1. Sorvesporachem utor mhaka pavlem; Tannem mhollem:
2. "Mon'xachea puta, Tirachea razak oxem sang: "Sorvespor oxem sangta: Tujem kalliz gorvan ful'lam dekhun, tunvem oxem chintleim: Hanv êk dêv; doriachea mazar eka deva bhaxen hanv sodrer boslam. Dev zal'lê porim Devachim chintnam monant gholloitai, Punn, khorem mhollear, tum fokot monis, tum dêv nhoi!
3. Daniela poros tum xanno mum rê?! Kosloch gupit gutt tuka liplolo na mum?!
4. Tujê zannvaien ani tujê hikmotin tuji dovlôt-girestkai tunvem vaddoileai, tujea bhanddaramnim tunvem bhangar ani rupem santthoun dovorleãi.
5. Itli vhôdd tuji hikmôt ki tuzo astêmal vaddot-choddot gelo, ani hê tujê dhon-girestkaiê pasot tujem kalliz odikuch gorvan ful'lem.
6. "Dekhun Sorvespor Dev oxem sangta: Apunn Dev mhonn tum chint'tai dekhun,
7. polle, krur porkea raxttrank tujer zhuz korunk haddtolom. Tuji ti boddaiechi zannvai tim torvarin tôptolim, tuji mhoima bhoxttaitolim
8. Tuka fonddant xevttun uddoitolim, ani tum doria modem zobordosti bhôgun mortoloi.
9. Tuka marunk ietoleam mukhar ozun apunn êk dêv mhonn chint'toloi? Punn tuka marunk ietoleanchea tabeant poddtoloi tedna, tum Dev nhoi punn fokot êk monis mhonn tuka gomun ietolem.
10. Porkea mon'xanchea hatamnim sunôt korunk naslolea mon'xam bhaxen tum mortoloi! "Kiteak oxem Hanv sangun dovortam - uloita to Sorvespor Dev! " '
11. Sorvesporachem utor mhaka pavlem; Tannem mhollem:
12. "Mon'xachea puta, Tirachea raza pasot ek vilap-git kôr. Taka oxem sang: "Sorvespor Dev oxem sangta: Tum sopurnnaiecho nomuno asloi, zannvaien bhòrlolo, ut'tom' sundoraieacho;
13. Edenant, Devachê bagent, tum asloi, sogllea jin'sanchea mannkam-rotnamnim tujem ang pangurtaloi: kirmiji-lal mannkam ani hollduvim rotnam, vozram, chondrokant ani xivdhatu, suriakant, nillrotnam, tambddim mannkam ani pach, ani kanantle bhangarache xringar; hem sogllench tujea zolma-disa toiar korun dovorlolem.
14. Vistarlolea pakhtteancho Hanvem tuka êk jivo rakhnno kelo, Devachea povitr porvotar tum asloi, tambddea-zolltea kollxeancher tum tokli voir kaddun bhonvtaloi.
15. Tujem khotteponn poilê pavtti uzvadda ie-sôr tujea zolma-disa thaun tuji chal chuki-vinnem asli.
16. Veapar-dhondeacheruch urlem tujem mon ani hachêch pasot tum zobordosti ani patok korunk pavloi. Dekhun Devachea porvota thaun Hanvem tuka xevttun uddoilo, ani tuka, vistarlolea pakhtteanchea rakhnnea, kollxeam modem nattak kelo.
17. Tujê sundoraiek lagun tujem kalliz gorvan bhòrlem, tujea teza pasot tuji zannvai padd zaun geli, tuka Hanvem dhortorer xevttilo, heram razank budh xikounk tanchê mukhar tuka Hanvem uddoilo.
18. Tujea veapar-dhondeant itlem chodd vaitt tunvem keleim, ki tujem povitr mondir tunvem bhoxttaileim. Dekhun tuka girasunk tujêch thaun Hanvem êk uzo pettoilo; tujer atam nodor ghaltat titleank-ui dixtti poddchê khatir, tuzo Hanvem gobôr kelo ani ho dhortorer uddoilo.
19. Raxttram modem tuka vollkhotat titlim-i Tujem odruxtt polleun thorthorlim. Tum zaloi soglleank kanntallo, poddlai to anink kednanch utthcho naim!" '
20. Sorvesporachem utor mhaka pavlem; Tannem mhollem:
21. Mon'xachea puta, Sidona vatten vollon polle ani tachê virudh sondêx di.
22. Oxem mhonn: "Sorvespor Dev oxem sangta: Sidon nogra, tuzo dusman Hanv, tujê bhitôr Mhoji mhoima fankoitolom! Tacher khastichem formonn martolom ani Mhoji povitrtai tachê bhitôr fankoitolom; tedna Hanv Sorvespor mhonn tim vollkhunk pavtolim.
23. Kiteak Hanv tichê bhitôr mari-pidda dhaddtolom, ani tachea rosteancher rogot vikrai-xem kortolom, ani sogllea vattamnim torvar tacher ubartole tedna, tachê bhitôr tim morun poddtolim, ani tedna Hanv Sorvespor mhonn tim vollkhunk pavtolim.
24. "Tea uprant, Israelachea Ghoranneak bhonvtonnchea sogllea virodhi raxttrantlem ek-ui raxttr taka dukh dita tosli kantteri zaunchem na; ani tedna Hanv Sorvespor Dev mhonn tim vollkhunk pavtolim.
25. "Sorvespor Dev oxem sangta: Israelachea Ghoranneak tem duspotton gelam tea raxttram modlem Hanv zoma kortolom tedna, raxttranchea dolleam mukhar Hanv tanchê sovem Mhoji mhoima fankoitolom. Tedna Jakobak Hanvem dil'lea desant tim tthikann kortolim.
26. Thoim tim surokxitponnim jietolim, ghoram bandtolim, dakam-molle laitolim. Hôi, tanchea bhonvtonnchea sogllea virodhi raxttrank Hanvem xikxa lailea uprant, tim khorench surokxen jietolim, ani Hanv Sorvespor tancho Dev mhonn tim vollkhun ghetolim." '
