1. "Hi kullanchi volleri. Danachea kullak unch u'ttorek êk vantto: Hethlonachean vochun Hamath Gattar porian, thoim thaun Enon nogra porian, ani Damaskacho vattar ut'torek dovrun, ani Hamathak tenkun udentichê ximê thaun ostomtechê ximê porian.
2. "Asherachea kullak Danak tenkun êk vantto, udentechê ximê thaun ostomtechê ximê porian.
3. "Naftalichea kullak Asherak tenkun êk vantto, udentechê ximê thaun ostomtechê ximê porian.
4. "Manas'sechea kullak Naftalik tenkun êk vantto, udentechê ximê thaun ostomtechê ximê porian.
5. "Efraimachea kullak Manas'sek tenkun êk vantto, udentechê ximê thaun ostomtechê ximê porian.
6. "Reubenachea kullak Efraimak tenkun êk vantto, udentechê ximê thaun ostomtechê ximê porian.
7. "Judak Reubenak tenkun êk vantto, udentechê ximê thaun ostomtechê ximê porian.
8. "Judak tenkun, udentechê ximê thaun ostomtechê ximê porian tumi kuxin kaddun dovrunk zai to vantto: rundaien saddê-bara kilometrancho, ani lambaien bakichea kullank dil'lea vantteam itlo lamb, udentechê ximê thaun ostomtechê ximê porian. Tachea mazak astolem Devmondir.
9. "Sorvesporak tumi kuxin kaddunk dovrunk zai to vantto lambaien saddê-bara kilometrancho ani rundaien dha kilometrancho zauncho.
10. Ho povitr vantto iadnikancho zatolo: ut'torê vatten saddê-bara kilometr lamb, ostomtê vatten panch kilometr rund, udentê vatten panch kilometr rund, ani dokhinnê vatten saddê-bara kilometr lamb; Sorvesporachem Mondir tachea mazak astolem.
11. Ho vantto obhixêk kel'lea iadnikancho zatolo, mhonngê Mhozo sevadhorm samball'la ani Levitam bhaxen vatt-chuklolea Israelkaram vangdda vochunk nant tea Zadokachea putancho.
12. Hea pasot tancho vantto kheritponnim povitr mhonnun kuxin dovorlolea vantteantlo kaddcho, Levitanchea vanttea lagim.
13. Zoso iadnikancho vantto, toso Levitancho-i vantto saddê-bara kilometr lamb ani dha kilometr rund zauncho, mhonngê ak'khi lambai saddê-bara kilometr ani ak'khi rundai dha kilometr.
14. Tacho khoinchoch kuddko tãnnim vikum noiê vô adôl-bodôl korun soddum noiê. Tachem dhoniponn dusrea konnakuch sôddun dium noiê, kiteak to vantto Sorvesporak bhettoil'lo.
15. Bakichi zomin, saddê-bara kilometr lamb ani oddês kilometr rund, xarachea sadea loka khatir, ghoram bandunk ani chorovak, meklli aschi. Tachê modem xar astolem.
16. Tichi vhoddai oxi astoli: ut'torê vatten don hozar don'xim pon'nas metr, dokhinnê vatten don hozar don'xim pon'nas metr, udentê vatten don hozar don'xim pon'nas metr, ani ostomtê vatten don hozar don'xim pon'nas metr.
17. Chorovak dovorloli xarachi zomin ut'torê vatten ekxem ponchvis metranchi zaunchi, dokhinnek ekxem ponchvis metranchi udentek ekxem ponchvis metranchi, ani ostomtek ekxem ponchvis metranchi.
18. Povitr Zageak tenkun asloli zomnichi xir sôddunk zai: udentik panch kilometr lamb ani oddêz kilometr rund, ostomtek panch kilometr lamb ani oddêz kilometr rund; xekan'xek ti povitr zageak tenkun aschi. Nogorpalikechea kamdaranchea jevnna-posonnak gorjechi ienneavôll tantli melltoli.
19. Ani Israelachea sogllea kullantle kaddlole nogorpalikeche kamdar hi zomin vosoitole.
20. Hi zomin soglli mellun dôr-êkê vatten saddê-bara kilometranchi asunk zai. Povitr zageantli êk chovkonni svat xar bandunk mhonnun tumi kuxin dovorchi.
21. Urta ti zomin, povitr zagea ani xar bandunk dovorlolea zagea ailean ani pelean, kunvrachi zatoli, kunvrachea dusrea vantteam samki sarki: udentê vatten vochun, udentechê ximê porian saddê-bara kilometr, ani ostomtê vatten vochun ostomtechê ximê porian saddê-bara kilometr. Tachea mazak povitr zago astolo ani Devmondiracho Gabharo.
22. Oxem, kunvrachea zagea modem aslolea Levitanchea zagea bhair ani xarachea zagea bhair, Judachea ani Benjaminachea ximam modem asa ti soglli zomin kunvrachi zatoli.
23. "Heram kullam vixim: Benjaminachea kullak udentechê ximê thaun ostomtechê ximê porian êk vantto.
24. "Simeonachea kullak Benjaminak tenkun aslolo êk vantto, udentechê ximê thaun ostomtechê ximê porian.
25. "Issakarachea kullak Simeonak tenkun aslolo êk vantto, udentechê ximê thaun ostomtechê ximê porian.
26. "Jebulunachea kullak Issakarak tenkun aslolo êk vantto, udentechê ximê thaun ostomtechê ximê porian.
27. "Gadachea kullak Jebulunak tenkun aslolo êk vantto, udentechê ximê thaun ostomtechê ximê porian.
28. Gadachê dokhinnechê ximer, dokhinnechê vatten vochun, Tamar nogra thaun Kadeshant aslolea Meribachea udkam porian, ani thoim thaun Ejipta ani Bhuim-modlea Somdira porian hi xim' vetoli.
29. "Hê bhaxen tumi ho dês Israelachea kullank tanchem daiz koxem vanttunk zai; ani he tanche vantte zatole. Uloita to Sorvespor Dev!
30. "Xarantlim bhair sorunk he asat darvontte: ut'torê vatten don hozar don'xim pon'nas metr mêzche.
31. Xarachea darvontteank Israelachea kullanchim nanvam diunchim. Ut'torê vatten tin darvontte: êk Reubenacho darvontto; êk Judacho darvontto; êk Levicho darvontto.
32. Udentê vatten don hozar don'xim pon'nas metr mêzche ani tin darvontte asche: êk Juzecho darvontto; êk Benjaminacho darvontto; ani êk Danacho darvontto.
33. Dokhinnê vatten don hozar don'xim pon'nas metr mêzche ani tin darvontte asche: êk Simeonacho darvontto; êk Issakaracho darvontto; êk Jebulunacho darvontto.
34. Ostomtê vatten don hozar don'xim pon'nas metr mêzche ani tin darvontte asche: êk Gadacho darvontto; êk Asheracho darvontto; êk Naftalicho darvontto.
35. Tachi ak'khi bhonvtonnchi xim' nnov hozar metranchi zatoli. 'Fuddarak Xarachem nanv oxem zaunchem: 'Sorvespor-thoim-asa." '
