1. Sorvesporachem utor mhaka pavlem; Tannem mhollem:
2. Mon'xachea puta, Magogachea desant ravtolea Goga vatten tujem tondd vôll; Meshek ani Tubal desancho mukhêl odhikari to, ani tachê virudh ho sondêx di. Oxem sang:
3. "Sorvespor Dev oxem mhonntta: Hanv tujê add asam.
4. Ani Hanv tuka portitolom, ani tujea dhaddmonnamnim goriô ghaltolom; ani teô tuka tujê ak'khê foujê soit bhair kaddtoleô: ghodde ani ghoddesvor, sogllech zhuzak toiar kel'le, dhal ani pott'tte ghalun ani hatan torvar dhôrun asloli vorixtt fouz.
5. Persia, Ethiopia ani Libia tanchea vangdda asat, sogllech ddhal dhôrun ani matheak tôp ghalun;
6. Gomer and tachim sogllim loskoram, pois aslolea Ut'torecho Beth-Togarmas ani tachim sorv loskoram, ani zaitim her raxttram tujea vangdda asat.
7. Toiar rav, hôi, sarko toiar rav, tum ani tujim sogllim loskoram ani tujê bhonvtim zoma zal'lim sogllim dusrim loskoram, ani Mhoji chakri korunk toiar ravat.
8. "Zaite dis sorlea uprant Hanv tuka apoun hukum' ditolom. Ietea vorsamnim ghorttann zal'lea ani novean bandun kaddlolea eka desant tum bhitôr sortoloi; heram lokam thaun pois ravpi tea desantlo lôk sust jieun astolo, kiteak tim torvari thaun sutton ail'lim ani zaitea raxttram thaun zoma zal'lim;
9. eka vadolla porim tum uprastoloi ani eka kupa porim to dês dhamptoloi: tum ani sogllim tujim loskoram ani tujea vangdda zaiteô her porza.
10. "Sorvespor Dev oxem mhonntta: Tea disa êk kolpona tujea monant upzotoli ani tum êk nixttur ievzônn rochun haddtoloi.
11. Ani tum oxem mhonnttoloi: ´Hanv atam rakhônn-naslolea hea desacher choddun vetam, ani surokxit-ponnim jietolea hea xantraxttrak hanv ghuri ghaltolom; tim sogllim kottam vô addambe vô darvontte naslolea nogramnim jietat.
12. Nagounk ani luttunk mhonn tumi etoloi, ani tim jietat tea padd zal'lea zageancher tuzo bollixtt hat ubartoloi; raxttram thaun ho lôk zoma zala, gorvam-menddram pôsun ani veapar korun sonvsarachea mazak to jieta.
13. Sheba ani Dedan hangasorlo lôk ani Tarshishache soglle veapari ani girest monis tujê lagim vichartole: Nagounk ailai rê tum? Lutt marunk tujim loskoram tum zoma kortai? Bhangar ani rupem ubarun vhorunk, menddram-gorvam ani dusro mhal dhôrunk ani bhov girest lutticho mhal gheun vochunk ailai tum?"
14. Mhonnttôch, mon'xachea puta, sondêx di ani Gogak oxem sang: "Sorvespor Dev oxem mhonntta: Mhoji porza Israel surokxitponnim jieta astananch tum bhair sorunk ievjitai mhonn khorem nhoi?
15. Poixilê Ut'torek aslolea tujea desa thaun tum bhair sortoloi, tum ani tujea vangdda zaitim her raxttram, ghoddeancher bosun ievpi hixôb-naslolea loskoranchi vorixtt fouz.
16. Ani Mhojê Israel-porjechea desak ghuri ghaltoloi. Eka kupa vori tancho dês dhamptoloi. Punn xevottak Hanv khaxa Mhojea desak ghuri ghalunk tuka haddtolom, ani, jedna, Goga, tujê vorvim Mhoji povitrtai raxttram mukhar fankoitolom, tedna Hanv konn to tim vollkhunk pavtolim.
17. "Sorvespor Dev oxem sangta: 'Magam, Israelachea provadiam Mhojea sevokam vorvim, tujêch vixim Hanv uloilom. Tum ghuri ghalunk ietoloi mhonn tea disamnim tãnnim bhakit korun sondêx dil'lo.
18. Tea disa, Gog Israelachea desacher akromonn kortolo tedna, - uloita to Sorvespor Dev! - Mhozo zollto krôdh perun choddtolo.
19. Ani Mhojea ragan, Mhojea krodhachea zolltea ujean, Hanv oxem mhonnttam: Tea disa Israelachea desant êk motti dhornnkamp zatoli mhonn Hanv soput gheun sangtam.
20. Ani doriachi maslli, varea velim suknnim, ranantlim savzam ani prithver sorpottun choltat tim sogllim jivannim ani prithver jietat tim sogllim mon'xam Mhojea mukhamolla mukhar koddkoddtolim. Soglle porvot konsolltole, unchlim khoddpam khala poddtolim ani sogllim durgam zomnir apttotolim.
21. Ani sorv jin'sanchim noxttam tachê virudh dhaddtolom - uloita to Sorvespor Dev! Dôr-êk monis apli torvar aplea bhavacher ubartolo.
22. Ani zorimori dhaddun ani rogot vikraun Hanv taka xikxa laitolom; ani tacher, tachea loskorancher ani tachea vangdda aslolea puskoll raxttrancher Hanv bhorpur paus ghaltolom, korve rokoitolom, uzo ani gondhok denvoitolom.
23. Ani oso Hanv Mhakach vhoddvik zôddtolom ani Mhoji povitrtai fankoitolom ani tea zaitea raxttrank Mhaka vollkhun gheunk pavoitolom. Ani Hanv Sorvespor mhonn tim vollkhun ghetolim." '
