1. Tea mon'xan mhaka Devmondirachea provesachea darvonttea-xim portun haddlo. Devmondiracho fuddo udentê vatten aslo; tôr Devmondirachea umbrea pondak thaun udkacho vhall bhair sortalo ani udentê vatten vhanvtalo. Hem udok Devmondirachê uzvê kuxi pondlean, vedichê dokhinn vatten, vhanvtalem.
2. Tedna tannem mhaka ut'torechea darvontteantlean bhair vhelo, ani bhaileanuch vhorun udok uzvê vatten bhair vhanvtalem thoim udentê vatten aslolea bhailea darvonttea lagim mhaka pavoilo.
3. Hatan zokh ghevpachem sut dhôrun, udentê vatten to gelo ani pãixim metr tannem mêzle; magir tannem mhaka vhallantlean vochunk lailem: udok pãianchea khubeank pavtalem.
4. Dusrim pãixim metr tannem mêzle, ani mhaka novean vhallantlean vochunk lailem: atam udok mhojea dhomprank pavtalem. Anink pãixim metr tannem mêzle ani portun mhaka vhallantlean vochunk lailem: hê pavtti udok mhojea penkttak pavtalem.
5. Novean tannem anink pãixim metr mezun kaddle: atam nôd zal'li, ani tê nodintlean mhojean utrunk zaina zalem, kiteak vhall choddon khol udok zal'lem, utrunk zaina tosli nôd.
6. Tedna tannem mhaka mhollem: 'Mon'xachea puta, tunvem hem dekhlãi mum?' Magir tannem mhaka odik pois vhelo ani portun nodichê deger pavoilo.
7. Portun pavlom tedna, nodichê deger donim-i vattamnim khub-khub zhaddam hanvem dekhlim.
8. Tannem mhaka mhollem: 'Hem udok udentê vatten vhanvun Jordanachea vholla porian ani Jiv naslolea Doria porian pavta; ani, Doriant pavtôch, tea Doriachem khar udok godd korta.
9. Ani zoim-zoim hi nôd pavta, thoim jietat teô hispa-bhaileô rochnna jiveôch urtoleô; ani bhorpur maslli astoli. Karonn hem udok pavta thoinsôr tem bholaiki haddta, ani nôd vhanvta thoinsôr subham' jiv upzota.
10. Tichea degancher kharvi astole. Maslli marpachim zallam En-Gedi thaun En-Eglaim' porian vistarlolim astolim. Thoim Bhuim-Modlea Somudrant asa têch torechi maslli astoli.
11. Punn rebddanchem ani khaznanchem udok xud'dh ani godd zaunchem na, punn mittuch diunk upkartolem.
12. Nodichê altoddi ani poltoddi sorv jin'sanchim follam divpi rukh vaddtole; tanchim panam sodanch hirvim astolim ani tankam sodanch follam piktolim; mhoineachea mhoinea tankam novim-novim follam zatolim, kiteak Devmondirant-sun vhanvtolea udkan tim ximpleant. Tanchim follam khavpak borim astolim ani tanchim panam vokhdak upkartolim'
13. Sorvespor Dev oxem mhonntta: "Ho dês Israelachea baram kullam modem tumi vanttcho asa, punn Juzek don vantte dovorche.
14. Tumkam ek-ekleak favo tedo tacho vantto melltolo, kiteak tumchea purvozank Hanv to tankam ditolom mhonn soput gheun Hanvem sanglam, ani atam ho dês tumchem daiz koxem tumchea hatant poddlo.
15. Desacheô ximô heô zatoleô: ut'torek Bhuim-modlea Somudra thaun Hethlon nogra porian veta to rosto, thoim thaun Hamath Gattar porian, thoim thaun Jedad nogra porian,
16. thoim thaun Berothat ani Shibraim' nogram porian (him nogram Damask ani Hamath hea rajeanchea vattaram modem poddtat), ani thoim thaun Tikon nogra porian (hem nogor Hauran rajeachê ximer poddta).
17. Ut'torechi xim' tea Somudra thaun Enon nogra porian udente vatten veta. Tachê ut'torek Damaskacho vattar ani Hamathacho vattar urtat.
18. Udentechi xim' dokhinnê vatten veta; Jordan Nôd Hauran ani Damaska modem, toxench Gileiad ani Israela modem, Jiv-naslolea Doriachê deger aslolea Tamar nogra porian xim' zatoli.
19. Dokhinnechi xim' Negebachê vatten veta, Tamar nogra thaun Kadeshant aslolea Meribachea Udkam porian, ani thoim thaun Ejiptachê ximê kuxik Bhuim modlea Somudra porian.
20. Ostomtechi xim' Bhuim-modlea Somudra thaun ut'torê vatten Hamathchea Ghatta porian veta.
21. Ho dês tumchea kullam modem vanttun gheiat.
22. To sodankal tumcho zatolo. Desachi vanttnni kortat tedna, tumchê modem jietat tim ani zankam hanga bhurgim zolmoleant tea porkeam mon'xank-ui zomnicho vantto mellunk zai. Tankam-i tumi Israelachim nagrikam mhonn lekhunk zai. Israelachea kullam modem tãnnim-i tumchea vangdda sorti kaddun zomnicho daizacho vantto gheunk zai.
23. Hea porkeank, zoim tim tea-tea Israelachea kulla modem jietat, thoim tumchea vangdda tanchem daiz diunk zai. Uloita to Sorvespor Dev! " '
