachi ixim' rakhcho Mhaka husko asa.
22. Hea pasot Israelachea Ghoranneak oxem sang: "Sorvespor Dev oxem mhonnta: Israelachea Ghorannea, tujê pasot Hanv hem korina, punn fokot tunvem raxttram modem bhoxttail'lea Mhojea Povitr Nanva khatir.
23. Mhojea Nanvachi povitrtai raxttram modem bhoxtton geli, tuminch ti bhoxttailea. Hea Mhojea Nanvachi povitrtai Hanv novean rakhun dovortolom. Ani jedna tumchê vorvim tanchea dolleam mukhar Hanv Mhoji povitrtai fankoitolom, tedna Hanv Sorvespor mhonn raxttram vollkhunk pavtolim.
24. Kiteak Hanv tumkam raxttrantlim bhair kaddtolom ani sogllea desantlim kaddun novean zoma kortolom ani tumchea khaxa desant portun haddtolom.
25. Tedna xud'dh-nitoll udok tumcher varoitolom ani tumi xud'dh-nitoll zatoleat. Sogllea tumchea mhelleponnantlim ani murtink lagun tumkam laglolea ghanniareantlim Hanv tumkam xud'dh kortolom.
26. Hanv tumkam ek novem kalliz ditolom ani tumchê bhitôr êk novo atmo ghaltolom. Tumchea angantlem tumchem fatrachem kalliz Hanv konchoun kaddtolom ani tumkam ek masachem kalliz ditolom.
27. Hanv Mhozo Atmo tumchê bhitôr ghaltolom ani tumi Mhojea kaideanchea margar cholo-xem kortolom; ani tumi Mhoje nirnnoi manan vollkhun ghetoleat ani samballtoleat.
28. Ani Hanvem tumchea purvozank dil'lea desant tumi ravtoleat. Ani tumi Mhoji porza zatoleat, ani Hanv zatolom tumcho Dev.
29. Tea bhair, tumkam mhellim kortat tea sorv tumchea kortubantlim Hanv tumkam soddoitolom. Hanv orovak adnia ditolom ani to subham'ponnan vaddoitolom; ani hea fuddem tumkam anink dukôll bhôgunk diuncho na.
30. Hanv rukhanchim follam ani xetachem utpadon vaddoitolom; oxem hea fuddem dukôll poddla mhonn raxttram modem tumkam beman bhògcho na.
31. Tedna tumchê vaitt chalicho ani kortubancho tumkam ugddas ietolo. Tumchea guneanvak ani ollxikonnea kortubank lagun tumkam tumchoch kanttallo ietolo.
32. Hem mat zanno zaiat: tumchêch pasot hem Hanv korinam - uloita to Sorvespor Dev! Israelachea Ghorannea, tumchêch chali pasot lojen bhoron tondd dhampat.
33. "Sorvespor Dev oxem mhonntta: Tumchea guneavantlim Hanv tumkam xud'dh kortolom tea disa Hanv nogram novean lokan bhôrtolom ani ghorttann zal'le ganv novean bandon ie-xe kortolom.
34. Adim sogllim ietim-vetim he zage osadd poddleat mhonn polletalim, tôr teanch zageantlem lôk pik kaddtolo.
35. Ani lôk oxem mhonnttolo: 'Halinch osadd poddlolo aslo to dês atam Eden bagê sarko zala, ani adim ghorttann zal'lim, moddon poddlolim ani sôddun dil'lim nogram atam kottam zaleant ani tantum lôk tthikann korun asa.
36. Moddon uddoil'lem sogllem Hanvem, Sorvesporan, novean bandun kaddlam mhonn ani padd zal'lê tê zomnint Hanvem novean roilem mhonn tujê bhonvtonni mozun asat tim raxttram vollkhunk pavtolim. Hanv, Sorvespor, oxem sangun dovortam, ani Hanv oxem kortolonch!
37. "Sorvespor Dev oxem sangta: Anink êk Mhojê opurbaiechi khunna tankam ditolom: Israelachea Ghoranneak novean Mhojê-xim ieun Mhoji modôt magunk ditolom. Mon'xancho hindd zal'lê porim Hanv tanchi sonkia vaddoitolom;
38. bolidanak toiar kel'lea mon'zatinchea hindda porim, Jerusaleak dobajik utsovank haddlolea hindda bhaxen, oxench tumchim osadd poddlolim nogram mon'xanchea hinddamnim bhoron ietolim, ani Hanv Sorvespor mhonn tankam kollon ietolem." '
