1. Moizes Jethro aplea sasupaicho hindd rakhtalo. Ho Midianacho iadnik aslo. Ekdam tannem aplea hinddak oronneachea poixilea bhagant vhelo ani Horeb hea Devachea porvota-xim to pavlo.
2. Thoim Sorvesporacho dut eka jhilkuttantlean eka ujeachea agtteachea rupan taka dixtti poddlo. Jhilkuttak uzo pettlolo punn tem lasonaslem
3. Moizesan mhollem, 'Hem koslem dorxon ani tem jhilkutt kiteak lasona tem hanv vochun polletolom.'
4. Moizes tem polleunk lagim sorta to Sorvesporan pollelo ani jhilkutta modem ravun mhollem, 'Moizes, Moizes!' Moizesan zap dili, 'Ho polle asam.'
5. Devan taka mhollem, 'Hanga lagim soronakai, Tujea pãiancheô vhannô kadd, kiteak tum asai to zago povitr.'
6. Tea fuddem mhollem, 'Hanv tujea bapaicho Dev, Abrahamacho Dev, Izakacho Dev, Jakobacho Dev.' Tedna Moizesan aplem mukhamoll dhamplem, kiteak to Devak polleunk bhietalo.
7. Ani Sorvesporan mhollem, 'Ejiptant Mhojê porjechem dolldirponn Hanvem pollelam. Gulamxai choloitat tanchea hatantli mukt zauncheak tinnem mhaka ulo marlo to Hanvem aikola. Hôi,tanchea koxttam-dogdanchi Mhaka khobor asa.
8. Tika Ejiptkaranchea hatantlim soddounk Hanv ailam ani tea desantli bhair kaddun dud ani mhonv vhanvta toslea eka sukhest ani vixall desant mhonngê Kanaanitanchea, Hititanchea, Amoritanchea, Perizzitanchea, Hivitanchea ani Jebusitanchea desant tika haddunk Hanvem ievjilam.'
9. Israelachea putam-dhuvanchi bob Mhojê-xim pavlea ani tea bhair Ejiptkaram tankam koxim koxttaitat tem Hanvem pollelam;
10. tôr ie, Israelachea putam-dhuvank Ejiptantlim bhair kaddunk Hanv tuka Faraoh-xim dhaddtam.'
11. Moizesan Devak mhollem, 'Faraoh-xim vochunk ani Israelachea putam-dhuvank Ejiptantlim bhair kaddunk hanv konn?'
12. Sorvesporan mhollem, 'Hanv tujê borabor astolom ani Hanvem tuka dhaddla mhonn vollkhunk hi khunna: tunvem porjek Ejiptantli bhair kaddlii mhonnttôch, hea dongrar tumi Devak bhoztoleat.'
13. Moizesan Devak mhollem, 'Zôr hanv Israelachea putam-dhuvamxim vochun oxem sangit zalear: Tumchea purvozanchea Devan mhaka tumchê-xim dhaddla.' Punn Tachem nanv kitem kai mhonn tim mhojê kodde vichartit zalear, hanvt tankam kitem mhonn sangum?'
14. Ani Devan Moizesak mhollem, 'ZO ASA TO HANV!' Tea bhair anink-ui Tannem mhollem, 'Israelachea putam-dhuvank tunvem oxem sangunk zai: "ZO ASA Hannem mhaka tumchê-xim dhaddla."'
15. Ani Devan Moizesak anink-ui sanglem, 'Tunvem Israelachea putam-dhuvank oxem sangunk zai: "Sorvespor, tumchea purvozancho Dev, Abrahamacho Dev, Izakacho Dev, ani Jakobacho Dev, hannem mhaka tumchê-xim dhaddla." Sodam sorvodam hem Mhojem Nanv; heach Nanvan pinddkecheô pinddka Mhaka ulo martoleô.
16. Voch ani Israelachea zannteank ektthaim kôr ani tankam sang, 'Sorvespor, tumchea purvozancho Dev, Abrahamacho, Izakacho ani Jakobacho Dev, haka dixtti poddla ani tannem mhaka sanglam, 'Hanvem tumkam bhett keli ani Ejiptkaram tumkam koxttaitat tem Hanvem pollelem
17. ani tumkam Ejiptachea dhumalleantlim bhair kaddunk Hanvem ievjilam ani Kanaan'karanchea, Hititanchea, Amoritanchea, Perizzitanchea, Hivitanchea ani Jebusitanchea desant, mhonv ani dud vhanvta tea desant, tumkam vhorunk Hanvem tharailam.'
18. Tim tuzo tallo aikotolim, ani tum Israelachea zannteank gheun Ejiptachea raza-xim vetoloi ani taka oxem sangtoloi, 'Sorvespor, Hebrevancho Dev amkam porgôtt zala. Tin disanchi vatt cholun, oronneant Sorvespora amchea Devak iôdn bhettounk amkam rojea di.
19. Punn Hanv zannam, Ejiptacho raza, eka bollixtt bavllean taka boll kelea bogor, tumkam vochunk diuncho na.
20. Punn Hanv Mhozo hat ubartolom ani tachea dolleam mukhar sogllê torechim ojapam korun Ejiptak khast laitolom. Tea uprant to tumkam vochunk ditolo.'
21. Ejiptantlo lôk tumkam manan lekhiso kortolom, hê porim porza ritea hatamnim thoinchi bhair sorchina.
22. Protek Hebrev ostori aplea xezarak ani tanger ravtolea dusrea ostoream koddlean bhangar-rupeache nog magun ghetoli. Magir tumchea putam-dhuvanchea angar ghaltole ani Ejiptkarank lutt'tole.
