1. Sorvesporachem utor mhaka pavlem; Tannem mhollem:
2. Mon'xachea puta, tujea desantlea loka kodde uloun tankam oxem sang: "Hanv eka desa virudh zhuz korunk nirmitam tedna, to lôk apnna modlea ekleak pahredar zaunk venchun kaddta;
3. êk fouz desacher zhuz korunk ieta mhonn to polleta tedna, aplo korno vazoun to lokak gomoita.
4. Konn tôr, korneancho avaz aikola astam, taka chit dinant, ani torvar pavta ani tancho jiv kaddta, tim apunnuch aplea mornnachim zobabdaram zatat.
5. Tãnnim korneancho avaz aikol'lo, punn chit diunk na: tanchem moronn tanchêch chukin tancher ieta. Punn chit ditat tim aplo jiv rakhun dovortolim.
6. "Punn pahredar, dusman ieta mhonn polleun-ui, aplo korno vazoina zalear, ani oxi lokak khobor mellona ani dusman pavta ani lokantlea konnancho-i jiv kaddta zalear, him mon'xam apleanch guneanvank lagun mortolim khorem, punn Hanv pahredarak-ui tanchea mornnacho zobabdar kortolom."
7. Mon'xachea puta, Hanvem tuka Israelachea Ghoranneacho pahredar nemla. Mhojea tonddantlem ek utor tum aikotai tedna, tankam tem gomoi.
8. Khoinchea-i noxttea mon'xank "Noxttea mon'xamnô, tumi mortoleatuch", oxem Hanv sangunk dhaddin zalear, ani tum tea noxttea mon'xank apli noxtti vatt sôddun diunk xiddkainaim tôr, tim noxttim mon'xam ap-aplea noxtteponnant mortolim, punn Hanv tuka tanchea mornnacho zobabdar kortolom.
9. Punn tum noxttea mon'xank tanchi noxtti vatt dakhoun jivit bodlunk xiddkaitai zalear, ani tim mon'xam apli vatt sôddun dinant tôr, tim ap-aplea noxtteponnak lagun mortolim, punn tum tuzo jiv rakhun dovortoloi.'
10. Mon'xachea puta, Israelachea Ghoranneak oxem sang: "Tumi oxem sangit asat: Amchea opradhancho ani amchea patkancho bhar amcher asa; tankam lagun amcho jiv virghun veta. Koxim mhonn ami jivim urtoleanv?"
11. Tankam oxem sang: "Mhojea jivachean - uloita to Sorvespor Dev! - noxttea mon'xanchea mornnan Mhaka sontôs mellona; punn noxttim mon'xam apli vatt sôddun diun aplo jiv rakhun dovortat tedna ki Mhaka sontôs bhògta. Toxem tôr, jivit bôdlat, tumcheô noxtteô vattô sôddun diat. Kiteak mhonn tumi morunk sôdtat, Israelachea Ghorannea?"
12. Mon'xachea puta, tujea lokak oxem sang: "Promannik monis vaitt korunk lagit zalear, tachem promannikponn tacho jiv rakhun dovorchem na; ani noxtto monis aplea noxtteponnachi vatt sôddun dita tedna, tachem adlem noxtteponn tacher khast haddchem na. Khoinchoch promannik monis, patkachi vatt dhôrunk laglo zalear, to aplea adlea promannikponna vorvim aplo jiv rakhunk pavcho na.
13. Eka promannik mon'xak oxem Hanv sangin zalear Tum jivo urtoloi, - ani tedna aplea promannikponnacher patieun to noxtteponn korit tôr, tachea adlea promannikponnacho Hanv anink ugddas korcho na; punn tannem kel'lea noxtteponna pasot to mortolo.
14. Portench, eka noxttea mon'xak Hanv oxem sangin zalear: Tum mortoloch!, punn to aplea patkak patt korun Somurt pallunk lagit ani promannikponnachi vatt dhôrit tôr,
15. apnna kodde ghannak dovorloleô vostu portit, apnnem chorun kaddlolem portem diit, jivit ditat te kaide pallit ani noxtteponn anink korina zait tôr, to jivo urtoloch, to morcho na.
16. Taka khast lavchê khatir tannem kel'lea sogllea patkancho Hanv anink ugddas korcho na; Somurtiche kaide to pallunk laglo ani promannikponnachi vatt tannem dhôrli mhonnun, to jivo urtoloch.
17. "Punn tujea desantlo lôk mhonntta: Sorvespor korta tem sarkem na. Punn khorem mhollear tim kortat tem ki sarkem na.
18. Êk promannik monis promannikponnachi vatt sôddta ani noxtteponn korunk lagta tedna, haka lagun to mortolo.
19. Punn êk noxtto monis apli noxtteponnachi vatt sôddun dita ani Sormurtichea kaideam pormannem cholta ani promannikponnachi vatt dhôrta, haka lagun to jivo urtolo.
20. Tori astana tumi mhonnttat: Sorvespor korta tem sarkem na! Israelachea Ghorannea, tumchê modlo ek-eklo korta tea pormannem Hanv ek-ekleachi mon'subi kortolom." '
21. Amchea pordesachea baravea vorsa, dhavea mhoineachea panchvea disa, konn-eklo monis Jerusalea thaun pollun ailo; tannem mhaka sanglem: 'Amchem Xar dusmananchea hatant poddlem.'
22. Ho pollun ail'lo monis pavchê adim, sanjechea vellar Sorvesporacho hat mhojer aslo; to pollun ail'lo monis dusrea disa sokalli mmhojê-xim pavchê adim, Sorvesporan mhoji jib suttoil'li; mhojea tonddantlim utram suttunk laglolim, ani hanv anink mono urunk na.
23. Tedna Sorvesporachem utor mhaka pavlem; Tannem mhollem:
24. Mon'xachea puta, Israelachea desant, ghorttanna modem ravtolim mon'xam oxem uloitat: "Abraham' ekloch aslo, ani tachea hatant Devan ho dês ghal'lo. Ami zalear atam zaitim zannam asanv; ho dês amchem daiz zaunk amkam dil'lo asa."
25. Tea pasot tankam oxem sang: "Sorvespor Dev oxem sangta: Rogot tumchem jevonn zalam, tumi tumchea kuddea devank tumche dolle ubartat ani rogot vikraitat! Ani tori astam ho dês tumchea hatant urtolo?
26. Tumi tumchea torvarincher patieun ravtat, ani sogllim tumi noxttim kortubam korit asat, tumchê modlo ek-eklo aplea xezariachê potini kodde pordvar korta! Ani tori ho dês tumchea hatant urtolo?"
27. Oxem sang tankam: "Sorvespor Dev oxem sangta: Mhojea jivachean soput gheun sangtam, ghorttannam modem jietat tim torvarin mortolim, ani kheddea-ganvamnim ravtat tankam Hanv savzanchem khann korun ditolom; ani khoddpanchea dholimnim ani buima-ramnim ravtat tim piddê-xidden poddtolim.
28. Ho dês Hanv osadd korun sôddtolom, ani tachê podvecho obhiman bhongtolo. Israelache unch-unch dongor osadd poddtole ani konnuch tê vatten ieunchim-vechim nant.
29. Ani tãnnim kel'lea sogllea kanttalleachea kortubank lagun Hanv tancho dês sarkoch osadd korun sôddtolom; tedna Hanv Sorvespor mhonn tankam kollon ietolem."
30. Mon'xachea puta, tujea desacho lôk kottamnim ani aplea ghoranchea dara lagim tuji oxi gozal kortat. Eka-mekak tim mhonnot asat: "Ieiat, Sorvespor uloila tem utor aikum-ia."
31. Khêtt korun tujê-xim ietat; Mhoji porza tujê mukhar bosta ani tujim utram aikota, punn tanchê pormannem ti cholona. Tuka fulam mallpachim sangtat tim utram fottkirim, tanchea kallzamnim fokot mhellê zoddichi axa.
32. Ani tum mhollear tankam fokot êk mogachim gitam gavpi, modhur talleacho ani vazontram hikmotin vazovpi. - Tujim utram aikotat, punn tankam pallo dinant.
33. Hem sogott ghoddon ietolem tedna - khorem mhollear tem ieunchem zalem - êk provadi tanchê modem aslo mhonn tankam kollon ietolem.'
