1. Sorvesporacho hat mhojer denvlo, ani Sorvesporan mhaka Aplea Atmean ubarun vhelo; ani eka falkea modem, haddamnim bhòrlolea falkea modem, mhaka vhorun dovorlo.
2. Tanchê modlean soglleak Tannem mhaka bhonvddailo. Tea falkeachê zomnir khub-khub haddam aslim, ani tim sarkim suklolim.
3. Tannem mhaka mhollem: 'Mon'xachea puta, him haddam jivim zaunk xoktat kai?' Hanvem mhollem: 'Tem Tum zannoi, Sorvespora Deva!'
4. Ani Tannem mhaka mhollem: 'Hea haddancher sondêx diun tankam sang: "Suklolea haddamnô, Sorvesporachem utor aikat.
5. Hea haddank Sorvespor Dev oxem sangta: Hanv svas tumchê bhitôr soro-so kortolom ani tumi novean jivim zatoleat.
6. Tumcher Hanv xirantoram ghaltolom, tumcher mas vaddo-xem kortolom, ani tumkam kat ie-xi kortolom, ani tumkam svas ditolom ani tumi novean jivim zatoleat. Ani Hanv Sorvespor mhonn tumkam gomun ietolem!"
7. Mhaka kel'lê adniê pormannem hanvem sondêx dilo. Hanv sondêx ditastana bobatt zali, kôddkôdd zalo, ani haddam haddank zoddon ailim.
8. Hanvem pollelem ani tim xirantoramnim bhòrlolim mhaka dixtti poddlim; tancher mas vaddtalem ani tankam kat ietali; punn tanchê bhitôr svas naslo.
9. Tannem mhaka mhollem: 'Svasak sondêx di; mon'xachea puta, sondêx di! Svasak sang: "Sorvespor Dev oxem sangta: Char-ui vareantlo ie ani hea mel'leancher svas sôdd; tankam jivim zaum-di." '
10. Tannem kel'lê adniê pormannem hanvem sondêx dilo, ani svas tanchê bhitôr ailo; tim novean jivont zalim, ani apleanch pãiamnim ubim ravlim: êk vhôdd ani vorixtt fouz!
11. Tedna Tannem mhaka mhollem: 'Mon'xachea puta, him haddam ak'khem Israelachem Ghorannem. Tim oxem sangun bhonvtat: "Amchim haddam sukleant. Amcho bhorvanso virun gelo; atam amkam anink kãich urunk na."
12. Mhonnttôch tankam sondêx diun sang: "Sorvespor Dev oxem sangta: Porjê Mhojê, atam Hanv tumche fondd ukte korunk vetam ani tumchea fonddantlim tumkam bhair kaddunk vetam, ani portun Israelachea desant tumkam pavoitolom.
13. Porjê Mhojê, Hanv tumche fondd ukte kortolom tedna ani tumkam fonddantlim bhair kaddtolom tedna, Hanv Sorvespor mhonn tumkam gomun ietolem.
14. Hanv Mhozo Atmo tumchê bhitôr ghaltolom ani tumi novean jivont zatoleat, ani Hanv tumkam portun tumchea khaxa desant pavoitolom. Uloita to Sorvespor!" '
15. Sorveporachem utor mhaka pavlem; Tannem mhollem:
16. Mon'xachea puta, êk boddi ghe ani ticher oxem boroi: "Juda ani tachê vatten asloleô Israelacheô put-dhuvô." Anink êk boddi ghe (Efraimachi boddi ti) ani ticher oxem boroi: "Juze ani tachê vatten asloleô Israelacheô soglleô put-dhuvô."
17. Don-ui boddiô dhôr ani teô êk lankdda-kuddko zata toxeô zôdd, tujea hatant êkuch boddi aso-xi kôr.
18. Ani tujê porjecheô put-dhuvô "kiteak oxem kortai tem sang amkam!"s, oxem tuka mhonnttoleô tedna,
19. tankam oxem sang: "Sorvespor Dev oxem sangta: Efraimachea hatant asa ti Juzechi ani tachê vatten aslolea Israelachea kullanchi boddi Hanv atam kaddunk vetam ani Judachê boddiek ti zoddunk vetam. Don boddianchi Hanv êk boddi kortolom ani teô êk boddi koxi Mhojea hatant dhôrtolom."
20. Zancher tunvem boroilãi teô boddiô tanchea dolleam mukhar tujea hatant astoleô tedna,
21. tankam sang: "Sorvespor Dev oxem sangta: Jea-jea raxttramnim Israelachim bhurgim geleant, thoinchim tankam bhair kaddtolom; zollim-mollim ximpoddleant tankam zoma kortolom ani aplea khaxa desant portun haddtolom.
22. Hea desant, Israelachea dongrancher, Hanv tanchem ekuch raxttr kortolom, ani somestancher êkuch raza razvôtt choloitolo: tanchim anink don raxttram zaunchim nant, ani don rajeamnim tim anink doxim aschim nant.
23. Ani aplea kuddea devanchi seva korun, nhoi mhonn apleam kanttalleachea chalimnim, nhoi mhonn aplea noxttea kortubamnim, tim anink bhoxttonchim nant. Tãnnim kel'lea ovisvaxiponnachea kornniantlim Hanv tankam nivartolom ani tankam xud'dh kortolom; tim Mhoji porza zatolim, ani Hanv zatolom tancho Dev.
24. Ani David Mhozo sevôk tancher raj choloitolo. Ani somestank êkuch gonvlli astolo. Tim Mhojea nemam pormannem choltolim ani Mhoje kaide samballtolim ani tankam pallo ditolim.
25. Ani Hanvem Mhojea sevoka Jakobab dil'lea desant, tumchim purvozam ravtalim tea desant, tim jietolim. Thoim tim ravtolim, tim ani tanchim bhurgim ani tanchea bhurgean-chim bhurgim, sorvkallak. David Mhozo sevôk nirontorim tancho raza zatolo.
26. Tanchê lagim Hanv êk xanticho korar sthaptolom, sasnnak togpacho tanchê lagim korar kortolom. Hanv tankam novean tanchea desant tthikann korunk pavoitolom ani tanchi sonkia vaddoitolom; tanchê modem sasnnak togpachem Mhojem Povitr-Sthan bandun haddtolom.
27. Tanchê modem Mhojem tthikann kortolom; Hanv zatolom tancho Dev, ani tim zatolim Mhoji porza.
28. Ani jedna Mhojem Povitr-Sthan sorvkallak tanchê modem astolem, tedna Hanv Sorvespor Israelak povitr korun kuxin kaddun dovorta to Dev mhonn raxttram vollkhun ghetolim." '
