1. Sorvesporachem utor mhaka pavlem; Tannem mhollem:
2. Mon'xachea puta, Am'monitkaram vatten polleun tankam oso sondêx di.
3. Am'monitkarank oxem sang: "Sorvespora Devachem utor aikat. Sorvespor Dev oxem mhonntta: "Mhojem Mondir bhoxttailem tedna, ani Israelachea desachem ghorttann kelem tedna, ani Judachem Ghorannem pordesant gelem tedna, tumi murgott'taleat.
4. Dekhun Udentichea lokank tumkam aplea tabeant korunk ditolom; tumchê modem te aplem pennem kortole, ani tumchê modem tthikann korun ravtole. Tumchem utpadon te khatole ani tumchem dud te pietole.
5. Rab'bas xar unttank chorvachem moidan korun ditolom, ani Am'monitkaranchea nogranchim hinddanchim oddpam kortolom. Ani oxem Hanv Sorvespor mhonn tumkam kollon ietolem.
6. "Sorvespor Dev oxem mhonntta: 'Israelachea durdoiva pasot kusddea dhadosponnan tumi talliô pêttleô ani sontosan tumi nachunk laglim dekhun,
7. haka lagun tumchê add Mhozo hat ubartolom; dusrea lokank tumkam luttunk dhaddtolom, tumkam raxttram modlim kaddun uddoitolom ani tumcho dês nanch kortolom. Tumkam sarkinch nattak kortolom, ani Hanv Sorvespor mhonn tumkam kollon ietolem.'
8. "Sorvespor Dev oxem mhonntta: "Moab ani Seir oxem mhonnttat: Judachem Ghorannem polleiat; tem sogllea heram raxttram sarkem;
9. dekhun, polleiat, Hanv Moabachea dongranchi vatt dusmanank dakhoitolom; tachim nogram ak'khea desant - mhonngê Beth - Jeshimoth, Baal-Meon ani Kiriathaim', him desachim mann-kam - anink nogram mhonn urchim nant.
10. Am'monitkaram borabôr him nogram Udentichea lokank aplea tabeant korunk ditolom, oxem raxttram modem tancho ugddas porian urcho na.
11. Hê bhaxen Hanv Moabachi mon'subi kortolom, ani oxem Hanv Sorvespor mhonn tankam kollon ietolem.'
12. "Sorvespor Dev oxem mhonntta: "Edoman Judachea Ghoranneacho sudd ghetlo ani oxem korun tancho vhôdd guneanv zalo dekhun,
13. Sorvespor Dev oxem sangta: Edoma virudh Hanv Mhozo hat ubartolom ani tanchea mo'nxank toxench zonavorank marun uddoitolom. Temana thaun Dedana porian Edomak Hanv osadd ganv kortolom; tim torvarin mortolim.
14. Mhojê porjê Israela udexim Hanv Edomacho sudd ghetolom. Mhozo rag ani krôdh korunk laitat toxem tim Edomak kortolim, ani ho Mhozo sudd mhonn tankam gomun ietolem. Uloita to Sorvespor!'
15. "Sorvespor Dev oxem mhonntta: "Filistevkaramnim sudd ghevpachi bhavna ballgili ani kallzachê darunnaien sudd ghetlo; lamb kalla thaun pottant dovorlolea dvesan tanchea dusmanacho nas korunk zata titlem tãnnim kelem;
16. dekhun Sorvespor Dev oxem sangta: Filistevkaram add Hanv Mhozo hat ubartolom; tanchea xezariam Kerethitancho nas kortolom ani kinarer ravtolea heram lokancho vidvas kortolom.
17. Tancho sudd gheunk bhirankull upai ghetolom, ani tankam bhov koddok xikxa laitolom; ani jedna tancho Hanv sudd ghetolom, tedna Hanv Sorvespor mhonn tankam kollon ietolem. " '
