1. Tannem mhaka mhollem: 'Mon'xachea puta, tujê mukhar asa tem kha; ho kovllo kha; magir voch ani Israelachea Ghorannea kodde uloi.'
2. Hanvem mhojem tondd ugôddlem; Tannem mhaka to kovllo khaunk dilo.
3. Magir Tannem mhollem: 'Hanv tuka ditam tea kovllean tujem pott bhôr ani dhadoxi za.' Hanvem to khelo ani to mhojea tonddant mhonva itlo gôdd zalo.
4. Magir Tannem mhaka mhollem: 'Mon'xachea puta, chol voch, Israelachea Ghorannea-xim voch ani Hanv tuka sangunk laitam titlem-i tankam kollit kôr.
5. Kiteak avghodd ani porki bhas uloitolea loka-xim Hanv tuka pattoi na, punn Israelachea Ghorannea-xim tuka dhaddtam.
6. Tuka somzonasloleô avghodd ani porkeô bhasô uloitolea puskoll porzam sorxim Hanv tuka dhaddina. Khorem mhollear, tanchê sorxim Hanvem tuka pattoil'lo zalear, tim tuka aikotolim aslim.
7. Punn Israelachem Ghorannem tuka aikunchem na, karonn tim Mhaka aikunk toiar nant. Kiteak Israelachem ak'khem Ghorannem nibôr manichem ani urmott kallzachem zalam.
8. Punn atam Hanv tuka tanchê itlo nibôr manicho kortam, ani tanchê itlo thir-ghott kallzacho.
9. Hanv tujem mon vozra sarkem ghôtt ani paxonni fatra poros nibor kortam. Tankam bhieum naka. Zori tim ek fituranchem Ghorannem, tori tankam polleun tum akantum naka.'
10. Magir Tannem mhaka mhollem: 'Mon'xachea puta, Hanv tuka sangtam tim sogllim Mhojim utram chit diun aik ani ghôtt monant dhôr.
11. Magir nirvaxi zal'lea tujê porjechea putam-dhuvam sorxim voch, tanchê lagim uloi ani, tim aikum vô na aikum, tankam sang: "Sorvespor Dev oxem sangta".'
12. Tedna Atmean mhaka voir ubarlo ani mhojê pattlean êk vhôdd ghoddghoddeacho avaz hanvem aikolo; to avaz oso sadtalo: 'Tachea unchlea tthikannant Sorvesporachê mhoimek vakhann'nni!'
13. Ho avaz jivea rochnnanchea ekamekak adolltolea paktteancho ani tanchê kuxik aslolea chokrancho avaz, vhôdd dhornnkampichea avaza sarko.
14. Atmean mhaka voir ubarlo ani mhaka vhelo; hanv gelom, punn kalliz zal'lem koddu ani hanv challovl'lom. Sorvesporacho hat mhojer ghôtt boslolo aslo.
15. Hanv Tel-Abib ganvant pavlom: thoim, Kebar Nodi lagim, amcho nirvaxi lôk ravtalo: Mhaka ghòddlolem taka lagun monak dhok'ko boslolean, thoinsôr tanchê modem sat dis-bhôr ogoch ravlom.
16. Sat disam uprant Sorvesporachem utor mhaka pavlem; Tannem mhollem:
17. Mon'xachea puta, Hanvem tuka Israelachea Ghoranneacho pahrekar nemla. Mhojea tonddantlem utor aikotai tedna, Mhojea nanvan tankam xiddkai.
18. Eka khottea mon'xak Hanv oxem mhonnon zalear: "Tum mortoloi", ani tum tea mon'xak xiddkaina zaxi, ani oslea noxttea mon'xak aplem noxttem jivit sôddun diunk ani oxem aplo jiv vanchounk tum uloun xiddkaina zaxi tôr, to noxtto monis aplea guneanva pasot mortolo khoro, punn tachea mornnacho Hanv tuka zobabdar kortolom.
19. Punn tum eka noxttea mon'xak xiddkaixi ani tori astam to aplem noxtteponn ani vankddi vatt sôddun diunk kobul na zait tôr, noxtto monis aplea guneanva pasot mortolo, punn tum tuzo jiv vanchoitoloi.
20. Promannik monis aplem promannikponn sôddun vaitt korunk lagit tôr, ani Hanv taka fas manddin zalear, to apunn mortoloch; tunvem taka xiddkaunk naim mhonnttôch, to aplea guneanva pasot mortolo ani tachea promannikponnacho anink Hanv ugddas korcho na; punn tuka Hanv tachea mornnacho zobabdar kortolom.
21. Punn eka promannik mon'xak vaitt korina zaunk tum xiddkaixi zalear ani ho monis patok korina zait tôr tujê xiddkavnnek lagun to jivo urtolo, ani tum-i tuzo jiv vanchoitoloi.'
22. Hanv thoim astana, Sorvesporacho hat mhojer denvlo; Tanne mmhollem: 'Utth, bhair sorun falkeant voch, ani thoim Hanv tujê lagim uloitolom.'
23. Hanv utthlom ani bhair sorun falkeant gelom. Zoso hanvem Sorvesporachi mhoima Kebar Nodi-xim dekhloli, toxich atam ti Tachi mhoima thoim tharloli asli; ani hanv saxttangim poddlom.
24. Tedna Sorvesporacho Atmo mhojê bhitôr ieun riglo ani Tannem mhaka ubo kelo. Tedna Sorvespor mhojê lagim oso uloilo:' Voch ani tujea ghorant bhitôruch rav.
25. Tuka, mon'xachea puta, doramnim bandtolim, ani loka modem vochunk tujean zaunchem na.
26. Hanv tuji jib talliek pankoitolom ani tum mono zatoloi ani tujean tankam bhexttaunk zaunchem na, kiteak tim ek fituranchem Ghorannem.
27. Punn, jedna Hanv tujê lagim uloitolom, tedna Hanv tujem tondd ugôddtolom, ani tum tankam mhonnttoloi: "Sorvespor Dev oxem sangta. Kãi zonnam aikotolim, ani kãi zonnam beporva kortolim," kiteak tim ek fituranchem Ghorannem.'
