1. Sorvesporan Moizesak mhollem, 'Chol, Faraoh-xim vochun taka sang, Sorvespor Hebrevancho Dev oxem mhonntta: 'Mhaka bhozchê khatir, mhojê porjek vochum-di.
2. Tankam vochunk dinastana tika addaixi zalear,
3. polle, Sorvesporacho hat, tumchea sorv zonavorancher: ghoddeancher, gaddvancher, unttancher, gorvancher, menddrancher, ani bokddeancher, êk mornnadik pidda dhaddun tumkam khast laitolo.
4. Ani hanv Israel-porjechea ani Ejipt porjechea zonavoram modem ontor kortolom, ani Israelachem êk legun zonavor morchem na.
5. Sorvesporan vêll tharailo mhunnon: Faleam Sorvespor hea desant oxem kortolo.'
6. Dusrea disa, Sorvesporan, sanglolem toxem kelem, ani Ejiptkaranchim sogllim zonavoram morun gelim, punn Israelachem êk punn melem na.
7. Kitem ghoddlem tachi Faraohn choukoxi keli, ani Israelachem êk legun zonavor morunk na mhonn taka gomlem. Toriastana Faraoh dharunnuch ravlo, ani porjek vochunk dilem na.
8. Tedna Sorvesporan Moizesak ani Aaronak mhollem, 'Tumchea khornantlo, mutt -bhor kallo gobor gheiat ani Faraohchê nodrê mukhar, Moizesan varear ximpddaum.
9. Ho kallo gobor sarko barik pitto zaun, ak'khea Ejipt desant to posortolo, ani veta thoim to angak fodd ubzoitolo, ani zonavorank toxem monxank, te fodd futton chovnam zatolim.'
10. Mhonnttôch te khornnantlo kallo gobor ghevun Faraoh fuddeant ube ravle: Moizesan to gobor varear uboilo, ani lokank ani zonavorank, angak fodd ieun te futtle ani chovnam zalim.
11. Hê pavtti tea ghaddiank Moizesak avhan korunk zalem na, kiteak heram Ejiptkaram porim, tanchea-i angak fodd futtle.
12. Punn Sorvesporan Faraohk odikuch dharunn kelo; ani Sorvesporan Moizesak sanglolem tê porim, tankam to aikoch na zalo.
13. Magir Sorvesporan Moizesak mhollem, 'Sokall fuddem utth ani Faraoh-xim voch. Taka sang, "Hebrevancho Dev Sorvespor oxem mhonntta: Mhojê porjek mhaka nomoskar korunk vochum di.
14. Hê pavtt, tujer, tujea opxalancher ani tujê porjecherui soglleô mhojeô khasti dhaddtolom, hê vorvim, ak'khê prithumêver mhojê sarko konnuch na mhonn tuka kollon ietolem.
15. Hanvem tujer ani tujê porjecher khast launk mhozo hat ubarlolo zalear, tumi prithumê voilim nanch zatolim aslim.
16. Punn mhoji podvi tuka dakhounk, ani akhê prithumê-ver mhojem nanv gazunk, hanvem tuzo jiv vattaila.
17. Toriastana tum gorva-dharunnaien bhorlai, ani mhojê porjek vochunk dinaim.
18. Borem tôr faleam hea vellar, êk khôr korveancho-pavs votoitolom, Ejiptan kednanch adim aplê sthapnnê disa meren dekhunk na toslo pavs.
19. Tôr, tumchim gorvam-vasram asa tim sogllim addosak dovrunk hukum' di. Na tôr, lôk ani zonavoram ukteak asat tancher to korveancho pavs poddun tim mortolim!'
20. Him Sorvesporachim utram aikun, kãi Faraohche opxal bhiele, ani tãnnim aplea chakrank ani zonavorank bhitôr haddlim.
21. Punn zannim Sorvesporachem utor aikonk na, tãnnim aplea chakrank ani zonavorank ukteak dovorlim.
22. Sorvesporan Moizesak mhollem, 'Mollba veslean tuzo hat ubar, ani ak'khea Ejiptachea desant mon'xancher, zonavorancher ani Ejiptant vhaddta titleacherui korveancho pavs vot'tolo.'
23. Moizesan aplo danddo mollbak ubarlo ani Sorvesporan ghodghoddo ani korveancho pavs ani viz dhaddlim.
24. Sorvesporan bhirankull korve zomnir votoile, ani vizacheô lamb-lamb kolteô zomnik adovttaleô. Ejiptan toslem adim, apunn ek raxttr koxem utpon zalam tê meren, kednanch dekhlem na.
25. Uktear aslem titlem-i Ejiptant moddon poddlem, lôk toxim zonavoram melim. Xetamnim vhaddta titleachoi bhôsm zalo ani zhaddam sogllim moddon poddlim.
26. Israel-porza ravtali to prant, Goxen, hea ekleach ganvant korveancho-pavs poddonk na.
27. Tedna Faraohn Moizesak ani Aaronak apoun haddle, ani mhollem, 'Hê pavtti hanvem pap adarlem! Sorvesporan kelam tem sarkem, mhoji porza ani hanv chukleanv.
28. Sorvespora lagim mag: Ho ghoddghoddo ani korveancho pavs amchean anik sõsunk zaina. Bhas diun, tumkam vochunk ditam. Tumi atam hanga ravchi goroz na.'
29. Moizesan taka mhollem, 'xarantlo bhair sorona fuddem, Sorvesporak mhoje hat ubartolom. Ghoddghoddo bond zatolo ani korve anink poddchenant, hea vorvim, soglli prithum' Sorvesporachi mhonn tuka thavem zatolem.
30. Punn tujea, zanv tujea opxalanchea kallzant ozun Devachi bhirant rigunk na.'
31. Sonnbiachim toxim jovarichim xetam sogllim gelim, kiteak jovar pikun ailli ani sonnbian-chem zhadd niktench fultalem.
32. Punn gonvak dhoko boslona, kiteak gonvachem pik ilem uxir.
33. Moizes Faraohchea fuddeantlo koddsorun, xara bhair gelo ani Sorvesporak aple hat ubarle. Rokddench ghoddghoddo, pavs ani korve poddpache bond zalem.
34. Hem polleun, Faraohn porot pap adarlem. To ani tache opxal adlech porim darunn zale.
35. Ani Sorvesporan Moizesak sanglolem tê porim, Faraoh porjek vochunk sôddina zalo.
