1. "Ek-eklea kullak ap-aplo vantto diunk desachi vanttnni zata tedna, êk vantto Sorvesporak bhettouncho. Tachi lambai zaunchi saddê-bara kilometranchi, ani tachi rundai dha kilometranchi. Ho ak'kho prodês povitr mhonn vegllo dovorcho.
2. Hea prodesant Devmondira pasot êk chovkonno zago rakhun dovorcho: dôr-êk bazu oddês-xim metranchi. Hea zagea sobhonvtim ukti zomin aschi: tichi rundai ponchvis metranchi.
3. Devmondir bandchê pasot hea zageachem ord mezun dovorchem: saddê-bara kilometr lamb ani panch kilmetr rund. Thoim Devmondir ietolem; soglleam-vôn povitr svat ti.
4. Hi svat zatoli desacho povitr vantto, Devmondirant sevadhorm choloitat ani Sorvespora mukhar Tachi seva kortat tea iadnikam khatir kuxin kaddun dovorlolo. Thoim tanchim ghoram bandunk ani toxench Devmondir bandunk svat aschi.
5. Hea vibhagachem dusrem ord, saddê-bara kilometr lamb ani panch kilometr rund, Devmondirant seva kortat tea Levitam khatir kuxin kaddun dovorchem: thoim tankam jieunk nogram astolim.
6. Hea povitr vibhagak tenkun saddê-bara kilometr lamb ani oddêz kilometr rund êk vibhag kuxin kaddun dovorcho ani thoim ek xar bandchem: hea xarant Israelachea ak'khea Ghoranneantlea konnachean-ui thoim tthikann korun ravum-ieta.
7. "Povitr zageak ani toxench xarachea bhagak tenkun razvôtt choloitolea kunvrak êk prodês ascho: povitr vibhagachê ostomtê-ximer thaun ostomtê vatten Bhuimodlea Somdira porian to vistartolo; ani povitr vibha-gachê udenti-ximer thaun desachê udenti ximê meren to astolo. Oxem taka dovorlolo prodês Israelachea khoinchea-i eka kullak dovorlolea vibhaga edo zatolo.
8. Israelant ho vibhag razvôtt choloitolea kunvracho vantto zatolo. Hê bhaxen Mhoje kunvor Mhojê porjek anink zulum' korche nant; punn desacho urlolo sogllo bhag Israelachea Ghoranneak, tachea kullank, te dovortole.
9. "Sorvespor Dev oxem sangta: Israelachea kunvramnô, puro atam! Tumcho zulum' ani zobordosti bond korat, promannikponn ani nit samballat ,khor kôr bosoun Mhojê porjek anink chepum nakat. Uloita to Sorvespor Dev!
10. Tagddiô ani mapam sarkim zaum-di:
11. Efas ani bat ekach mapachim zaum-di; homer sogllea zokham-mapachem mull-pormann mhonn dhôrun, eka homerak dha efas vô dha bat asche.
12. Eka shekelak vis geras. Eka minak soglle mellun satth shekel.
13. "Heô bhettovnniô tumi kaddun gheuncheô: gonv - dôr-eka homera pattlean efacho sovo vantto; zôv -dôr eka homera pattlean efacho sovo vantto;
14. zoitunanchem tel - dha-dha batantlo vô dôr-eka korantlo telacho êk bat (eka korak dha bat asat, vô êk kôr ani êk homer ekach zhokache, kiteak eka homerak-ui dhach bat asat)
15. Israelachea hirvea moidanantlea dôr-eka hindda pattlean ek menddrum bhettovnniam khatir, ani hom' ani xantichim bolidanam korchê pasot; Hem sogott tumchea patkanchem farikponn mhonn dhôrchem - uloita to Sorvespor Dev!
16. Desantlea sogllea lokan hem orponn gheun Israelachea kunvrak pavounchem.
17. Hi zatoli kunvrachi zobabdari: porbanchea somoiar, amashechea disa, Son'varanchea ani Israelachea Ghoranneachea sorv dobajik utsovanchea somoiar, homam khatir mon'zati, orovacheô bhettovnniô ani soreachim orponnam diunk.
18. "Sorvespor Dev oxem mhonntta: Poilea mhoineachea poilea disa Devmondir xud'dh korchê pasot khôdd-naslolo êk boil bolidan korun tumi bhettouncho.
19. Hea patkam khatir kel'lea bolidanantlem iadnikan thoddem rogot gheunchem ani tem Devmondirachea darvontteanchea khambeancher, vedichea mudolachea char-ui konnxeancher, ani bhitorlea angnnantlea darvontteanchea khambeancher ghalchem.
20. Konnem-i zôr chit dinastana vô nennarponnan patkam keleant, tea mon'xa pasot tench tumi mhoineachea satvea disa korchem. Hê bhaxen tumi Devmondirachi xud'dhi samballchi.
21. Poilea mhoineachea chovdavea disa Paskacho utsôv tumi somarombhunk suru kortoleat. Sat dis-bhôr soglleamnim khomir-naslolo unddo khauncho.
22. Tea disa kunvran apnnacheanch ani desantlea sogllea lokachea patkam pasot patkanchea farikponnachem bolidan korun êk boil bhettounk zai.
23. Utsovache sat-ui dis, dôr-eka disa, tannem Sorvesporak khôdd-naslolea sat boilanche ani sat menddreanche hom' bhettounche. Toxench patkanchea farikponna pasot dôr-disa tannem êk bokddo bhettouncho.
24. Tea bhair, dôr-eka boila orovacho êk efa, ani dôr-eka menddrea pattlean êk efa, ani dôr-eka efa pattlean telacho êk hin, hanchem orponn korchem.
25. "Satvea mhoineachea pondravea disa poddta tea Utsovak kunvran sat dis-bhôr toxench korchem: patkanchem bolidan, hom', orovachim orponnam ani zoitunanchem tel tannem bhettounchim." '
